Линклар

Шошилинч хабар
20 октябр 2019, Тошкент вақти: 05:47

Имон Каримова ўзбекистонликларни онасини озод қилиш ташаббусига қўшилишга чақирди


Имон Каримова Instagramдаги бу саҳифа ўзиники эканини тасдиқлаган¸ аммо унга қўйилаëтган матнларни бошқалар ëзиб бераëтганини айтган.

Ички ишлар вазирлиги Жазони ижро этиш бош бошқармаси 7 июлдан 10 июлгача Гулнора Каримова қамоқхонада қизи Имон Каримова билан узоқ муддатли учрашув ўтказгани ҳақида маълум қилди.

Вазирликнинг билдиришича, учрашувдан сўнг Имон Каримова билан суҳбат ўтказилган.

“У онаси Гулнора Каримованинг айни пайтда соғлигидан шикояти йўқлигини,зарур ҳолларда муассаса тиббиёт бўлими ходимлари томонидан ўз вақтида алоҳида эътибор қаратилаётганини, онасига нисбатан Ўзбекистон ҳукумати томонидан ҳеч қандай босим ўтказилмаётганини билдирди”, дейилади Жазони ижро этиш бош бошқармаси билдирувида.

Имон Каримова аввалроқ Instagram мессенжеридаги Iman.k17 саҳифасида қамоқда онаси билан кўришганини, айни пайтда Гулнора Каримованинг соғлиғи ёмонлашиб, аҳволи оғирлигини ёзган эди.

Жазони ижро этиш бош бошқармаси баёнотида айтилишича, Имон Каримова Iman.k17 саҳифаси ўзига тегишли эканини, бироқ “онаси билан боғлиқ материааллар ушбу саҳифага бошқа шахслар томонидан тайёрланишини маълум қилган”.

Айни пайтда Имон Каримова онаси билан учрашувидан сўнг Instagram саҳифаси орқали президент Шавкат Мирзиëевга мурожаат қилди.

"Бугун онамни кўрдим. Ҳар куни ишемия ( бирор аъзо ëки тўқималарга қон етишмаслиги - таҳр.) хуружи бўлаяпти. Айниқса¸ гипертоник криз (қон босимининг тўсатдан кўтарилиб кетиши - таҳр.) ортидан пролактин кескин кўтарилиб кетди¸ бу эса мияда гипофиз ўсмасига олиб келади"¸ деб бошланади Имон Каримова саҳифасида эълон қилинган хат.

Онасининг оғир аҳволда эканини тасвирлаган Имон Каримова¸ Мирзиëевдан зудлик билан операцияга муҳтож онасини озодликка чиқаришни сўрайди.

Бу хати сўнггида Имон Каримова¸ онаси тақдирига бефарқ бўлмаган ўзбекистонликлардан Гулнора Каримовани озод қилиш ташаббусига қўшилишни сўраган.

Олий суд ҳар ой "аëлларга жазони либераллаштириш дастурингизга мувофиқ" хотин-қиз маҳбусларни озод этмоқда¸ деган Ислом Каримовнинг невараси¸ жорий президентдан онасига реабилитация имкони беришни сўрайди.

2 июль куни Ўзбекистон марҳум президентининг невараси Имон Каримова ўз Instagram саҳифасида онаси ва Тошкент ҳукумати ўртасидаги муносабатларнинг жорий аҳволига оид янги тафсилотларни очиқлаган эди.

Instagram Storyга қўйилган рус тилидаги уч бетлик хатида Имон Каримова онасининг Тошкент вилояти Зангиота туманида жойлашган 21-сонли аëллар қамоқхонасидаги аҳволининг кун сайин оғирлашаëтганини иддао қилган.

Шундан сўнг Адлия вазирлиги Гулнора Каримова сақланаётган Зангиотадаги 21 -аёллар қамоқхонасида текширув ўтказилгани, аммо Каримованинг саломатлигига оид иддаолар тасдиқланмаганини билдирган эди.

Шарҳларни кўринг (34)

Бу форум ёпилган
XS
SM
MD
LG