Кремл: Танк етказиб бериши Ғарбнинг можарода “бевосита иштироки”ни англатади
Кремл АҚШ ва Германиянинг Украинага жанговар танклар етказиб бериши ҳақидаги баёнотларига биринчи марта муносабат билдирди.
"Европа ва Вашингтондан Украинага қуроллар жумладан, танклар юборилиши Украинадаги жанговар ҳаракатларга аралашишни англатмаслиги борасида баёнотларни эшитиб келяпмиз. Биз бунга мутлақо қўшилмаймиз. Биз НАТО ва Европанинг ҳаракатларини можарога бевосита аралашув сифатида кўрамиз. Бу тенденция кучайиб бораётганига ҳам гувоҳ бўляпмиз”, деди Кремл матбуот котиби Дмитрий Песков
АҚШ президенти Жо Байден танклар Россия учун "ҳеч қандай ҳужум таҳдиди" эмаслигини ва танклар Украинанинг "очиқ ҳудудларда манёвр қилиш қобилиятини яхшилашга" ёрдам беришини таъкидлади.
Россия навбатдаги ракета зарбаларини берди. Аҳоли метрога беркинди
Киев ҳарбий маъмурияти шаҳарга отилган 15 дан ортиқ ракета уриб туширилганини маълум қилди, бироқ аҳолини бошпаналарда қолишга чақирган.
Киев мери Виталий Кличконинг билдиришича, шаҳар жанубидаги нотураржой бинога ракета урилиши оқибатида бир киши ҳалок бўлган ва икки киши яраланган.
Украина ҚК Бош штабининг дастлабки ҳисоб-китобига кўра, Россия армияси 26 январга ўтар кечаси Украинага 24 та Shahed-136 камикадзе дронлари билан ҳужум уюштирган, барча дронлар йўқ қилинган.
Днепропетровск вилоятида эса, вилоят кенгаши раиси Николай Лукашук айтишича, битта дрон саноат объектига келиб тушган.
26 январь куни эрталаб Украинанинг барча вилоятларида яна ҳаво тревогаси эълон қилинди.
"Челленжер 2" инглиз танклари Украинага йўл олди
Буюк Британия Мудофаа вазирлиги Украинага юбориладиган "Челленжер 2" танкларини намойиш қилди.
Буюк Британия бош вазири Риши Сунак яқин ҳафталар ичида Украинага 14 та "Челленжер 2" танкидан иборат эскадрон юборилишини маълум қилди.
1994 йилдан бери "Челленжер 2" жанговар танкларидан Британия мудофааси учун фойдаланиб келинмоқда. Маълумотларга кўра, танклардан ҳозиргача Босния ва Герцеговина, Косово ва Ироқдаги можароларда фойдланилган.
Испания ҳам Украинага Леопард танкларини жўнатишга хайрихоҳ
НАТОдаги иттифоқчиларнинг қарорларидан сўнг Испания мудофаа вазири Мадрид ҳам Украинани Германияда ишлаб чиқарилган Леопард 2 танклари билан таъминлашга хайрихоҳлигини билдирди.
Элкано тадқиқот марказининг хавфсизлик ва мудофаа бўйича тадқиқотчиси Феликс Артеганинг сўзларига кўра, Испанияда 108 та 2А4 танклари мавжуд.
2А4 кўплаб Европа мамлакатлари учун эски типдаги танк модели ҳисобланади.
Испания танкларининг қарийб ярми Шимолий Африкадаги Сеута ва Мелиля анклавларида жойлашган.
53 таси эса Сарагосадаги ҳарбий базада ҳамда улар қайта таъмирланиши керак, деди Артега.