Шифокорлар ва олимлар Хитой ва Кубада 30 дан ортиқ АҚШ дипломатининг номаълум касалликка чалинишига микротўлқинли қурол билан амалга оширилган ҳужумлар сабаб бўлган, деган фикрни илгари сурмоқда. Бу ҳақда The New York Times газетаси хабар қилди.
Дипломатлар яшаётган жойларида кучли чинқириқ эшитишганини, бунинг ортидан кўнгиллари айниб, бошларига оғриқ кирганини ҳамда ухлаш ва эшитиш билан боғлиқ муаммоларга дучор бўлишганини хабар қилишган.
Кубада юқорида тилга олинган аломатларга дучор бўлган 21 дипломатни текширган тиббий гуруҳ март ойида The Journal of the American Medical Association журналида чоп этган мақолада микротўлқинли қуроллар ҳақида ҳеч нима дейилмаган эди.
Аммо мақола муаллифи Дуглас Смит газетага берган интервьюсида эндиликда микротўлқинли қуроллар асосий гумонланувчи ўлароқ кўрилаётганини таъкидлади.
- Бошида ҳеч ким бунга ишонқирамади, аммо эндиликда ҳамма бу ерда бир гап бор, деган фикрда, - деди Смит.
На АҚШ Давлат департаменти, на Федерал қидирув бюроси микротўлқинли қуроллар қўлланилган бўлиши мумкинлиги ҳақидаги қарашларга муносабат билдирди.
2017 йилнинг сентябрида АҚШ Кубани ҳужумни амалга оширишда ёки АҚШ дипломатларини ҳимоя қилмасликда айблаб, Кубадаги дипломатларининг деярли ярмини чақириб олди ва 15 Куба дипломатини Вашингтонни тарк этишга мажбурлади.
Куба тарафи эса АҚШ айбловларини рад этиб келади.
Жорий йилнинг июнь ойида Давлат департаменти Хитойда ўз дипломатлари юқорида тилга олинган симптомлар ҳақида шикоят қилиши ортидан улар Америкага олиб кетилганини эълон қилган эди.
The New York Times мақоласида ёзилишича, 1960 йилда америкалик олим Алан Фрей инсон мияси микротўлқинларни товуш ўлароқ қабул қилишини аниқлаган.
Бунинг ортидан АҚШ ҳам, Совет Иттифоқи ҳам микротўлқинлардан қурол сифатида фойдаланиш устида бош қотирган.
АҚШ Мудофаа разведка агентлиги 1976 йилда совет олимлари тадқиқотлари натижалари микротўлқинлар ҳарбийлар ва дипломатлар хулқ-атворига салбий таъсир кўрсата олишини кўрсатгани ҳақида огоҳлантирган.
АҚШ қуролли кучлари ҳам микротўлқинлардан қурол ўлароқ фойдаланиш устида ишлаган. The New York Times мақоласида эътироф этилишича, АҚШ ҳаво кучлари душман бошига англаш мумкин бўлган гапларни йўналтиришга қодир мосламани патентлаган.
