Украина президенти сайловининг биринчи даврасида энг кўп овоз тўплаган қизиқчи ва шоумен Владимир Зеленский ўз сайловолди кампаниясида муайян ваъдаларни қилмай келмоқда.
Аммо бу украиналиклар уни президент этиб сайламайди, дегани эмас.
Украиналиклар учун жорий президент, Зеленскийнинг рақиби Петро Порошенко олигархлар рамзига айланган.
Зеленский эса, Порошенконинг душмани олигарх Коломойскийга алоқадор бўлишига қарамасдан, ўзини олигархлардан узоқ, “халқ номзоди” ўлароқ кўрсатиб келади.
Исроилда яшаши айтиладиган Коломойский Зеленскийнинг ҳажвия кўрсатувларини эфирга узатувчи телеканалнинг эгаси бўлиб, Зеленскийни сайлов кампанияси давомида тансоқчилар,
ҳуқуқшунослар ҳамда автомобиллар билан таъминлаб келади.
Аммо бугунга қадар Зеленскийнинг Коломойский билан алоқаси унинг номзодлигига салбий таъсир кўрсатгани йўқ.
Агар сайловолди сўровлар тўғри чиқса, иккинчи турда Зеленский ғалаба қозониши мумкин.
Қувноқ ва зукко Зеленский чуқур ўрнашиб олган сиёсатчилардан чарчаган украиналиклар назарида янги чеҳрадир.
Шу сабабдан у “Мени ким десангиз, ўшаман” қабилидаги кампанияни
ўтказиб келмоқда.
Лондонда фаолият юритаётган таҳлилчи Алекс Кокчаровнинг сўзларига кўра, Зеленский кўпроқ сайловчи меҳрини қозониш мақсадида атайин мужмал кампания олиб бормоқда.
Кокчаров Зеленский сайловда ғалаба қозонса, ўзгарувчан сиёсат олиб боришини башорат қилди.
Таҳлилчилар эса йирик дипломатик ва иқтисодий муаммоларга дучор бўлиб келаётган Украина учун ўзгарувчан сиёсат муаммоли бўлишини айтмоқда.
Хизмат фаолиятини шоколад саноатида бошлаган Порошенко эса ўзини катта сиёсий тажрибага эга матонатли етакчи ўлароқ кўрсатиб келади.
Ўтган ҳафтада сиёсатга энди кириб келаётган шахсни президент этиб сайлашдан ҳадиксираётган украиналикларни тинчлантириш мақсади Зеленский сайлов кампанияси ўз дастурини эълон қилди.
Аммо Зеленский платформасида муайян сиёсатлар ўрнига номзоднинг қадриятлари ҳақида кўпроқ ёзилган.
Шунга қарамасдан, Зеленсий сайлов кампанияси давомида айрим муҳим
масалаларда ўз қарашларини маълум қилган.
Зеленский сайлов кампанияси маслаҳатчиларидан бири, Коррупция олдини олиш миллий агентлик собиқ ходими Руслан Риабошапка Зелекснкий ғалаба қозонса, фаолиятини энг аввало чуқур илдиз отган коррупцияга қарши курашдан бошлашини таъкидлади.
Зеленский, шунингдек, Украина шарқида Россия дастаклаб келаётган айирмачиларга қарши урушни тўхтатиш учун шахсан Россия президенти Владимир Путин билан музокара олиб боришни ваъда қилган.
Аммо яқинда берган интервьюларидан бирида у Украинанинг ҳудуди ёки
фуқароларини қурбон қилишга рози бўлмаслигини таъкидлади.
Порошенко эса Зеленский Украинани Россиядан ҳимоя қила олмаслигини айтиб келади.
Яқинда Зеленский Ғарб воситачилигида Киев ва Москва ўртасида имзоланган Минск келишувини қўллашини изҳор қилди.
Порошенкодан фарқли ўлароқ, Европа Иттифоқи билан яқиндан алоқалар ўрнатиш масаласида Зеленский эҳтиёткорлик билан сўзлаб келади.
Хусусан, номзод Европа билан интеграция масаласини референдумлар орқали Украина халқи ҳал қилиши кераклигини айтиб келади.
Бундан ташқари, рус ва украин тилларида сўзлашувчи Зеленский Порошенко ҳукумати рус тилига қўйган чекловларни танқид қилиб келади.
Аммо буларнинг барчаси мужмал ваъдаларгина бўлиб, мутахассисларни хавотирга солмоқда.
