Эрон Британия консорциуми билан нефть қазиб олиш бўйича шартнома имзолади. Бу Вашингтон Эронга қарши санкцияларни тиклаш учун ядро битимидан чиқишини эълон қилгандан сўнг Ғарб компанияси билан имзоланган биринчи ҳужжатдир.
Эроннинг Миллий жанубий нефть компанияси қароргоҳи Лондонда жойлашган Pergas консорциуми билан шартномага қўл қўйди. Унга кўра, Эрон жануби-шарқида жойлашган Керанж нефть конидан 10 йилда 655 миллон баррель нефть қазиб олинади. Бу ҳақда Эрон нефть вазирлиги 17 май куни хабар тарқатди.
Pergas билан шартномага қўл қўйилишидан бир неча соат олдин Франциянинг Total энергетика компанияси Эрондаги улкан табиий газ лойиҳасидан чиқишини маълум қилган эди. Бундай қарор қабул қилишига унга нисбатан АҚШнинг санкция қўллаш таҳдиди сабаб бўлди. Агар Total Эрон билан шартномани бекор қилмаса, унга нисбатан жорий йилнинг ноябрь ойидан бошлаб санкция қўлланиши белгиланган эди.
Pergas билан шартнома Теҳронда 16 май куни Британия элчиси иштирокида имзоланди. Лекин бу масалада консорциум расмий Лондондан рухсат олган-олмагани маълум эмас.
− Буюк Британия ҳукумати... шартномани маъқуллайди, деб умид қиляпмиз, − деди Эрон нефть вазири Бижан Намадар Занганеҳ.
Pergas амалга оширадиган 1 миллиард долларлик лойиҳа замонавий технологияларни қўллаш, эски Каранж нефть конидан кейинги ўн йилда ҳар куни 200 минг баррель нефть қазиб олишни назарда тутади. Айни пайтда ўша кондан кунига 120 минг баррель нефть қазиб олинмоқда.
АҚШнинг тикланган санкциялари Қўшма Штатлар ва чет эл компанияларининг Эрон билан ҳамкорлик қилишини, яна ҳамкорлик учун АҚШнинг молия муассасалари фаолиятидан фойдаланишни тақиқлайди.
Зангенаҳ расмий Теҳрон айни пайтда кунига 4 миллион барреллик нефть қазиб олиш ва экспорт суръатларини сақлаб қолиш учун қўлидан келган барча ишни қилишини айтди. Унинг фикрича, Эрон АҚШнинг ядро битимидан чиқиши оқибатларига барҳам беришнинг уддасидан чиқа олади.
− Ҳозирги қийинчиликлар ўтиб кетади ва Эрон ундан ғалаба билан чиқади,− деди у.
