Россия рублининг АҚШ долларига нисбати Москва биржасининг душанба кунги иш куни бошида 68 рублдан ошиб, сўнгги икки йилдаги аксилрекордни янгилади. Евро курси ҳам деярли 1 рублга ошди.
Рубль қадрсизланишининг асосий омили АҚШнинг Россияга қарши санкциялари эканлиги айтилмоқда.
Янги санкцияларга жорий йил мартида Англияда собиқ рус жосуси Сергей Скрипаль ва қизининг Совет Иттифоқида ишлаб чиқарилган асабни фалажловчи “Новичок” моддаси билан заҳарлангани туртки бўлди.
Санкцияларнинг илк туркуми 22 август куни кучга кириши кутилаётгани айтилмоқда. Улар электроника, назорат-текширув қурилмалари, газ турбинаси агрегатлари сингари АҚШнинг илғор технологиялари ва саноат ускуналарига дахлдор бўлади.
Санкцияларнинг иккинчи туркуми қамрови биринчисидан кенгроқ бўлади. Фақат улар қўлланмаслиги учун Москва 90 кун ичида бундан буён кимёвий қуролларни қўлламасликка “ишонарли кафолат” бериши, БМТ ва бошқа халқаро кузатув ташкилотларига улар қўлланган жойда текширув ўтказилишига рухсат этиши ҳамда АҚШнинг бошқа талабларига жавоб қайтариши керак бўлади.