Линклар

Шошилинч хабар
22 октябр 2020, Тошкент вақти: 15:38

ССВ: 151 269 киши карантинда сақланмоқда. Ота-онангизни, невараларингизни қучоқламанг (Инфографика)


Коронавирусга чалинганлардан бири бу вирусни 4 нафар оила аъзосига юқтирган.

Соғлиқни сақлаш вазирлиги 6 апрель соат 16.40 да каратнитин кузатувида бўлган фуқаролар ҳақидаги маълумотни эълон қилди. Маълумотда айтилишича, 151 269 киши карантинда сақланмоқда.

Қуйидаги инфографикада бу борада тўлиқ маълумот олишингиз мумкин:

Соғлиқни сақлаш вазири Алишер Шодмонов 6 апрель куни «Ўзбекистон 24» каналида қилган чиқишида уйда ҳам қариндошлар билан кўришиш ва қучоқлашишни тўхтатиш кераклиги тўғрисида маслаҳат берди.

“Уйда бўлишнинг ҳам ўз қонун-қоидаси бор. Оилада ҳам кўришманг. Оилада ҳам қучоқлашманг. Ана шу невараларингизни, ота-онангизни қанчалик соғинган бўлсангиз-да, унинг ёнига борманг. Ҳамма билан масофада гаплашинг ва уларни сақланг”, — деди вазир.

Вазир бир бемор вирусни неча кишига ва қай тарзда юқтириши мумкинлигини тушунтирди:

1-ҳолат: "15 март куни хориждан келган ҳамюртимиз 15 нафар шахсга касалликни юқтирган. 27 март куни Андижонда касаллиги аниқланган шахсдан ота-онасига коронавирус юққан. Унинг отаси яна 36 ҳамкасбига коронавирусни ўтказган.

Ҳамкасбларидан бири 4 нафар қариндошига юқтирган. Ундан ташқари яна мулоқотда бўлганлардан 3 кишига касаллик ўтган. Бир кишидан 46 нафар одамга коронавирус тарқаган.

Афсуски бу беморимиз касаллик аломатлари кўрина бошлаганда ҳам шифокорларга хабар бермаган".

2-ҳолат: "Тошкент шаҳридаги беморимиз турмуш ўртоғи билан Туркияга бориб келган. У 8 нафар оила аъзоларига касалликни юқтирган. Уларнинг барчасини ҳозир даволаяпмиз".

3-ҳолат: "Тошкент вилоятидаги яна бир беморимиз эса 26 мартда касаллик бошланганига қарамай 5 кун давомида уйида ётган. У фақат 30 март куни шифокорларга мурожаат қилган ва уни даволашга олдик. Айни вақтда уни сунъий нафас берувчи (ИВЛ) аппаратига улаб қўйишга мажбур бўлганмиз".

4-ҳолат: "Тошкент вилоятидан бошқа бир беморимиз эса йўталиш, тана ҳароратининг кўтарилиши ва нафас сиқишига қарамай тўртта ташкилотга борган. Биз мажбур бўлдик ўша ташкилотларнинг барчасини ёпишга. Бу бемор 52 кишига касалликни юқтирган".

5-ҳолат: "Яна бир бемор учта ташкилотда ишлаётган бўлган. У сабабли 100 дан ортиқ инсонларни кузатувга олишга мажбур бўлдик. Касаллик бошланганини билгани ҳолда шунча одам билан мулоқотда бўлган".

6-ҳолат: "Яна бир фуқаромиз хорижда бўлгандан сўнг 7 нафар оила аъзосига юқтирган. У билан мулоқотда бўлган 153 шахсни кузатувда ушлаб турибмиз".

"Умумий ҳисобда 7 мамлакатдан кириб келган 123 киши ва улар билан мулоқотда бўлганлар туфайли беморлар сони 390 нафарга етди.

Энг ёмони — тўрт нафар беморимиз ким билан учрашганини сир сақлаган. Фақатгина улар билан мулоқотда бўлганларда иситма чиққандан кейин биз буни биляпмиз".

7-ҳолат: "Яна бир мисол — Туркиядан келган эр-хотинда шамоллаш белгилари бўлган. Аммо улар хориждан келганини айтмаган ва тиббиёт ходимларини чалғитган. Кейинчалик тест ўтказилиб коронавирус аниқлангандан кейин улар касални яширганларини йиғлаб тан олишди. Натижада бутун оила касалга чалинган".

XS
SM
MD
LG