Эрдўғон Путинни урушни тўхтатишга чақирди
Туркия президенти Ражаб Тоййиб Эрдўғон Россия президенти билан телефон орқали мулоқотида Россиянинг сулҳга чақирувлари “ҳарбий ҳаракатларни бир томонлама тўхтатиш ва келишмовчиликни одилона ҳал қилиш” билан мустаҳкамланиши лозимлигини айтди, дея хабар қилмоқда “Анадўлу” агентлиги Туркия президенти маъмуриятига таянган ҳолда.
Кремлнинг ушбу сўзлашувга доир хабарномасида Эрдўғоннинг даъвати ҳақида ҳеч нима дейилмаган. Хабарнома матнида Владимир Путин “Россиянинг Киев ҳукумати маълум ва бир неча бор эълон қилинган талабларни бажариши ҳамда янги ҳудудий воқеликни ҳисобга олиши шарти билан жиддий мулоқотга ҳозирлигини яна бир карра тасдиқлаган”лиги хусусида сўз боради.
Аввалроқ Россия ташқи ишлар вазири Сергей Лавров Россия Владимир Зеленский ва Жо Байден Вашингтонда муҳокама қилган “тинчлик формуласи” бўйича ҳеч бир музокараларда иштирок этмаслигини айтган эди.
Туркия лидери Россиянинг Украинага босқини оқибатларини бартараф этишда фаол иштирок этишга уриниб келмоқда. Хусусан, Украина ғалласини Қора денгиз портларидан экспорт қилиш бўйича битим Туркия воситачилигида тузилган ва сўнгра узайтирилган эди. Шунингдек, икки ўртадаги энг шов-шувли асирлар алмашуви ҳам Эрдўған шафелигида амалга ошди – ўшанда Россия тутқунликдаги “Азов” батальони командирларини Путиннинг яқин кишиларидан бири ўлароқ танилган украиналик собиқ сиёсатчи Виктор Медведчукка айирбошлаган эди.
Зеленский зирҳли танклар учун Францияга миннатдорлик билдирди
Украина президенти Владимир Зеленский зирҳли танклар юбориш қарори учун Францияга миннатдорлик билдирди:
"Франция Европадан Украинага мудофаа ёрдамини янги босқичга олиб чиқди. Президент Макронга бу ёрдам учун миннатдорлик билдираман. Бизга ҳали кўп зирҳли техникалар керак, жумладан Францияда ишлаб чиқарилган танклар ҳам. Бу қолган ҳамкорларимизга аниқ сигнал бўлади. Ғарб типидаги танклар ҳалигача Украинага нега етказиб берилмаётганига асосли сабаб йўқ. Бу украиналиклар учун хавфсизликни, европаликлар учун эса тинчликни таъминлашда жуда муҳим аҳамиятга эга”.
Таҳлилчилар Францияда ишлаб чиқарилган бу танклар Украинага юбориладиган илк Ғарб зирҳли техникаси эканини таъкидламоқда. Чунки ҳозирга қадар НАТО мамлакатлари Украинага Совет Иттифоқи даврида ишлаб чиқарилган зирҳли машина ва танкларни етказиб берган эди.
Бахмутлик қизалоқлар "Қорбобо"дан совға олишди
10 ойдан бери уруш исканжасида яшаётган бахмутлик қизалоқлар Қорбободан совға олишди.
Қорбобо ролини “UA Future” инсонпарварлик ташкилоти вакиллари ўйнади.
“Биз совға бериш учун болаларни қидириб топишимизга тўғри келади. Кўриб турганингиздек, болалар уйларидан чиқишни хоҳлашмайди, чунки кўчага чиқишдан қўрқишади. Болалар кунларини кўчага чиқмасдан ўтказяпти", деди “UA Future” ташкилоти директори Пётр Касзувара.
Олександра 3 ёшда, Кристина эса 4 ёшда. Россия қўшини қизалоқлар яшаётган Бахмут шаҳрининг 60 фоиз қисмини вайрон қилган.
Донецк вилояти ҳарбий маъмурияти раҳбари Павел Кириленкога кўра, кеча шаҳарда рус армияси ўқидан икки аёл ҳалок бўлган.
Херсонга ҳужумда 20 яшар йигит ўлди
Бугун эрталаб Россия қўшинлари Херсон шаҳрини ўққа тутиши натижасида тўрт киши снаряд парчаларидан яраланди. Бир ярадорга шифокорлар воқеа жойида ёрдам кўрсатишди, уч нафари эса касалхонага ётқизилди – улардан бири, 20 ёшли йигит олган жароҳатлари оқибатида вафот этгани айтилмоқда.
Ғарб таҳлилчилари, хусусан, Урушни ўрганиш институти (ISW) экспертлари фикрича, Россия қўмондонлиги охирги пайтларда Бахмутга ҳужумни бироз сусайтириб, асосий кучни Соледар шаҳрига йўналтирган. Аммо бу фронтда ҳам илгарилаш мушкул кечаётир.
Урушнинг энг қайноқ нуқтаси деб баҳоланаётган Бахмут учун жангда ҳар икки томон жиддий талафот кўраётгани айтилмоқда. Рус қўшини салкам ярим йилдан буён шаҳарни эгаллашга уринмоқда.