Блинкен Тошкентда: Россия ва Хитой ташқи ишлар вазирлари билан учрашиш ниятим йўқ
АҚШ Давлат котиби Энтони Блинкен 1 март куни Тошкентда журналистлар билан учрашар жкан Деҳлида бўлиб ўтадиган Катта йигирматалик йиғилишида Россия ва Хитой ташқи ишлар вазирлари билан учрашиш ниятида эмаслигини айтди.
Блинкен Қозоғистон ва Ўзбекистон бўйлаб қисқа сафари ортидан 1 март куни G20 йиғилишида қатнашиш учун Ҳиндистон пойтахтига боради, бу ерда Москванинг Украинага тажоввузи муҳокамаларнинг муҳим қисми бўлади.
Учрашувда Россия ташқи ишлар вазири Сергей Лавров ва Хитой ташқи ишлар вазири Цин Ганг иштирок этмоқда.
“Катта йигирматалик учрашувида Хитой ёки Россия ташқи ишлар вазирларини кўриш ниятим йўқ, у ёки бу турдаги гуруҳ йиғилишларида ҳам улар билан кўришаман деб ўйламайман”, деди Блинкен Ўзбекистон пойтахтида журналистларга.
Чоршанба куни Блинкен, шунингдек, июл ойидаги тартибсизликлар чоғида Ўзбекистон ҳуқуқ-тартибот идоралари томонидан инсон ҳуқуқлари бузилгани ҳақидаги даъволарни тўлиқ ва ошкора текшириш муҳимлигини айтди.
Блинкен Ўзбекистонга ташрифи чоғида бу ҳақда Қорақалпоғистон вилояти мухториятини чеклаш режалари туфайли 21 киши ҳалок бўлганидан саккиз ой ўтиб гапирди.
“Мамлакатларимиз ўртасидаги шериклик алоқалари тарихи Ўзбекистон мустақилликка эришган илк даврга бориб тақалади. Сўнгги йилларда у янада кучайди.
Ўзбекистонда 2022 йил июль ойидаги тартибсизликлар чоғида ҳуқуқ-тартибот идоралари ходимлари томонидан содир этилган инсон ҳуқуқлари бузилиши ҳақидаги даъволарни тўлиқ ва ошкора текшириш ва айбдорларни жавобгарликка тортиш муҳимлигини алоҳида таъкидлайман", - деди Блинкен.
Россия фаластинликларни урушга ёлламоқда
Россия Украинага қарши давом этаётган урушда қатнашиш учун фаластинлик ёшларни ёлламоқда. Бу ҳақда Ливан разведка хизматларидаги манбага таяниб, The Media Line нашри хабар бермоқда.
Нашр суҳбатдошига кўра, фаластинликлар Россиянинг айрим ташкилотларидан 350 доллар олади. Ишга ёллаш Фаластин маъмуриятининг Ливандаги элчихонасига алоқадор шахслар томонидан амалга оширилади.
Бундан ташқари, ёллашда Ливаннинг “Ҳизбуллоҳ” радикал гуруҳи ҳам иштирок этмоқда, деб ёзади газета. Бу дронларни қандай бошқаришни биладиган ва шаҳарларда партизанлар урушида тажрибага эга бўлган фаластинликларни топишга ёрдам беради.
The Media Line нашрининг ёзишича, Россия фаластинликларни уруш жабҳасининг олд чизиғига жўнатмоқда. Газетанинг таъкидлашича, жами 300 га яқин фаластинлик тезкор тайёргарликдан сўнг фронтга жўнатилган. Яна 100 нафар фаластинлик урушга жўнатилишга тайёрланмоқда.
Путинга шикоят қилган рус аскарлари қайтадан олд жабҳага жўнатилган
Россия президентига олд жабҳадаги ҳужум бўлинмаларидан мудофаа бўлинмасига ўтказишни сўраб уч марта мурожаат қилган иркутсклик сафарбар жангчилар Донецк вилоятининг Авдиивка шаҳри яқинида қайтадан ҳужум бўлинмасига жўнатилган. Бу ҳақда “Сибир. Реалии” ҳарбий хизматчиларнинг яқинлари ва “Народ Байкала” нашрига таяниб хабар бермоқда.
Февраль ойининг бошида 1439-полкдан сафарбар қилинганлар Россия ҳукумати ва Владимир Путинга видеомурожаат қилган. Ҳарбий хизматчиларнинг сўзларига кўра, улар ноқонуний равишда, ҳужум бўлинмаларига юборилиш учун “ДХР” деб номланган қўмондонликка ўтказилган.
26 февралда, ҳарбий хизматчиларнинг иккинчи видеоси пайдо бўлган куннинг эртасига Иркутск вилояти губернатори Игор Кобзев ҳарбий прокуратурадан бу ҳақда тушунтириш сўрагани ва яқин кунларда сафарбар қилинганлар мудофаага ўтказилишига ваъда берганини айтди.
Куни кеча худди шундай видеомурожаат ҳарбий прокуратура ва Россия Мудофаа вазирлигига Тюмен вилоятидан сафарбар қилинганлар томонидан юборилган эди. Улар фронтга тайёргарликсиз жўнатилганидан шикоят қилишган.
Мобиллаштирилган руслар ёмон хизмат шароитлари, ўқ-дорилар этишмаслиги ва қўмондонлик томонидан зўравонлик ҳақида бир неча бор шикоят қилишди.
Улардан баъзилари Украинадаги жангларни давом эттиришдан бош тортган.
Аввалроқ Би-би-си рус хизмати сўнгги уч ой ичида ҳалок бўлганларнинг аксарияти сафарбар қилинганлар, кўнгиллилар ва маҳбуслар эканини хабар қилган эди. Умуман олганда, уруш бошланганидан бери журналистлар 15 мингдан ортиқ русларнинг ўлимини тасдиқлашга муваффақ бўлишди, уларнинг мингдан ортиғи сафарбар қилинганлардир.
Бахмутда вазият оғир
Украина президенти Владимир Зеленскийнинг маслаҳатчиси Александр Роднянский Россия кучлари ҳозир Бахмутни ўраб олишга ҳаракат қилаётганини айтди.
“Ҳозирча аскарларимиз шаҳарни ушлаб туришибди. лекин керак бўлса, улар стратегик орқага чекинадилар, чунки биз аскарларимизни сабабсиз қурбон қилмоқчи эмасмиз", - деди Роднянский Си-Эн-Эн каналига берган суҳбатида. Агар Бахмут ҳимоячилари чекинса, бу Россияга Украина шарқидаги Краматорск ва Словянск каби йирик шаҳарларига юришига йўл очади.
Украина президенти Владимир Зеленский қамалда қолган Бахмут шаҳри атрофидаги вазият “борган сари мураккаблашиб бораётганини” айтди.
"Бахмут хали ҳам энг оловли нуқта бўлиб қоляпти. Аскарларимиз шаҳарни ушлаб турибди. Баъзи жойларда руслар катта йўқотишларга дучор бўляпти. Бугун генерал Сирский билан гаплашганимда биргина унинг йўналишида 800 га яқин душман аскари йўқ қилинганини маълум қилди. Россия учун эса одамни қиймати йўқ, гўшт қиймалагичга ташлашда давом этмоқда”.
Америка урушни ўрганиш институти тақдим этган сўнгги маълумотга кўра, рус қўшинлари Сватово ва Кременная ҳудудларида чекланган қуруқлик ҳужумларини амалга оширган ва эҳтимол Кременная шимолидан бироз олдинга силжишга эришган. Шунингдек, рус кучлари Бахмут шимолида тактик ютуқларга эришган ва Бахмут атрофида ва Авдиивка-Донецк ҳудудида қуруқлик ҳужумларини давом эттирмоқда,