Линклар

Шошилинч хабар
23 август 2019, Тошкент вақти: 18:28

Халқаро янгиликлар

Қирғизистон: Собиқ президент Алмазбек Атамбаев учинчи марта сўроққа чақирилди

Қирғизистоннинг собиқ президенти Алмазбек Атамбаев тарафдорлари орасида.

Қирғизистон Ички ишлар вазирлиги собиқ президент Алмазбек Атамбаевга учинчи марта чақирув қоғозини йўллади. Ҳужжатга мувофиқ, Атамбаев сўроққа 19 июль куни эрталаб келиши лозим.

Чақирув қоғози Атамбаев истиқомат қиладиган Қўйтош қишлоғига олиб борилиб, собиқ президент уйи олдида халқ штаби бошлиғи Кияз Смаиловга топширилган. Аввалроқ ИИВ Атамбаевни икки марта сўроққа чақирган, аммо иккала сафар ҳам у терговга боришдан бош тортган.

Собиқ президентнинг адвокати Сергей Слесаревга кўра, ИИВнинг Алмазбек Атамбаевни сўроққа чақиришга оид хати қонунга зид, чунки у ҳамон дахлсизлик мақомига эга. Слесарев ўз фикрини исботловчи барча далилларни икки марта ёзма кўринишда Ички ишлар вазирлигига жўнатган.

ИИВ матбуот хизмати Озодлик радиоси қирғиз шўъбасига “тергов хизмати барча ишни қонунчилик доирасида амалга ошириши”ни маълум қилган.

Қирғизистон парламенти 27 июнь куни Алмазбек Атамбаевни дахлсизлик мақомидан маҳрум этиш юзасидан овоз берган, бу эса ҳуқуқ-тартибот идораларига уни жиноий жавобгарликка тортиш учун имкон яратади.

Депутатлар комиссияси Атамбаевга қарши олти айбловни илгари сурган. Бош прокуратура улардан бештасини асосли, деб топган.

Алмазбек Атамбаевнинг ўзи бу айбловлар сиёсий сабабга эга эканини урғуламоқда. Собиқ президентнинг Қўйтош қишлоғидаги уйида тарафдорлари Атамбаевни қўллаш штабини тузганлар.

Кун янгиликлари

Россия билан Украина бир-бировига 33 нафардан фуқаросини топширади

Россия қўлга олган украиналик денгизчилар устидан суд мажлиси ўтмоқда. 2019, 16 август.

Россия Украинага 33 украиналикни, Украина эса Россияга 33 россияликни топшириш тўғрисида томонлар келишиб олди.

РБК нашрининг бу хабарини Кремль матбуот котиби Дмитрий Песков тасдиқлар экан, Москва билан Киев ҳар икки томонда ҳисбда ушлаб турилган кишиларни айирбошлашга оид масалалар муҳокама қилинаётганини билдирди.

РБК нашрининг ўз манбаларига таяниб хабар қилишича, маҳбусларни айирбошлаш масаласини шахсан президент Зеленский назорат қилмоқда. Украина президенти учун ўтган йилнинг ноябрида Қрим ярим ороли соҳилида Россия томонидан қўлга олинган украиналик денгизчилар масаласи муҳим эканлиги айтилди.

Россияда ушлаб турилган украиналикларни ватанга қайтариш мавзуси Владимир Зеленскийнинг сайловолди дастуридаги энг муҳим пунктлардан бири эди.

Қозоғистонда Суриядан олиб келинган аёл беш йилга озодликдан маҳрум қилинди

Ақмарал Алмагамбетова суд залида. Ақтўбе, 2019, 22 август.

Ақтўбе шаҳар суди 22 август кунги мажлисида Суриядан олиб келинган 32 яшар Ақмарал Алмагамбетовани ватанида терроризмни тарғиб қилиш ва нифоқ қўзғашда айбдор деб топди, ҳамда уни беш йил муддатга умумий режимдаги колонияга ҳукм қилди.

Қозоғистон махсус хизматларининг амалиёти доирасида Яқин Шарқдан эвакуация қилинган Алмагамбетова 2014 йили ҳуқуқбузарлик содир этганликда айбланди.

Тергов ва айбловчиларнинг маълум қилишича, Алмагамбетова 2013 йил августида Қирғизистонда, у ердан эса Туркияга, сўнг Сурияга йўл олган. У болаларини эри Мирболат Жаманқуловга топширган, у Қозоғистонни тарк этишидан бир неча ой аввал эридан “шариат бўйича” талоқ олган.

2014 йилда Алмагамбетова оиласи билан алоқага чиққан ва Яқин Шарқдаги можаролар юз бераётган минтақада эканлигини маълум қилган. Жиноий иш материалларига кўра, у Жаманкуловга бир нечта аудио- ва видеохабарлар юборган, бу хабарларга “Ислом давлати” экстремистик гуруҳининг “ғоялари тарғибот”қилинган.

Алмагамбетова Қозоғистонга Сурияда туғилган икки нафар ёш боласи билан бирга олиб келинди. Ҳар икки болани давлат васийликка олди. Адвокат Назгуль Дуйсенбекованинг айтишича, ҳукм ўқилаётганида унинг қариндошларидан ҳеч ким иштирок этмади. Ҳукм ҳозирча кучга кирмади.

«Жусан» амалиёти доирасида Яқин Шарқдан 516 киши, жумландан 360 бола Қозоғистонга олиб келинди.

Apple, Google ва Mozilla Қозоғистоннинг Qaznet иловасини блоклашини билдирди

Иллюстратив сурат.

Apple, Google ва Mozilla Қозоғистон ҳукумати топшириғи билан ишлаб чиқилган Qaznet иловасини блоклаш учун чоралар кўради. Бу ҳақда мазкур гигант ширкатлар 21 август куни ўз баёнотларини тарқатдилар.

Qaznet иловасига қарши бўлаётганларнинг фикрича, мазкур илова воситасида ҳукумат фойдаланувчиларнинг барча қадамларини назорат қилишга муваффақ бўлади. Мазкур иловани Қозоғистондаги ҳар бир фойдаланувчи юклаб олишга мажбурдир.

Июль ойидан бошлаб қозоғистонлик интернет фойдаланувчиларга алоқа операторлари томонидан Qaznet иловасини смартфонлар, компьютерлар ва бошқа ускуналарга юклаб олиш тўғрисидаги огоҳлантирувлар келмоқда.

Apple, Google ва Mozilla Qaznet иловасига қарши “техник чоралар” қўллаганликларини маълум қилдилар. Жумладан, Google ва Mozilla ўзларининг Chrome ва Firefox қидирув тизимлари Qaznet иловасини блок қилишини билдирди.

Apple ўзининг Safari браузеридан фойдаланаётганларни ҳам Qaznetдан ҳимоя қилиш чораларини кўраётганини маълум қилди.

Россия ўзининг биринчи гуманоид роботини коинотга учирди

Фёдор роботи синовдан ўтказилаётган пайт.

Россия 22 август куни коинотга биринчи марта гуманоид роботни учирди. Фёдор деб номланувчи робот учувчисиз бошқариладиган “Союз” фазо кемасида Қозоғистоннинг Бойқўнғир космодромидан учирилди.

Робот шу куниёқ коинотдан туриб ўзининг биринчи твитини ёзди. Ўз твитида робот Парвозларни бошқариш марказига ракета тизимларининг фаолияти ва бошқа техник маълумотларни жўнатган.

Фёдор учган фазо кемаси 24 август куни Халқаро коинот станциясига уланади. Мазкур станцияда робот 7 сентябргача қатор тажрибаларни ўтказади ва ерга қайтади.

Гуманоид роботнинг бўйи 1,8 метр, оғирлиги 160 кило. Робот учун Инстаграм ва Твиттерда махсус аккаунтлар очилди.

Польша ва Словакияда яшин уриши оқибатида камида беш одам ўлди

Яшин урганларни қутқариш амалиёти.

Польша ва Словакия чегарасидаги Татра тоғида яшин уриши оқибатида камида беш киши, жумладан, икки нафар бола ҳалок бўлди.

22 августда тарқатилган расмий маълумотда айтилишича, қурбонларнинг асосий қисми польшаликлардир. Улар Гевонт чўққисига урилган яшиндан ўлганлар. Словакия томонида эса бир одам ҳалок бўлган.

Яшин уриши оқибатида юздан ортиқ одам жароҳат олгани айтилмоқда. Мазкур тоғ ҳудуди сайёҳларнинг севимли масканларидан биридир.

Польша Бош вазири Матеуш Моравецкий жароҳатланганлардан айримларининг аҳволи ўта оғирлигини айтмоқда.

Германияда одам ўлдирган суриялик қочқин судланди

Германияликнинг ўлдирилиши ортидан Хемницда тартибсизликларга айланиб кетган норозилик намойиши ўтказилган эди.

Германиянинг Дрезден шаҳрида Хемниц вилоят суди маҳаллий аҳолига ҳужум қилганликда айбланган суриялик қочқинга нисбатан ҳукм ўқиди.

-Айбланувчи олдиндан режалаштирилмаган қотилликда ва оғир тан жароҳатларини етказишда айбдор, деб топилди. Шунинг учун у тўққиз йил олти ойга қамоқ жазосига ҳукм қилинди,- деб билдирди суд расмий вакили Петра Кюршнер.

2018 йилнинг 26 август куни 35 ёшли германиялик эркакнинг ўлдирилиши ортидан Хемницда тартибсизликларга айланиб кетган норозилик намойиши ўтказилган эди.

Германия фуқаросини ўлдирганликда айбланиб Ироқ ва Суриядан келган икки қочқин қўлга олинган.

2018 йил 27 август куни ўтказилган намойишда иштирок этган миллатчилар Германиядан хорижликларни депортация қилишни талаб қилганлар.

Намойиш пайтида норозилар юз кўринишидан осиёлик қочқинларга ўхшаган одамларни калтаклаганлар ва полиция билан тўқнашганлар. Бир неча одам жароҳатлангани хабар қилинди.

Германия канцлери Ангела Меркель Хемниц шаҳрида миллатчилар томонидан мигрантларга қарши ўтказилган намойишларни қоралади.

Эрон янги ракета комплексини намойиш қилди

Bavar-373 ҳаво ҳужумидан мудофаа тизими

Эрон узоқ масофали ракета ҳужумидан мудофааланишга имкон берувчи янги тизимини ишга туширди. Bavar-373 деб номланувчи мудофаа тизими 22 август куни Эрон миллий мудофаа саноати куни муносабати билан Теҳронда намойиш қилинди. Тадбирга қатнашган президент Ҳасан Руҳоний Эронга отилган ракеталар уриб туширилади, деб баёнот берди.

- Ракета учирадиган жаноб, агар қўлингдан келса, тугмани бос ва ракетанинг осмонда ўзини йўқ қилиши учун йўл оч, - деди Руҳоний.

Эрон янги комплексини Теҳрон билан Вашингтон ўртасидаги муносабатлар таранглашган бир пайтда намойиш қилди.

Трамп 2015 йилда Вашингтон Теҳроннинг ядровий дастури бўйича Эрон билан тузилган халқаро шартномадан чиқишини эълон қилганидан бери икки давлат муносабатлари кескинлашиб бормоқда.

Санкциялар туфайли Эрон иқтисоди жиддий муаммоларга дучор бўлди. Трамп Эрон билан музокара олиб боришга тайёр эканлигини изҳор қилган, аммо Теҳрон музокара бошлашдан аввал санкциялар бекор қилинишини талаб қилиб келади.

Қирғизистон собиқ бош прокурорига айблов эълон қилинди

Собиқ бош прокурор Индира Жолдубаева

Собиқ бош прокурор Индира Жолдубаевага криминал авторитет Азиз Батукаевнинг қамоқдан ноқонуний озод қилиниши юзасидан олиб борилаётган тергов доирасида айблов эълон қилинди. ИИВ матбуот хизматига кўра, Жолдубаева Жиноят кодексининг "Коррупция" моддасида назарда тутилган жиноятни содир этганликда гумон қилинмоқда.

Бишкек шаҳар Биринчи май туман суди Жолдубаевага нисбатан эҳтиёт чораси сифатида уй қамоғини белгилади.

Индира Жолдубаева 2015 йил январидан 2018 йил апрелига қадар бош прокурор лавозимини эгаллаган. Унга қадар 2011 йилдан ҚР президенти аппаратининг суд ислоҳотлари ва қонунчилик бўлими мудири лавозимида ишлаган.

2013 йилнинг 9 апрелида Норин шаҳар суди шифокорларнинг Азиз Батукаев “бедаво касалликдан азият чекаётгани” тўғрисидаги хулосасига кўра, жиноий авторитетни муддатдан аввал озод қилиш тўғрисида қарор қабул қилган эди.

2019 йил бошида унинг ноқонуний озод қилиниши юзасидан тергов ишлари бошланди, ҳамда юқори лавозимли собиқ амалдорлар - собиқ соғлиқни сақлаш вазири Динара Сагинбаева, Норин вилояти прокурорининг собиқ ўринбосари Майрамбек Акматалиев, Бош вазирнинг собиқ ўринбосари Шамиль Атаханов, собиқ бош прокурор Аида Саляновалар ҳибсга олинди.

Айни дамда амалдорларнинг ҳаммаси уй қамоғида. Мудофаа кенгашининг собиқ котиби Бусурманкул Табалдиевга нисбатан қидирув эълон қилинган.

Собиқ президент Алмазбек Атамбаевга нисбатан қўйилган айбловлар орасида Азиз Батукаевнинг иши ҳам бор.

Трамп Гренландияни сотмаслигини билдирган Данияга расмий ташрифини бекор қилди

Гренландия манзараси.

Дания Бош вазири Метте Фредериксен АҚШ президенти Дональд Трамп сентябрда бу мамлакатга қиладиган расмий ташрифини бекор қилганидан афсус билдирди.

Трамп Твиттер саҳифасида Дания АҚШга Гренландияни сотмаслигини билдиргани ортидан мана шундай қарор қабул қилгани ҳақида ёзди.

-Гренландияни сотиш имкониятлари бўйича баҳслар пайдо бўлди. Гренландия Бош вазири Ким Кильсен бу таклифни кескин рад этди ва бу позицияни мен ҳам қўллаб-қувватлайман. Аммо бу масала АҚШ билан муносабатларимизга таъсир кўрсатмаслиги лозим,- деди Метте Фредериксен.

Аввалроқ матбуотда Трамп ўз маслаҳатчилари ва Оқ Уй расмийлари билан Гренландияни сотиб олиш истиқболларига қизиқаётгани тўғрисида хабарлар пайдо бўлган эди.

Гренландия Даниянинг мухтор вилояти ҳисобланади ва орол ҳудуд жиҳатидан Дания қироллигидан салкам 50 баробар катта бўлса-да, бу ерда доимий равишда атиги 56 минг киши истиқомат қилади.

Гренландияни сотиб олиш ғояси - янги эмас. 1867 йилда АҚШ Россиядан Аляскани сотиб олганида Давлат департаменти Гренландия ва Исландияга эгалик қилиш имкониятларини ҳам ўрганиб чиққан эди. Аммо иш битимгача етиб бормаган.

Иккинчи жаҳон урушидан кейин Гренландиянинг стратегик аҳамиятини эътиборга олган президент Гарри Труман орол учун Данияга 100 миллион доллар таклиф қилган. Копенгаген рад жавобини берган эди. Бироқ Гренландияда АҚШнинг энг шимолдаги ҳарбий-ҳаво базаси бор.

Германия ва Британия Россияни "Катта еттилик" саммитига чақирилишига қарши

"Катта еттилик" йиғилишларидан бирида олинган сурат.

Германия ва Британия 2020 йилда Россияни “Катта еттилик” саммитига чақириш таклифини рад этди.Мазкур таклиф Франция ва АҚШ ҳукуматлари томонидан киритилган эди.

-Солсбери ва Уильтширда бўлиб ўтган воқеалар, яъни Британия ерида Россия томонидан кимёвий қурол ишлатилгани, Украинада Россия айби билан беқарорлик давом этаётганидан келиб чиқсак, мен Германия канцлери Ангела Меркель фикрига тўлиқ қўшиламан. Россия “Катта етилликка” қайтиши учун ҳали жуда кўп ишларни қилиши керак,-деди Британия Бош вазири Борис Жонсон.

Аввалроқ Франция ва АҚШ Россияни 2020 йилда Нью-Йоркда ўтадиган “Катта еттилик” саммитига таклиф қилишга келишиб олгани хабар қилинганди. Айниқса президент Трамп Россияни бу каби анжуманларда кўришни кўпроқ истамоқда.

Президент Владимир Путин аввалроқ “Катта саккизлик” мулоқоти бугунги кунда мавжуд эмаслигини ва шунинг учун Россияни бу мулоқот доирасига қайтариш самарасиз ҳаракат эканини айтган.

“Катта саккизлик” 2014 йилда АҚШ, Британия, Франция, Италия, Канада, Германия ва Япония Сочидаги саммитга келишдан бош тортгани оқибатида тарқалиб кетган эди. Мазкур давлатлар “Катта еттилик”ка асос солганлар.

Жорий йилда “Катта еттилик” саммити 24-26 август кунлари Францияда ўтказилади.

Дональд Трамп Россиянинг G7 га қайтиши "ўринли" бўлади деб ҳисоблашини билдирди

Владимир Путин Жорж Буш билан G8 саммитида. Санкт-Петербург, 2006, 19 июль.

АҚШ президенти Дональд Трамп сешанба куни Россиянинг "Катта еттилик"ка (G7)ка қайтиши "ўринли" бўлур эди деб баёнот берди.

“Катта еттилик”ка АҚШ, Буюк Британия, Германия, Италия, Канада, Франция ва Япония киради.

АҚШ маъмурияти вакилига таянган ҳолда CNN телеканалининг маълум қилишича, Трамп ва Франция президенти Эммануэль Макрон телефон орқали суҳбатларида Россия 2020 йилда бўлиб ўтадиган “еттилик” саммитида иштирок этишга таклиф қилиниши кераклигини айтишган. Бундан аввал Россия президенти Владимир Путин билан бўлиб ўтган учрашувда Макрон, агар Украина инқирозини барқарорлаштириш бўйича керакли қадамларни ташлагудек бўлса Россияни музокаралар столида кутишини айтган эди.

Шу кунларда Францияда G7нинг навбатдаги саммити бўлиб ўтади, бу тадбирга Россия таклиф қилинмаган. Россиянинг гуруҳга (у вақтда "Катта саккизлик" деб аталарди) аъзолиги Қрим аннексияси туфайли 2014 йилда тўхтатилган эди.

"Менинг фикримча, бу катта саккизлик бўлиши керак, чунки биз муҳокама қиладиган кўп масалаларнинг Россияга алоқаси бор”, – деди президент Трамп.

Бу Россиянинг бу ташкилотга қайтарилиши лозимлиги борасидаги Трампнинг биринчи фикрлари эмас. 2018 йилнинг июнь ойида Трамп Москвага мурожаат қилиб, G7 нинг Канадада бўлиб ўтадиган саммитида иштирок этишга чақирган эди. Ўшанда Кремль матбуот котиби Дмитрий Песковбаёнот бериб, Россия бошқа форматларга мойиллик билдиришини айтган эди. Аммо орадан икки кун ўтиб президент Владимир Путин баёнот берар экан, Россия гуруҳ аъзоларини Москвада қабул қилишдан хурсанд бўлишини таъкидлаган эди. Трампнинг таклифи таниқли америкалик сиёсатчилар томонидан танқид билан кутиб олинди.

Жаҳонда иқтисодий ва молиявий улуши катта бўлмаслигига қарамай Россия G7 га 1997 йилда АҚШ президенти Билл Клинтон ва Буюк Британия бош вазири Тони Блэр таклифи билан қабул қилинган эди. Бу гуруҳга Россиянинг аъзолиги демократик Россияга нисбатан дўстона муносабат сифатида кўрилган ва унинг бозор иқтисодиёти ва демократик институтларининг бундан кейинги ривожланишини қўллаб-қувватлаш ва имкониятларини тан олиш сифатида кўрилган эди. Унинг G8 аъзолигининг тўхтатилиши ва санкциялар жорий қилиниши Россиянинг Қримни аннексия қилишига нисбатан биринчи жавоб сифатида кўрилган эди.

Афғонистонда тўйга қилинган ҳужум қурбонлари сони 80 нафардан ортди

17 август куни ҳужум қилинган тўйхонада олинган сурат. Кобул, 2019, 18 август.

Афғонистон Ички ишлар вазирлиги матбуот хизмати вакили Насрат Раҳимий худкуш ҳужумидан ҳалок бўлганлар сони 80 нафардан ортганини маълум қилди.

17 август куни кечқурун Кобулдаги тўйхонада содир этилган худкуш ҳужум оқибатида 63 киши қурбон бўлган ва 182 киши яраланган эди.

Толибон бу ҳужумга алоқаси йўқлигини эълон қилган. Бироқ Ашраф Ғани Толибонни “ваҳшийларча” ҳужумга камида шерик, деб атади.

Айрим хабарларда айтилишича, ҳужум учун масъулиятни "Ислом давлати" гуруҳининг Афғонистондаги шўъбаси ўз зиммасига олган.

Бу жорий йилдаги энг кўп одам ўлган террор бўлди.

Камерунда ўғирланган денгизчиларнинг тирик экани маълум бўлди

"Мармалайта" юк ташувчи кемаси.

Камерун қирғоқларида номаълум одамлар томонидан ўғирланган “Мармалайта” кемаси экипажи соғ-саломат. Бу ҳақда кема хўжайини билан алоқа ўрнатган қароқчилар гуруҳи маълум қилди.

Россия денгизчилар касаба уюшмасининг билдиришича, "Мармалайта" кемасига ўтган ҳафтада ҳужум қилинган.

Қароқчилар томонидан гаровга олинган 8 денгизчидан уч нафари Россия, тўрт нафари Филиппин ва бир нафари Украина фуқаросидир.

ТАССнинг хабар беришича, қароқчилар гаровга олинганларни озод қилиш учун товон пули миқдорини ҳозирча эълон қилмаганлар. Камерун расмийлари қароқчилар алоқага чиққани тўғрисидаги маълумотни ҳали тасдиқлаганлари йўқ.

Новости агентлиги ўғирланган денгизчилар Нигерияда сақланаётган бўлиши эҳтимолини билдирди.

"Мармалайта" юк ташувчи кемасига 15 август куни Дуала порти яқинида ҳужум қилинган эди. Мазкур кема Германия ширкатига қарашли. У Антигуа ва Барбуди байроғи остида сузган.

Дональд Трамп Кашмир масаласида воситачи бўлишга тайёрлигини билдирди

Кашмир чегарасидаги ҳарбийлар.

АҚШ президенти Дональд Трамп Кашмирдаги “портловчи вазият”нинг олдини олиш мақсадида Ҳиндистон ва Покистон ўртасида воситачилик қилишга тайёр. Трамп бу ҳақда 20 август куни эълон қилди.

Трампнинг билдиришича, у бу масалани Францияда ўтадиган "Катта йигирматалик" саммити доирасида Ҳиндистон Бош вазири Нарендра Моди билан муҳокама қилади.

Ҳиндистон 5 август куни Кашмирнинг ўзига қарашли қисмида минтақанинг мухторият мақомини бекор қилганидан сўнг вазият кескинлашган эди.

20 август куни Ҳиндистон Кашмирда Покистон ҳарбийлари бир ҳинд аскарини отиб ўлдиргани, тўрт нафарини яралаганини билдирган. Покистон ҳам Ҳиндистон ҳарбийларини аҳолига ўқ узганликда айбламоқда.

-Ҳиндистондан олинаётган маълумотлардан келиб чиққан ҳолда, Покистон доимо сергак бўлиши керак, мудофаага тайёргарликни тезлатиш лозим. Ҳиндистон Озод Кашмирни (Кашмирнинг Покистонга қарашли қисми-муҳаррир) тинимсиз ўққа тутмоқда. Мендаги маълумотга қараганда маҳаллий аҳолидан 35 киши ҳалок бўлди, юзлаб одам яраланди,-деб баёнот берди 20 август куни Кашмирнинг Покистонга қарашли қисми раҳбари Сардор Маъсуд Хон.

Путинни ҳақорат қилган грузин журналисти ишдан бўшатилди

"Рустави-2" телеканалининг эндиликда собиқ журналисти Георгий Габуния.

Россия президенти Владимир Путинни жонли эфир пайтида ҳақорат қилган Грузиянинг "Рустави-2" телеканали журналисти Георгий Габуния ишдан бўшатилди. Бу ҳақда телеканалнинг янги раҳбари Паати Сали Тбилисида ўтган брифингда маълум қилди.

Бундан ташқари телеканал янгиликлар хизмати раҳбари Нодар Меладзе ва унинг қўл остидаги қатор ходимлар ҳам ишдан бўшатилган. Телеканал уларни рекламаларни иш берувчи манфаатларига зид равишда бўлиштирганликда айбламоқда.

Грузиянинг мухолифатчи «Рустави-2» телеканали мухбири Георгий Габуния 7 июлда жонли эфирда Россия президенти Владимир Путин ва унинг ота-онасини ҳақорат қилган эди. Шу куни юзлаб одам телеканал олдига тўпланиб, норозилик намойиши ўтказган. Журналист икки ойга эфирдан четлаштирилган.

Грузия президенти Саломе Зурабишвили, Тбилиси мэри Кахи Каладзе, Бош вазир Мамука Бахтадзе журналист Габуниянинг чиқишини “фитна” сифатида баҳоладилар.

Ҳонконг ҳокими норозиларни муросага келишга чақирди

Ҳонконг ҳокими Кэрри Лэм.

Ҳонконг ҳокими Кэрри Лэм норозиларни муросага келиш учун музокаралар ўтказишга чақирди.

-Бизнинг мақсадимиз ўзаро келишмовчиликлар ва конфликтларни ҳал этиш устида жонкуярлик билан ишлашдир. Биз ўзаро мулоқот орқали бир-биримизни тушуниб, юзага келган ижтимоий тупикдан биргаликда чиқишимиз лозим,-деди Лэм 20 август куни қилган чиқишида.

Ҳонконгда қонунни бузган ҳонконгликларни Хитойга экстрадиция қилишга рухсат берувчи қонун лойиҳасига қарши намойишлар 9 июнда бошланган ва шу кунгача тўхтамаяпти.

1842 йилдан бери Британия бошқарувида бўлган Ҳонконг 1997 йилда Хитой тасарруфига ўтказилган. Ўшанда Хитой Ҳонконг суд ва ҳуқуқ тизимига камида 50 йил мустақил бошқарув берилишини кафолатлаган. Бироқ сўнгги йилларда Хитой бу ваъдасини эсидан чиқармоқда ва мухторият ишларига аралашмоқда.

Ҳонконгда сўнгги марта бу каби йирик намойиш 2014 йилда бўлиб ўтганди. Ўшанда шаҳар аҳолиси Пекиннинг Ҳонконг маҳаллий ҳокимиятига ўтказилган сайловни ўз назоратига олиш уринишига қарши норозилик билдирган. 2014 йилнинг 28 сентябрида бошланган бу намойиш 79 кун давом этганди.

Facebook ва Twitter Ҳонгконг намойишларини дискредитация қилган Хитой акаунтларини ўчирди

Facebook асосчиси ва бошқарувчиси Марк Цукерберг.

Twitter ижтимоий тармоғи маъмурияти¸ ўтказилган ички суриштирув хулосасига кўра¸ 936 та акаунтни ўчиришга қарор қилганини эълон қилди.

Айтилишича¸ Хитой ҳукуматига бориб тақалган бу акаунтлар Ҳонгконгдаги норозилик намойишлари ва уларда қўйилган талабларнинг қонунийлигини шубҳа остига олиш орқали Ҳонгконгдаги сиëсий можарони мувофиқлаштирилган ҳолда кучайтириш билан шуғулланган.

Хусусан¸ давлат кўмагида ишлаган бу акаунтлар Ҳонгконгдаги намойиш қатнашчиларини зўравонлик ва вандализмда айблаш орқали¸ уларни дискредитация қилишга уринган.

Айни пайтда¸ Facebook тармоғи ҳам айни шундай асосда бешта акаунт¸ етти саҳифа ва учта гуруҳни ўчирди. Бундай саҳифалардан биттасида¸ 15 мингдан ошиқ фоловери бўлгани айтилмоқда.

Ҳонгконг ўз фуқароларини Хитойга экстрадиция қилишга рухсат берувчи қонун лойиҳасини қабул қилгани ортидан бошланган норозилик намойишлари бир неча ойдан бери давом этмоқда.

Намойишчилар¸ бу қонун ҳонгконглик диссидентларни Хитой қўлига топширишга асос яратишига норозилик билдирмоқда.

Миллионлаб одам қатнашаëтган бу намойишлар ортидан Ҳонгконг раҳбарияти қонунни кучга киритишни кечиктирди¸ аммо ундан ҳозирча расман воз кечганича йўқ.

Бишкек суди собиқ президент Атамбаевни 26 октябрга қадар ҳибсда сақлашга қарор қилди

Қирғизистон собиқ президенти Алмазбек Атамбаевни ҳибсда сақлаш муддати 26 октябрга қадaр узайтирилди.

Бишкек шаҳар Биринчи Май район суди 20 август куни терговчиларнинг ҳибс муддатини узайтириш сўровини қондирди. Дастлабки суд Атамбаевни 26 августгача судга қадар ҳибсда сақлаш ҳақида қарор чиқарган эди.

Атамбаевнинг адвокати Замир Жоошев¸ ҳибс муддати узайтирилгани устидан юқори инстанцияга шикоят киритажагини билдирди.

Ички ишлар вазирлигининг уч марта сўроққа чақирув талабини инобатга олмаганидан сўнг Бишкек ҳукумати собиқ президентни ҳибсга олишга қарор қилган ва Атамбаев¸ икки кунлик қаршиликдан сўнг¸ 8 август куни полицияга таслим бўлган эди.

Атамбаев¸ 2011-2017 йиллардаги президентлиги пайтида давлат ваколатини суистеъмол қилиш билан боғлиқ бешта жиноятда айбланмоқда.

Қозоғистонда куйдирги аниқланган қишлоқ карантин қилинди

Иллюстратив сурат.

Қозоғистон Соғлиқни сақлаш вазирлиги Акмўла вилоятидаги Ольгинка қишлоғида куйдирги касаллиги аниқлангани муносабати билан мазкур ҳудудда карантин эълон қилди. Қишлоққа кириш-чиқиш йўлларига тўсиқлар қўйилиб, бу ерга келиш ва кетиш тақиқланди.

Август ойининг бошларида қишлоқда яшовчилардан тўрт нафари мол сўяётганда куйдиргига чалингани аниқланган эди.

Қишлоқ ҳўжалик вазирлиги айни пайтда Ольгино қишлоғида куйдиргига чалинган чорва моллари йўқ эканини билдирмоқда.

Ольгинка қишлоғи пойтахт Нурсултондан 80 километр олисликда жойлашган. Ижтимоий тармоқларда ҳукумат тузилмалари куйдирги билан боғлиқ сўнгги вазият тўғрисида маълумот бермаётгани қозоғистонликлар томонидан танқид қилинмоқда.

Қозоғистонда чорва моллари орқали одамларнинг куйдиргига чалиниши ҳолатлари йил сайин такрорланиб туради.

АҚШ Россия билан шартномадан чиққанидан сўнг биринчи марта қанотли ракета синовини ўтказди

Сан-Николас оролида синовдан ўтказилган ракета.

Қўшма Штатлар Россия билан бундан ўттиз йил олдин имзоланган ракеталарни тарқатмаслик шартномасидан чиққанидан бери биринчи марта ер усти қанотли ракетасини синовдан ўтказди.

Мудофаа вазирлигининг билдиришича, синов 18 август куни Калифорния штатидаги Сан-Николас оролида ўтказилган.

“Синалаётган ракета ўзининг ер усти мобил ускунасидан учиб чиқди ва 500 километр олисликдаги нишонга аниқ бориб урилди”, дейилади вазирлик баёнотида.

АҚШ 1987 йилда имзоланган Ўртача масофага учувчи ядровий ракеталарни тарқатмаслик шартномасидан расман 2 август куни чиққанини билдирган эди. Мазкур шартномага асосан 500 километрдан 5500 километргача учувчи қанотли ва баллистик ракеталарни ишлаб чиқариш тақиқланганди.

Президент Трамп 1 февраль куни Россияни шартномага амал қилмаётганликда айблаган ва АҚШ шартномадан чиқишини билдирганди.

АҚШнинг билдиришича, Россия тақиққа қарамай, SSC-8 деган ном билан танилган 9М729 ракетасини синовдан ўткизганини билдирган. Аммо Москва бу айбловларни инкор қилган.

Исроил ва Украина раҳбарлари оммавий қатлиом жойи бўлган Бабий Ярни зиёрат қилди

Исроил Бош вазири Бинямин Нетаняҳу Украина президенти Володимир Зеленский билан Киевда 19 августда учрашди.

Исроил Бош вазири Бинямин Нетаняҳу Украинага ташрифи доирасида президент Володимир Зеленский билан бирга Бабий Яр мемориалини зиёрат қилди.

Бу ерда Нетаняҳу "Бабий Яр фожиаси қайта такрорланмаслиги учун жаҳон ҳамжамияти қўлидан келган барча ишни амалга ошириши лозим", деб айтди. Зеленский ўз навтабида:

-Биз халқаро ҳамжамиятни кучларни бирлаштиришга ҳамда антисемитизм, ирқий ва миллий асосдаги нафрат кўринишларига йўл қўймасликка чақирамиз,-деб билдирди.

Иккинчи Жаҳон уруши пайтида Киев немис фашистлари томонидан босиб олинган 1941-1943 йилларда Бабий Яр нацистлар томонидан яҳудийлар ва ромалар, ҳарбий асирлар, Сирецк концлагери асирлари, украин миллатчи ташкилотлари аъзоларини оммавий равишда қатл қилиш жойига айланган эди.

Биргина 1941 йилнинг 29 ва 30 сентябрь кунлари бу ерда 34 мингга яқин яҳудий отиб ташланган. Икки йил давомида Бабий Ярда 150 мингга яқин одам қатл қилинган.

Зеленский 19 август куни Нетаняҳу билан Киевда ўтган музокаралар чоғида Исроилни Ҳлодоморни украин халқини йўқ қилиш учун уюштирилган геноцид деб тан олишга чақирди.

Макрон Путин билан Украина шарқидаги вазиятни муҳокама қилади

Россия президенти Владимир Путин ва Франция президенти Эммануэл Макрон.

19 августда Франция президенти Эммануэл Макрон Брегансон ёзги резиденциясида Россия президенти Владимир Путин билан учрашади. Сўзлашувлар чоғида Украина шарқида ҳукумат кучлари билан Россияпараст кучлар ўртасидаги тўқнашувларга барҳам бериш масаласи кўтарилиши хабар қилинди.

Бундан ташқари Эроннинг ядровий дастури ҳамда Суриядаги вазият муҳокама қилиниши айтилди.

Макрон билан Путин илк бор 2017 йили Париж яқинидаги Версаль саройида учрашган.

Жорий ой бошида Украина президенти Володимир Зеленский Владимир Путинга телефон қилиб, Донбассдаги сепаратчиларга таъсир ўтказишни сўраган эди.

Украинанинг шарқида 2014 йилдан бери давом этаётган тўқнашувларда 13 мингдан ортиқ киши ҳалок бўлди.

Нью-Йоркда 500 млн. долларлик ноқонуний сигарет ва ароқ сотаётганда ушланган аёл ўзбекистонлик экани айтилди

Бруклин

Нью-Йорк шаҳрининг Бруклин туманидаги озиқ-овқат дўконида ўтган ҳафтанинг чоршанбасида ўтказилган рейд давомида умумий қиймати 500 млн. долларлик солиғи тўланмаган тамаки маҳсулотлари ва спиртли ичимликлар мавжудлиги фош қилинди.

Бу ҳақда NewYorkPost нашри шаҳар шерифи Жозеф Фуситога таяниб хабар қилди. Шерифнинг айтишича, бундай кўп миқдордаги контрабанда маҳсулоти битта магазинда бўлиши биринчи марта аниқланган.

Ҳуқуқ-тартибот органларидаги манбанинг нашрга билдиришича, тамаки ва алкоголли маҳсулотлар сотишга лицензияси бўлмаган магазинда ўтказилган рейд давомида минерал сув шишаларига қуйилган самогон ҳам топилган.

Рейд ўтказилаётган пайтда магазинда сотувчилик қилаётган Муҳаббат Эжалолова контрабанда маҳсулотлари билан савдо қилганликда айбланмоқда.

Муҳаббат Эжалолованинг шахсига оид маълумотлар очиқланмади. Бироқ NewYorkPost хабарига эътибор қаратган АҚШдаги баъзи ўзбекистонликлар унинг ўзбекистонлик эканини айтмоқда.

Туркманистонда мактаб формаси ҳам қарзга сотила бошланди

Ашхабоддаги мактаб ярмаркаси.

Ашхабоддаги савдо марказларида ота-оналарга мактаб формасини қарзга сотиб олиш таклиф этилмоқда. Бу ҳақда "Хроника Туркменистана" нашри хабар берди.

Маълум қилинишича, савдогарлар мактаб формаси қарзга сотилиши ҳақидаги эълонларни кўп қаватли уйларнинг кириш эшикларига ёпиштириб кетмоқда. Туркманистонда бундай ҳолат биринчи марта кузатилмоқда.

“Савдогарлар зарар кўриб қолмаслик учун қарзга сотишга мажбурлар, бунга аҳоли харид қувватининг заифлашгани сабаб бўлмоқда”, дейилади хабарда.

Мактаб формаси муайян талаблар асосида ота-оналарга уч ойда тўлаш шарти билан қарзга берилмоқда. Мактаб формасининг энг арзони ўтган йили 600 манатдан сотилган эди.

Сўнгги ойларда Туркманистонда маҳсулотларни қарзга харид қилиш анъанага айланиб бормоқда.

Мамлакатда расмий курс бўйича ҳисоблаганда, ўртача ойлик иш ҳақи 228 долларни, пенсия 72 долларни, ногиронлик бўйича нафақа 100-200 долларни, бола парвариши учун оналарга бериладиган пособия 40-90 долларни ташкил қилади.

Озодлик радиоси туркман хизматининг ҳукуматдаги манбаси мамлакатда ишсизлар аҳолининг 60 фоизини ташкил этиши ҳақида билдирган.

Туркманистон ҳукумати ишсизлик бўйича расмий маълумотларни сир тутади ва мамлакатдаги иқтисодий таназзул ҳақида гапирмайди.

Собиқ Бош вазир ва амалдаги депутат Иссиқкўлни сузиб ўтди

Иссиқкўлни сузиб ўтиш мусобақасида қатнашганлар.

Қирғизистонда 18 август куни Иссиқкўлни сузиб ўтиш бўйича халқаро мусобақада собиқ Бош вазир Темир Сариев ва парламент депутати Бакитбек Турусбеков ҳам иштирок этди.

«Issyk-Kul Swim Challenge 2019» мусобақасида Қирғизистон, Қозоғистон ва Россиядан жами 22 киши иштирок этди. Улар Тўнг туманининг Қораталаа қишлоғидан Иссиқкўл туманининг Тўруайғир қишлоғигача бўлган 14 километр масофани сузиб ўтишди.

Биринчи ўринни мазкур масофани 4 соат 48 минутда сузиб ўтган Эмил Турусбеков, иккинчи ўринни эса парламент депутати Бакитбек Турусбеков эгаллади. Собиқ Бош вазир Темир Сариев маррага 11-бўлиб етиб келди.

Мусобақани уюштирган «Nomad sport» жамоат жамғармаси раиси Канат Келсинбековга кўра, жорий йилда бу мусобақа учинчи марта ўтказилмоқда. Уюштирувчилар мусобқа иштирокчилари сонини яқин йилларда 200 кишига еткизмоқчи.

Иссиқкўлнинг узунлиги ғарбдан шарққа 182 километрни, жанубдан шимолга 58 километрни ташкил қилади.

Давомини ўқинг

XS
SM
MD
LG