Афғонистон расмийларининг билдиришича, Кобул марказида президент Ашраф Ғани нутқ сўзлаётган пайтда ҳукумат биноларига қарата ракета отган уч жангари йўқ қилинган.
Ракеталар президент Кобулнинг эски маҳалласидаги масжидда афғонистонликларни Ҳайит билан табриклаётган пайтда отилган. Натижада армия вертолётлари сафарбар қилинган, уларнинг бири жангариларга қарата ракета отган.
Ички ишлар вазирлиги матбуот котиби Нажиб Дониш масжид яқинидаги иморатни эгаллаб олган уч нафар жангари ўлдирилганини тасдиқлади.
Дониш ҳужумчиларни “террорчилар“ дея таърифлади, аммо улар толиблар, “Ислом давлати“ жангарилари ёки бошқа гуруҳ аъзолари бўлганини очиқламади.
Ракеталар президент саройи, АҚШ элчихонаси ҳамда ҳукумат бинолари яқинида портлаган. Ҳужумлар учун ҳали ҳеч бир гуруҳ масъулиятни ўз бўйнига олгани йўқ.
Хабарларга кўра, ракеталар овозини эшитган Ғани табрик сўзини тўхтатиб,
- Улар ракета ҳужуми билан афғонистонликлар ўсишига тўсқинлик қилмоқчи бўлсалар, адашадилар. Ракета отиш орқали улар Афғонистон халқини ривожланишдан сақлаб қола олмайдилар, - деган.
Сўнгги маълумотларга кўра, умумий ҳисобда 12 ракета портлаган. Дониш портлашларда ҳеч ким жароҳат олмаганини, аммо жангариларни йўқ қилиш пайтида икки нафар полиция ходими жароҳат олганини айтди.
