"Руслар ўзларидан сон-саноқсиз мина қолдирмоқда"
“Настояшчее время” журналистлари Донецк вилоятининг икки ҳафта муқаддам озод этилган Нескучное қишлоғига бориб, украин ҳарбийлари мина тўсиқларидан қандай ўтаётганини ўз кўзлари билан кўришди.
Нескучноеда журналистлар украин аскарлари ҳужумга ўтган пайтда нималарга тўқнаш келишига гувоҳ бўлишди. Энг биринчи ғов – бу сон-саноқсиз миналар.
“Бир оёқни буткул узиб олади, иккинчисини чўлтоқ қилиб қўяди, таносил аъзоларни ҳам узиб олади. Сапёрликни ҳар бир бир аскар ўрганиши керак. Ақалли, миналарни қандай излашни, топишни ўрганиб олиш лозим. Мен фойдаси тегади, деб ўргандим”, дейди Валерий исмли жангчи.
Россия ҳарбийлари бутун ҳудудни миналаб ташлашган, шу боис мазкур йўналишда ҳужумга ўтиш жуда қийин.
“Ҳар бир кўча миналанган. Қишлоққа киришда кўчалар бошига мина шлагбаумлари ўрнатилганди. Биз уларни четга суриб, йўлда давом этганмиз”, дейди Дмитрий исмли аскар.
Ҳужумдаги иккинчи муаммо – Россия ҳарбийлари мустаҳкам ўрнашиб олган жойлар. Нескучноеда асосий форпост мактаб биноси бўлган. У тепаликда жойлашган. Яъни, россияликлар қишлоққа элтувчи барча йўлларни кузатиб турганлар.
“Бу ер жуда яхши позиция, улар шу ердан бизга бемалол ўт очишган”, изоҳ беради Дмитрий.
Украина ҳарбийлари мактабни уч сутка деганда ишғол қилишибди. Аскарлар душманни изма-из таъқиб қилиш ақлдан эмаслигини айтишади.
“Иш одамлар ўйлаганидек осон эмас. Ҳужумми, қарши ҳужумми, бу ерда ҳар бир қишлоқ учун жанг қилиш керак, Мелитополга етгунча эҳ-ҳе қанча қишлоқ бор! Шундай экан, одамлар бизга осон тутишмасин. Лекин биз қўлимиздан келганини қиламиз”, дейди Валерий.
Киевдаги суд биносини портлатган эркакнинг ўзи ҳам вафот этди
Украина ички ишлар вазири Игор Клименконинг хабар беришича, суд биноси ичкарисидан туриб портловчи қурилма ҳаракатга келтирилган. Ҳодиса пайтида 2 нафар махсус хизматчи жароҳат олган.
Ички ишлар вазири Игор Клименко айбланувчи Игор Ҳуменюк экани ва портлаш вақтида унинг ўзи ҳам ҳалок бўлганини маълум қилди. Ҳозирда воқеа жойида сапёрлар ишламоқда.
Хабар қилинишича, Ҳуменюк 2015 йилда тўрт нафар миллий гвардия ходимининг ўлимига алоқадорликда гумонланувчи сифатида судда иштирок этаётган бўлган.
У суд тугагач, ҳожатхонани ичкаридан қулфлаб, иккита портловчи мосламани қўриқчиларга қарата улоқтирган.
Украина рус ҳарбий бўлинмаси йўқ қилинганини даъво қилди
Украина ҳарбийлари Донецк вилоятининг Россия назоратидаги Макиевка туманида рус отрядини йўқ қилганини хабар қилди.
Ҳудуднинг Россия томонидан ўрнатилган расмийлари эса Киев ҳужумларида бир тинч фуқаро ҳалок бўлгани ва 36 нафари яраланганини маълум қилди.
Мудофаа кучларининг аниқ ҳаракатлари натижасида вақтинча ишғол қилинган Макиевкада россиялик террорчиларнинг яна бир отряди йўқ қилинди”, — дея маълум қилди Украина Қуролли кучлари.
Рейтерс видеони сунъий йўлдошдан олинга суратлар билан солиштирган ҳолда тасдиқлашга муваффақ бўлди.
Россиянинг ракета зарбаси оқибатида Львовда тўрт киши ҳалок бўлди
Россия кенг кўламли босқин бошланганидан буён Львовга биринчи бор йирик ҳужум уюштирди.
Украина Ички ишлар вазирлиги тўрт киши ҳалок бўлгани ва 34 киши, жумладан, бир бола яраланганини маълум қилди.
“Улар, руслар, рашистлар ҳарбий объектларни бомбардимон қилишаётганини айтишади, лекин улар тинч аҳоли уйларига зарба беришди. Одамлар ухлаб қолишган. Қандай қилиб улар буни қилишлари мумкин эди? Руслар эса ҳозир байрам қилишяпти. Нима бўлаётганига қаранг. Дунё, бизга ёрдам беринг. Сизсиз уларни биз бир ёқлик қила олмаймиз", дейди шаҳар турғуни Вира Лубен.
Львов мери Андрей Садовий ҳодисани уруш мобайнида Львовга қилинган энг йирик ҳужум деб атади. Львов фронтдан анча олисда ва Полша билан чегарадан 70 км узоқликда жойлашган.
“Мен ғалабага ишонаман. Улар (Украинанинг ҳамкорлари) бизга ёрдам берсин. Йигитларимиз, лочинларимиз ҳамма нарсадан устун келади. Биз жуда кўп фарзандларимиз, ўғилларимиз, оталаримизни йўқотдик. Қанчалаб ногирон, қанча тинч аҳоли ҳалок бўлди. Қаранг, бу фуқаролик объекти, кўп қаватли уй эди! Одамлар ухлаб қолишди ва руслар уларни ўлдиришди!", дейди шаҳар турғуни Вира Лубен.
Украина ҳарбий-ҳаво кучлари Россия Львовни Қора денгиздан учирилган Калибр ракеталари билан бомбардимон қилганини айтди. 10 та ракетадан еттитаси уриб туширилган.
Дрондан олинган тасвирлар кечаси Львов шаҳридаги турар жой биносига Россия ракетаси келиб тушиши натижасида юзага келган вайронагарчилик кўламини кўрсатди.
Президент матбуот хизмати ёйинлаган видеода тўрт қаватли катта турар-жой биноси кўринади: унинг юқори қаватлари йўқ ёки яксон бўлган.
Қутқарувчилар томда куймаланганча харобалар орасидан омон қолганларни излашмоқда, айни чоғда ташқарида ҳовлидаги чанг-тўзонга беланган автомобиллар ёнидан ўтиб-қайтаётган одамларни ҳам кўриш мумкин.