Россия Украинанинг зирҳли техникаларига ҳужум қилди, Украина эса Россия позицияларига ҳаводан зарба берди
Россия сешанба куни сўнгги 24 соат ичида бир неча жабҳадаги ҳужумида Украина қўшинлари ва зирҳли техникалари йўқ қилинганини, Украина эса ҳаво кучлари Россия позицияларига 15 марта зарба берганини маълум қилди.
Россиянинг Купянск, Красний Лиман ва Донецк каби бир неча йўналишдаги ҳужумлари Украина Қуролли Кучларининг ҳарбийлари ва ҳарбий техникасига, жумладан зирҳли машиналар, енгил автомобиллар, гаубицалар ва ракета отиш мосламаларига зарар етказди, деди Россия Мудофаа вазирлиги матбуот котиби Игор Конашенков сешанба куни кундалик брифингда.
Конашенковнинг сўзларига кўра, ўтган кун давомида Россия қирувчи учоқлари Украина ҳарбий-ҳаво кучларининг МиГ-29 учоғи ва Ми-8 вертолётини, Россия ҳаво мудофаа кучлари эса тўртта ҲИМАРС МЛРС снарядларини уриб туширган ва Украинанинг еттита учувчисиз учиш аппаратини зарарсизлантирган.
“Укринформ” агентлиги Украинанинг турли ҳарбий идораларидаги манбаларига таяниб сешанба куни маълум қилишича, сўнгги 24 соат ичида Россия қўшинлари тўққизта вилоят, жумладан, Суми, Запороже ва Донецкни ўққа тутган.
Фақат Бахмут йўналишида бу даврда 37 та тўқнашув бўлган.
Шу билан бирга, Украина ҳарбий-ҳаво кучлари Россия позицияларига 15 марта зарба берди ва битта Су-24М ва битта Су-25 самолётини уриб туширди.
Уруш шароитида томонлар бераётган маълумотларни тезкор текшириш имкони йўқ.
Бахмутдаги вазият оғирлигича қолмоқда
Сешанба куни Брюсселда ўтган “Рамштайн-9” учрашувида Украинага қурол-аслаҳа етказиб бериш масаласидан ташқари фронтдаги вазият ҳам муҳокама қилинди.
АҚШ Штаб бошлиқлари бирлашган қўмитаси раҳбари генерал Марк Миллей бугунги кунда Украина фронтидаги аҳвол энг мураккаб ҳудуд Бахмут эканини айтди.
“Бахмут яқинида вазият жуда оғир. Украин ҳарбийлари ҳужумларни қайтаришда давом этишмоқда. Мен бу урушни тинкақуритар уруш дея таърифлаган бўлар эдим. Нозик ҳарбий ҳаракатлар йўқ. Улар артиллериядан кўп фойдаланишмоқда. Бу қанчага чўзилишини айтиш қийин. Бир ҳафта давом этиши ҳам мумкин, россияликлар захираси тугагунича давом этиши ҳам мумкин”, деди Миллей.
АҚШ президенти маъмурияти вакили Жон Кирби, ўз навбатида, Вашингтонда ўтказилган брифинг чоғида Россия армияси Бахмутни ишғол эта олиши ёки олмаслиги мавҳумлигини, бироқ ишғол этган тақдирда ҳам бу уруш натижасини ҳал этмаслигини урғулади.
Аввалроқ “Вагнер ХҲШ” асосчиси Евгений Пригожин Бахмутдаги украин қўшинлари ҳозирча қуршовга олинмаганини айтар экан, “Бахмут бу яқин кунларда ишғол этилмайди” дея қўшимча қилган эди.
Бугун эса Донецк вилояти ҳарбий маъмурияти раҳбари Павел Кириленко Бахмутда қарийб 5000 нафар тинч аҳоли қолаётганини маълум қилди.
Уларни шаҳардан эвакуация қилиш давом этмоқда. 2021 йил бошида Бахмутда 75 минг киши яшар эди.
Угледар яқинидаги Украина аскарлари «душман олдинга силжий олмаётганини» маълум қилди
Украинанинг 79-ҳаво ҳужуми бригадаси Россия Донецк вилоятидаги фронт чизиғида ютуқларга эришмаганини билдирди.
«Умуман олганда, душман айтарли олға силжий олмаяпти. Фронтдаги бўлинмамиз тўхталадиган бўлсак, душман у ерда умуман олдинга силжигани йўқ. Мудофаа чизиғи бардам туришда давом этади. Душманни Донецк йўналишидаги позициялардан, ундан кейин эса Украинанинг чегараларидан узоқлаштирамиз», дейди украин армияси зобити Богдан.
«Депутат» лақабли ҳарбий Россия артиллерия ҳужумларини кучайтирганини қўшимча қилди:
«Душманнинг артиллерия ва миномётдан ҳужумлари сони ортди. Илгари кунига бир-иккита ҳужум бўларди, энди эса кунига ўндан ортиқ ҳужум қилишмоқда. Улар пиёда аскарлардан кўра кўпроқ артиллерияни ишга солмоқда».
Донецк вилоят губернатори Павло Кириленко Украина миллий телерадиокомпаниясига берган интервьюсида Россия Донецк фронт чизиғидаги барча объектларни артиллериядан ўққа тутганини билдирди.
Ллойд Остин ва Йенс Столтенберг Украинадаги уруш бир йиллиги арафасида НАТОнинг «жипслиги»ни олқишлади
АҚШ мудофаа вазири Ллойд Остин ва НАТО Бош котиби Йенс Столтенберг Украинага босқиннинг бир йиллиги арафасида НАТО альянсининг «жипслиги»ни олқишлади.
Остин ва Столтенберг Брюсселда НАТО мудофаа вазирлари учрашуви олдидан учрашди.
Столтенберг аввалроқ Киев учун янги қуроллар муҳокамасидан олдин аллақачон етказиб берилган қуроллардан фойдаланишда давом этиш кераклигини таъкидлаган эди.
Унинг айтишича, у қирувчи самолётлар бериш масаласи муҳим, бироқ Украина ҳозирда қуруқликда кўпроқ ёрдамга муҳтож. Украина Ғарб снарядларини тез ишлатмоқда.
Остин Украина баҳорда Россияга қарши ҳужум бошлашига умид билдирди:
“Украинанинг баҳорда қарши ҳужумга ўтишини кутяпмиз. Шу сабабли ҳам ҳамкорлар билан Украина армиясини улар хоҳлаганидек зирҳли техникалар билан таъминлашга астойдил ҳаракат қиляпмиз. Бу уларга жанг майдонида вазиятни ушлашга ва устунликка эришишга ёрдам беради».
Ллойд Остин ҳозирда Россия эҳтимолий йирик ҳаво ҳужуми учун самолётлар жамлаётганига ишора қилувчи далиллар йўқлигини қўшимча қилди.
«НАТО ва бу коалиция ҳеч қачон бу қадар кучли бўлмаган. Россия энди глобал дунёдан четга чиқиб қолди. Дунё Украинанинг жасорати ва матонатидан руҳланмоқда. Бир сўз билан айтганда, Россия мағлуб бўлди. Улар куч, стратегик ва тактик жиҳатдан ютқазиб бўлди. Ҳозирда Россия жанг майдонида жуда катта йўқотишларга учрамоқда», деди АҚШ Қуролли кучлари генерали Марк Миллей.