Бишкекда Украина урушининг бир йиллиги муносабати билан акция ўтказган фаоллар ушланди
24 февраль куни Қирғизистон пойтахти Бишкек шаҳрида Россиянинг Украинага уруш очганига бир йил тўлиши муносабати билан рамзий акция ўтказган фаоллар ушланди. Бу ҳақда инсон ҳуқуқлари ҳимоячиси Гулшайир Абдирасулова Фейсбукдаги саҳифасида хабар берди.
“Уларни фуқаро кийимидаги шахслар ушлаб кетди, уяли телефонлари ҳам олиб қўйилди. Ички ишлар вазири, қани, тушунтириб беринг-чи, энди бизда ёдгорликка гул қўйиш, рамзий белгилардан фойдаланиш ҳам мумкин бўлмай қолдими?” деб ёзди Абдирасулова.
Ҳибсга олинган етти нафар фаол украиналик ҳайкалтарош Лев Синькевич ижодига мансуб ҳайкал пойига гул қўймоқчи бўлган.
Айни пайтда Қирғизистон пойтахтида бўлган Россия фуқароси Станислав Захаркин ҳам Озодликка акция қатнашчилари ҳибсга олинганини тасдиқлади.
Фаоллар Бишкек шаҳрининг Первомайский тумани ИИБга олиб кетилган. Ички ишлар идораси ҳолат юзасидан кейинроқ расмий ахборот берилишини маълум қилган.
Бундан роппа-роса бир йил аввал, 2022 йил 24 февраль куни президент Владимир Путиннинг буйруғи билан Россия қўшини Украина ҳудудига бостириб кирган, Киев ва бошқа шаҳарларга бомба ёғдирила бошлаган эди. Ҳарбий тажовузга бир йил тўлиши муносабати билан бутун дунёда Украинани қўллаб-қувватлаб, “Нур зулматни енгади” шиори остида бирдамлик тадбирлари ўтказилмоқда.
БМТ Россиядан Украинани тарк этишни талаб қилди. Ўзбекистон - бетараф
БМТ Бош ассамблеяси Украинада адолатли ва бардавом тинчлик ўрнатиш тўғрисидаги резолюцияни қабул қилди. Резолюцияни 141 давлат қўллади, 7 давлат қарши чиқди ва 31 давлат бетараф қолди.
Қарши чиққан давлатлар орасида Россия, Беларусь, Эритрея, Мали ва Сурия бор. Ўзбекистон бетараф позициясини билдирди. Украина масаласида бетараф қолган давлатлар қаторида Арманистон, Қозоғистон, Қирғизистон, Хитой, Эрон ва Ҳиндистон ҳам бор.
Резолюцияда Россия зудлик билан Украинадан қўшинларини олиб чиқиб кетишга чақирилади.
БМТ Бош ассамблеяси резолюцияга Беларусь таклифини киритишдан бош тортди. Минск Украинага қурол етказиб беришни тақиқлаш ва Киевни Москва билан музокаралар ўтказишга ундашни таклиф қилган эди.
БМТ Бош ассамблеясида Хавфсизлик кенгашида бўлгани каби Россия вето қўйиш ҳуқуқига эга эмас. Шу билан бир қаторда Бош ассамблея резолюциялари халқаро ҳуқуқ меъёрларига асосан бажарилиши шарт эмас.
Ўзбекистон Россия Украинага бостириб кирганидан бери бетараф позицияда эканини таъкидлаб келади.
2022 йилнинг 17 мартида Ўзбекистон ташқи ишлар вазири Абдулазиз Комилов Сенатда сўзлаган нутқида Тошкент “Украинанинг мустақиллиги, суверенитети ва ҳудудий яхлитлигини тан олиши ва Донецк ҳамда Луганcк халқ республикаларини тан олмаслиги”ни таъкидлаган эди. Кўп ўтмай Комилов ташқи ишлар вазири лавозимидан озод этилган.
Дунё бўйлаб Украина билан бирдамлик акциялари ўтказилмоқда
Жаҳоннинг кўплаб йирик шаҳарларида 23 февралдан 26 февралгача Украина билан бирдамлик акциялари ўтказилади.
Мазкур акциялар “Нур зулматни енгади” ( #LightWillWinOverDarkness) шиори ости да ўтказилмоқда.
Митинглар, намойишлар ва пикетлар 2014 йилда Россия Қримни аннексия қилганининг 9 йиллигига ва Россиянинг Украинага кенг қамровли босқинига 1 йил бўлгани муносабати билан ўтказилмоқда.
Мазкур акцияларнинг уюштирувчилари жаҳон давлатларидаги украин диаспораси вакиллари бўлмоқда.
2014 йилда Украина ҳудуди ҳисобланган Қрим мухториятини аннексия қилган Кремль 2022 йилнинг 24 февралига ўтар кечаси Украинага нисбатан кенг қамровли “махсус ҳарбий амалиёт”ни бошлаган эди.
Байден Варшавада Путин ҳеч қачон ғалаба қозонмаслигини айтди
АҚШ Президенти Жо Байден сешанба куни Варшавада Россия босқинидан бир йил ўтиб Украина "кучли" бўлиб қолаётгани, Москва қўшнисини ҳеч қачон мағлуб этмаслигини айтди.
"Бир йил олдин дунё Киевнинг қулашига тайёргарлик кўраётган эди. Мен ҳозир Киевдан келдим ва мен ишонч билан айтаманки: Киев кучли, Киев мағрур, ва энг муҳими, у озод", - деди Байден.
Байденнинг Варшавадаги Қироллик қасридаги нутқи урушнинг охири кўринмай, иккинчи йилига кирган пайтга тўғри келди.
АҚШ раҳбари чиқишидан бир неча соат олдин Россия президенти Владимир Путин Москва Украинада ўз мақсадларига эришишига ваъда берди, Ғарбни Россияни йўқ қилишга уринаётганликда айблади, Россия Вашингтон билан имзолаган ҳужумкор қуроллар назорати бўйича 2010 йилда имзолаган шартномасидаги иштирокини тўхтатаётганини айтди.
Байден НАТО ҳудудининг "ҳар бир қарич"и ҳужумга учраса, ҳимоя қилинишини айтган бўлса-да, у Путиннинг Ғарб Россия учун таҳдид деган баҳосига қарши чиқди.
"Қўшма Штатлар ва Европа давлатлари Россияни назорат қилиш ёки йўқ қилишга интилмайди. Ғарб бугун Путин айтганидек Россияга ҳужум қилмоқчи эмас”, - деди Байден.
Жо Байден НАТО иттифоқчиси ва Ғарбнинг Киевни кўпроқ қўллаб-қувватлаш тарафдори бўлган Польша президенти Анжей Дуда билан учрашгандан кейин бу ҳақда гапирди.
Варшавадаги чиқишидан бир кун олдин Байден Украинага эълон қилинмаган ташриф билан борди.
Байден Россиянинг ҳужумларини қоралаб, дунё Россия томонидан содир этилган “ваҳшийлик”дан узоқлашмаслигини айтди.
"Империяни қайта тиклашга интилган диктатор ҳеч қачон халқнинг озодликка бўлган муҳаббатини енгиллаштира олмайди. Шафқатсизлик ҳеч қачон эркинлар иродасини сиқиб қўймайди. Украина, Украина эса ҳеч қачон Россиянинг ғалабаси бўлмайди. Ҳеч қачон", - дея таъкидлади АҚШ президенти.