Вашингтон Украинага 150 километр масофадан урадиган GLSDB ракеталарини беради
Вашингтон Украинага GLSDB ракеталарини беради, аммо улар ҳали ишлаб чиқарилиши керак. Америка оммавий ахборот воситалари АҚШ ҳукумати доираларидаги манбаларга таяниб, Оқ уй Украинага 2, 2 миллиард долларлик янги ёрдам пакетини эълон қилиши мумкинлиги ҳақида хабар берди.Бу пакетга бошқа ҳарбий анжомлар қатори, Украина ҳозир ишлатаётганидан икки баравар узунроқ ўқ-дорилар киради. Аммо улар жанг майдонида фақат шу йилнинг охирига келиб пайдо бўлиши мумкин. Гап 150 километргача отиш масофасига эга ердан учириладиган кичик диаметрли GLSDB ракеталари ҳақида кетмоқда. Бу HIMARS типидаги ракеталардан отилган ракеталар ёрдамида нишонга уриладиган кичик ракеталардир. Уларни қабул қилиб, Украина қўшинлари Россиянинг орқа фронтидаги қисмларига зарба бера олади.
1, 75 миллиард долларлик GLSDB ишлаб чиқариш бўйича шартнома Boeing ширкатига топширилиши кутилмоқда. Битим тузилганидан кейин Украинага GLSDB етказиб беришни амалга ошириш учун тахминан тўққиз ой вақт кетади, деб ёзади Bloomberg.
Киев кўпдан бери АҚШдан бундай ракеталарни сўраб келади. Украина бундай қуролларсиз босиб олинган ҳудудларни қайтариш ниҳоятда қийин бўлишини билдирган. Бироқ, Жо Байден маъмурияти ҳар сафар бу сўровларни рад этиб, буни Украина Россия ҳудудига зарба бериш учун фойдаланиши, бу можаронинг кучайишига олиб келиши хавотирлари билан изоҳлаган.
Германия ҳукумати Киевга 88 та “Леопард 1” танкларини етказиб беришни маъқуллади.
Киев уларни таъмирдан чиққанидан кейин олади. Тахминларга кўра, Украина уларни текинга олмайди, балки Германиянинг қурол ишлаб чиқарувчи ширкатидан умумий суммаси 100 миллион евродан кўпроққа сотиб олади, дея хабар бермоқда немис нашри “Зуд Дойче Цайтунг” ҳукуматдаги манбаларга таяниб.
Бундан ташқари, Германия ҳукумати яқинда бўлиб ўтган жаҳон чемпионатини ҳимоя қилиш учун Қатарга жўнатган 15та “Гепард” танкини ҳам қайтариб олиш ва Украинага жўнатишни кўриб чиқмоқда.
"Гепард танклари Украинадаги урушда ўзини жуда яхши исботлади. Агар бу ердаги ҳамкорлардан кўпроқ нарсани олсак, украиналикларга албатта ёрдам берган бўларди", - деди Германия мудофаа вазири Борис Писториус.
Ҳамкорларнинг бир неча ҳафталик кучли босимидан сўнг, Германия ўтган ҳафта Европа давлатлари коалицияси таркибида Украинага 80 га яқин “Леопард 2” танкларини, шу жумладан ўзининг 14 та танкини етказиб беришни маъқуллашини маълум қилди.
Буюк Британия, шунингдек, Киевга бир нечта “Чалленжер 2” танкларини юборишга ваъда берган, АҚШ эса жорий йилнинг охиригача ёки келаси йилнинг бошида 31 та М1 “Абрамс” танкларини жўнатишини ваъда қилган.
Зеленский: Босқинчиларнинг ҳар қандай тажовузкор ҳаракатини жавобсиз қолдирмаймиз
Украина президенти Владимир Зеленский видеомурожаатида “стратегик жиҳатдан Россиянинг мағлубияти аллақачон аниқ” бўлса-да, Россия армияси ҳужумкор ҳаракатлар қилиш учун ресурсларга эга эканлигини таъкидлади.
Россия армияси “урушнинг боришини ўзгартиришга уриниш вариантларини қидирмоқда” ва “ҳозирги вақтда назорат қилаётган ҳудуд салоҳиятидан ўз агрессиясига хизмат қилиш учун фойдаланишга” ҳаракат қилмоқда”, деди Зеленский.
“Босқинчиларнинг ҳар қандай тажовузкор ҳаракатини жавобсиз қолдирмаймиз. Душман стратегик мағлубияти аллақачон аниқ бўлган муайян босқичда. Аммо тактик жиҳатдан улар ҳали ҳам ҳужумкор операцияларни ўтказишга уриниш учун ресурсларга эга. Улар урушнинг боришини ўзгартиришга уриниш вариантларини қидирмоқдалар ва ҳали ҳам ўзлари назорат қилаётган барча ҳудудларнинг имкониятларидан босқинчилик мақсадларида фойдаланишга ҳаракат қилмоқдалар. Биз қилаётган ишимизни давом эттиришимиз – чидамлилигимизни мустаҳкамлашимиз, армиямиз ва барча ҳимоячиларни зарур қурол-яроғ ва техника билан таъминлаш истагида мутлақо бирдам бўлишимиз керак”.
Ўтган ҳафта АҚШ ва Германия Украинага мудофаа мақсадлари учун танклар юборишга ваъда берди.
Россия президенти Владимир Путин 2 февраль куни Қизил Армиянинг Сталинградда фашистлар Германияси устидан қозонилган ғалабасининг 80 йиллигига бағишланган тадбирлардаги чиқишида Москванинг танклар, хусусан, Германия “Леопард”лари учун жавоби борлигини айтди.
Россиянинг “Интерфакс” ахборот агентлиги Путиннинг Россияга Германия танклари томонидан “яна Иккинчи жаҳон уруши давридагидек таҳдид қилинаётгани” ҳақида сўзларига иқтибос келтирган:
"Биз уларнинг чегараларига танкларни жўнатмаяпмиз, лекин жавоб беришимиз бўлган нарсамиз бор ва бу фақат зирҳли техника билан бўлмайди. Буни ҳамма тушуниши керак", - дея айтган Путин.
Россия пайшанба куни ўз кучлари Украина артиллериясини бир неча нуқтада йўқ қилишда давом этгани, Украина Қуролли кучлари эса турли аҳоли пунктларидан Россия ҳужумларини қайтарганини даъво қилди.
Украина президенти Владимир Зеленский Киевга ташриф буюрган Европа етакчиларини Россияга қарши санкцияларни кучайтиришга чақирди. Киев раҳбари Зеленский ўз чиқишида Ғарбни Путин куч йиғаётгани ва йирик ҳужумларни режалаштираётгани ҳақида огоҳлантирди.
Европа Комиссияси президенти Урсула фон дер Ляйен ЕИ Россияга босимни кучайтиради, деди.
Ғарб Россиянинг Украинага деярли бир йил давом этган босқинидан кейин кенг қамровли жазо чораларини қўллади.
Фон дер Ляйен Украинага кўпроқ ҳарбий, молиявий ва сиёсий ёрдамни ваъда қилди. У, шунингдек, Ҳаагада Украинанинг тажовузкорлиги жиноятларини таъқиб қилиш учун халқаро марказ ташкил этилишини билдирди.
Украина бош штаби: Россия йўқотишларга қарамай ҳужумларни тўхтатмаяпти
Россия қўшинлари Донецк вилоятининг бир қанча ҳудудларида катта йўқотишларга қарамай, ўз ҳарбий ҳаракатларини секинлаштирмаяпти.
Россиянинг сўнгги 24 соат давомидаги ҳужумлари асосан тўрт йўналишда – Лиман, Бахмут, Авдеевка ва Новопавловкага қаратилди.
Бу ҳақда Украина Бош штаби 3 февраль, эрталаб маълум қилди.
Бош штаб маълумотига кўра, Россиянинг фуқаролик ва инфратузилма объектларига ҳужумлари тинч аҳоли орасида кўплаб талафотларга сабаб бўлган.
"Россия Федерацияси давлатимизнинг муҳим инфратузилмасини вайрон қилиш ниятидан қайтмаяпти, фуқаролик объектлари ва тинч аҳоли турар-жойларига зарба беришда давом этмоқда. Ўтган бир кун давомида душман тўртта ракета ҳужумини амалга оширди, улардан иккитаси фуқаролик инфратузилмасига бориб урилди. Донецкнинг Краматорск шаҳри аҳоли ҳудудларига бешта ҳаво зарбаси берилди”, — дейилади Бош штаб баёнотида.
1 февраль куни Краматорскдаги кўп қаватли уйга ракета ҳужуми оқибатида камида беш киши ҳалок бўлгани хабар қилинган эди.
Россия кучлари Херсон ва Николаевдаги тинч аҳоли манзилларига ҳам ракета ҳужумларини давом эттирди, дейилади Бош штаб билдирувида.
Россия ҳарбийлари Украина шаҳарларига ҳужумлардан мақсад Украина ҳарбий техникасини йўқ қилиш эканинни билдирган, кўплаб далилларга қарамай, тинч аҳоли нишонга олинганини рад этган.
Россия ракеталари яна тинч аҳоли уйларини нишонга олди
Украина шарқидаги Краматорск шаҳрига чоршанбага ўтар кечаси Россия ракетаси тушиб, турар-жой биносини вайрон қилди.
Камида уч киши ҳалок бўлди, 20 киши жароҳатланди, дея хабар берди вилоят полицияси.
Маҳаллий ҳокимият дастлаб Россия одатий ракетадан ўт очганини маълум қилди.
Бироқ кейинчалик, полиция бинога «Искандер-К» тактик ракетаси келиб урилганини билдирди.
«Камида саккизта кўп қаватли уй зарар кўрди. Улардан бири бутунлай вайрон бўлди. Вайроналар остида қолганлар бўлиши мумкин», дея хабар қилди маҳаллий полиция.
Ўтган ой Днепр шаҳридаги турар-жой биносига Россия ракетаси келиб тушиши оқибатида камида 44 киши ҳалок бўлган эди.
«Мушугим ичкарида эди. Энди уни топа оламанми ёки йўқ, билмайман. Ҳозир хаёлимга келган нарса шу. Ҳозир мен учун бошқа ҳеч нарса муҳим эмас”, деди шаҳар турғуни Виктор.
Қутқарувчилар бино вайроналарини кўздан кечирмоқда.
Маҳаллий аҳоли эса сочилиб ётган буюмлар орасидан яроқлиларини ажратяпти.
«Бу шаҳар маркази. Бу ерда фақат тинч аҳоли яшайди. Шундай экан, ҳужумни оқлашга бўлган ҳар қандай уринишлар бефойда", деди вилоят губернатори Павло Кириленко Рейтерс агентлигига берган интервьюсида.
Москва тинч аҳолини нишонга олганини рад этиб келади.
Ўтган йил апрель ойида Украина Россиянинг Краматорскдаги темир йўл вокзалига ҳужуми оқибатида 57 киши ҳалок бўлганини билдирган эди. Москва эса ўшанда ҳам ракета Украинага тегишли эканини айтиб, жавобгарликни рад этган.