АҚШ президенти Жо Байден Киевга келди
Қўшма Штатлар президенти Жо Байден 20 февраль куни Киевга учиб келган. Унинг Украина пойтахтига ташрифи ҳақида олдиндан эълон қилинган эмас.
Байденнинг ўзи Твиттерда Киевга ташрифини мана бундай шарҳлади:
"Россиянинг Украинага шафқатсиз босқинининг бир йиллиги яқинлашмоқда ва мен бугун Президент Зеленский билан учрашиш ҳамда демократия, Украинанинг суверенитети ва ҳудудий яхлитлигига содиқлигимизни тасдиқлаш учун Киевдаман" деб ёзди президент Байден.
“Украина сейчас” телеграм-канали Жо Байденнинг Владимир Зеленский ҳамроҳлигида Украина ҳимоячилари хотираси учун ўрнатилган ёдгорлик мажмуасига боргани акс этган видеони ёйинлади. Видеода ҳаво тревогаси товушларини эшитиш мумкин.
Бу хабар ёйинланганидан кўп ўтмай президент Зеленский Байденнинг Украинага келганини тасдиқлади. “Жозеф Байден, Киевга хуш келибсиз! Сизнинг ташрифингиз барча украиналиклар учун ўта муҳим дастакнинг намойиши бўлди”, деб ёзган Зеленский ўз телеграм-каналида.
Аввалроқ Украина Ташқи ишлар вазирлиги душанба куни Киевга ғарблик “бош” ҳамкорлардан бири келиши кутилаётгани ҳақида маълумот тарқатган эди. Журналистлар ва ижтимоий тармоқ фойдаланувчилари Украина пойтахтида эрталабдан бошлаб кўчалар ёпиб қўйилаётганига эътибор қаратишган.
Ташқи ишлар вазири ўринбосари Андрей Мельник Россия ҳужумининг бир йиллиги арафасида “сюрприз” тайёрланаётгани ҳақида билдирган. “Биз нафақат оғзаки дастак ва бирдамликни ҳис қиламиз, балки бизнинг муҳим ва бош ҳамкорларимиз Киевда бўлиши ҳамда янада каттароқ ёрдам берилишини кўрамиз”, деган Мельник.
Журналистлар ва сиёсий шарҳловчилар дохил қатор фойдаланувчилар Киевга эълон қилинмаган ташриф билан АҚШ президенти Жо Байден келиши мумкинлигини тахмин қилишган. 21 февраль куни унинг Польшага сафари бошланади. Байденнинг Украинага ташриф буюриш режаси борлиги ҳақида Оқ уй эълон қилган эмас.
Россия Украинага яна ракеталар отди: Хмельницкийда икки ярадор, ҳарбий объектга зарба берилган
18 февраль куни эрталаб Россия Украинага яна ракета зарбалари йўллади. Украина ҚК Ҳаво кучлари маълум қилишича, камида тўртта “Калибр” ракетаси учирилган:
“18 февраль куни Россия босқинчи қўшинлари Қора денгиз акваториясидан Украинага қарата тўртта “Калибр” ракетасини учирди. Икки ракета ҳаво ҳужумидан мудофаа тизимлари ёрдамида йўқ қилинди”, дейилади хабарномада. Шунингдек, украин ҳарбийларига кўра, Россия тактик авиацияни ҳам қўллаган.
Украина ҳукумати ва ОАВлари Хмельницкийда портлаш юз бергани ва Николаев вилоятида “ҲҲМ тизимлари ишга тушган”и ҳақида хабар тарқатди. Хмельницкий вилояти ҳарбий маъмурияти раҳбари Сергей Гамалий бутунукраина телемарафони ёйинида икки ракетадан бири ҳарбий объектга зарба берганини, у ерда ёнғин чиққанини ва тезда ўчирилганини тасдиқлади.
“Россияликлар иккита зарба беришди: улардан бири ҳарбий объектга тегди, иккинчиси эса унинг яқинидаги фуқаровий иншоотга”, деди мулозим. Гамалийга кўра, ҳужум натижасида икки киши ярадор бўлган.
Хмельницкий мэри Александр Симчишин шаҳарда уч ўқув юрти ва қарийб 10 та кўпқават турар-жой биноси зарарланганини билдирди.
“Бир ярим мингтача дераза ва балконлар вайрон бўлди, бир қанча техника ва битта хусусий транспорт воситасига шикаст етди. Икки тинч фуқаро жароҳат олган, уларни касалхонага ётқиздик”, деди у.
Николаев вилояти раҳбари Виталий Ким телеграмда ракета парчаси суратини эълон қилиб, бу катта эҳтимол билан, Украина ҲҲМ ракетасига оидлиги ҳақида ёзди.
АҚШ Давлат департаменти Хитойни Россияга қурол етказиб бериш оқибатларидан огоҳлантирди
Хитой Россияга ножанговар ҳарбий ёрдам бермоқда, шунингдек қурол-аслаҳа етказиб бериш имкониятларини ўрганмоқда. Бу ҳақда NBC News телеканали билан суҳбатда АҚШ давлат котиби Энтони Блинкен маълум қилди.
Дипломатга кўра, у Хитой Компартияси МҚнинг ташқи ишлар бўйича комиссияси канцеляриясининг раҳбари Ван Ини Москвага қурол-яроғи етказиб беришнинг Пекин учун жиддий оқибатларидан огоҳлантирган. УларМюнхень хавфсизлик конференциясида учрашганлар.
Блинкен билан Ван И учрашуви ҳақида олдиндан маълумот берилмаган эди.
АҚШ давлат котиби Россия армиясига Хитой қуроллари етказиб берилиши билан боғлиқ хавотирларини CBS билан интервьюсида ҳам сўзлаб берди.
Аввалроқ NBC манбалари Хитой Россияга баҳорги ҳужум учун ҳарбий уст-бош ва зирҳли нимчалар бериши мумкинлигини айтишган, аммо тафсилотларни очиқлашдан бош тортишган эди.
Bloomberg маълумотига кўра, январь ойида АҚШ Хитойнинг айрим давлат ширкатлари Украинага қарши урушда фойдаланиш учун Россияга ноҳарбий ва иқтисодий ёрдам кўрсатаётганига оид далилларни Пекинга тақдим этган.
Агентлик суҳбатдоши эса “Вашингтон назарида Пекин Россияни дастаклашни истайди ва бетараф томон ҳисобланмайди”, деб айтган.
Хитой ҳукумати ушбу маълумотлар юзасидан изоҳ берганича йўқ.
Камала Ҳаррис: Хитойнинг Россия билан муносабатлари «хавотир»ли даражада чуқурлашмоқда
АҚШ вице-президенти Камала Харрис Россия Украинага бостириб кирганидан кейин Хитой-Россия билан муносабатларини чуқурлаштирганидан хавотирда эканлигини билдирди.
У Хитойнинг Россияни қўллаб-қувватлаши қоидаларга асосланган халқаро тартибни бузишини таъкидлади:
«Биз уруш бошланганидан бери Пекин Москва билан муносабатларини кучайтирганидан хавотирдамиз. Хитойнинг Россияга ёрдам кўрсатишга қаратилган ҳар қандай қадами фақатгина тажовуз ва қотилликни рағбатлантиради».
Мюнхен Хавфсизлик конференциясидаги нутқида у океан ортидан Украинага ёрдам давом этишини таъкидлади.
«Орадан бир йил ўтди, Киев букилмасдан, ҳали ҳам тик турибди. Россия эса заифлашди. Трансатлантик иттифоқ ҳозир ҳар қачонгидан ҳам кучлироқ. Россиянинг Украинадаги ҳаракатларига келсак, биз далилларни ўрганиб чиқдик. Ҳуқуқий тамойиллар нималигини биламиз. Россиянинг ҳаракатлари инсониятга қарши жиноятлар эканига шубҳа йўқ», - дея қўшимча қилди у.