Россияда дрон ишлаб чиқарилади
Россия ва Эрон ҳукуматлари, Россия ҳудудида дронлар ишлаб чиқарувчи корхона очишни режаламоқда. Бу ҳақда, ўз манбаларига таянган ҳолда The Wall Street Journal газетаси хабар берди.
Газета суҳбатдошларига кўра, 5 январь куни Эрон делегацияси Татаристоннинг Алабуға шаҳрига келиб, завод қўриш кўзланган бўш майдонни кўздан кечирган.
Режага кўра, янги корхона йилига камида 6 мингта дрон ишлаб чиқариш қувватига эга бўлади. Лойиҳа икки мамлакат ўртасидаги 1 миллиард долларлик битимнинг бир қисми экани айтилмоқда.
Январда АҚШ Савдо вазирлиги Эроннинг дронларни лойиҳалаш ва ишлаб чиқариш билан боғлиқ етти ширкатига қарши экспорт чекловлари жорий этган, шунингдек, Эрон учувчисиз учар аппаратларини Россияга етказиб беришда кўмаклашишда гумон қилинаётган Shahed Aviation Industries Research Center, Paravar ва бошқа ширкатларга нисбатан санкциялар жорий қилган эди.
Киев Москвани фуқаровий ва энергетика объектларига ҳужумларда Эроннинг Shahed-136 дронларидан фойдаланишда айблаб келади.
Украина ҳукуматида кадрлар алмашинуви давом этмоқда
Украина Олий Радасидаги “Слуга народа” фракцияси раҳбари Давид Арахамия, мудофаа вазири Алексей Резников истеъфога чиқарилиши ва унинг ўрнига Вазирликнинг Разведка бош бошқармаси бошлиғи Кирилл Буданов тайинланишини билдирди.
“Мантиқ ўша-ўша. Ҳозирги босқичда кучишлатар идораларга сиёсатчилар эмас, балки кучишлатар кадрлар бошчилик қилишлари керак”, дея изоҳ берган Арахамия. Айни чоғда у янги тайинловлар қачон эълон қилинишини очиқламаган.
Канада Украинага беришни ваъда қилган Леопард 2 танкларининг илк партияси Полшага етиб борди
Канада мудофаа вазири Анита Ананд бу ҳақида твиттерда маълум қилди.
«Иттифоқчиларимиз билан бир қаторда биз ҳам яқин орада Украина Қуролли кучларини танклардан фойдаланишга ўргатишни бошлаймиз», — дея таъкидлади Ананд ўз твитида.
Украина расмийлари Россия босқинининг бир йиллиги арафасида, русларнинг кенг кўламли ҳужумга ўтишини айтиб келмоқда.
Украина ҳудуди бўйлаб ракета ва авиация зарбалари эҳтимоли юқорилигича қолаётир
Украина Қуролли кучларига кўра, рус армияси шарқда 5 тарафдан - Авдеевка, Бахмут, Купянск, Лиман ва Новопавловск йўналишида ҳужумга фаол ҳаракат қилмоқда.
Украина ҚК қўмондонлиги Россия армиясининг мунтазам ҳарбий қисмлари билан “Вагнер ХҲШ” бўлинмалари ҳаракатларида номувофиқлик борлигини қайд этган.
Британиянинг Financial Times газетаси, Украина ҚКдаги юқори мартабали манбаларига таянган ҳолда хабар қилишича, Россия қўшинлари яқин 10 кун ичида ҳужум бошлаши мумкин.
Аввалроқ Украина мудофаа вазири Алексей Резников, Россиянинг янги ҳужумлари, уруш бошланганига бир йил тўладиган кун – 24 февралга тўғри келиши мумкин, деган эди. Ҳужумдан мақсад бутун Донбассни ишғол этиш бўлиши мумкин, деб ёзади Financial Times.
Айни пайтда Донецк ва Луганск вилоятларининг қатор ҳудудларида қақшатқич жанглар давом этмоқда. Британия нашрининг Украина разведкасидаги манбалари Россия Донецк вилояти жанубига, энг аввало Мариупол атрофидаги аҳоли масканларига қўшимча кучлар ташлаганини билдирган.
Россия ҳужумга ҳозирланар экан, Ғарб танклари ва бошқа ҳарбий ёрдами Украинага етиб келишидан олдин фронтда илгарилашни кўзламоқда, дея урғулаган Financial Times.
Владимир Зеленский Украина шарқида, Донецк вилоятида шиддатли жанглар давом кетаётганини билдирди:
«Босқинчилар февраль ойида қандайдир рамзий ғалабага эришмоқчи. Улар ўтган йилги мағлубиятлар учун қасос олишга уринишмоқда. Фронтнинг турли нуқталарида босим кучайганига гувоҳ бўляпмиз. Айниқса, Донетск вилоятида вазият оғир. У ерда шиддатли жанглар кетмоқда. Аммо, вазият қанчалик қийин бўлмасин, қанчалик кучли босим бўлмасин, чидашимиз керак».