Россия ишғол қилган ҳудудлардан украиналик болалар Белоруссияга олиб кетилмоқда
У ерда улар мафкуравий тарғибот қурбонига айланмоқда.
Белоруссия Қизил Хоч ташкилоти Халқаро Қизил Хоч Қўмитаси хабарисиз болаларни Украина ҳудудларидан олиб чиқишда кўмаклашмоқда. Беларус мухолифати ва Украина ҳукумати буни "депортация" ва "ҳарбий жиноят" деб атамоқда.
Рени шаҳрида учта дон омбори вайрон қилинди
Дрон ҳужуми Одесса вилоятининг Дунай дарёси портига ҳам амалга оширилган. Ижтимоий тармоқларда 24 июл куни эълон қилинган видеолавҳаларда Россиянинг учувчисиз учоғи ҳужумидан сўнг Дунай дарёсидаги Украина дарёси портида шикастланган бункерларни кўриш мумкин.
Рени-Одеса ахборот сайти маҳаллий расмийга таяниб, 15 га яқин дрон иштирокидаги ҳужумда Дунай порти Рени шаҳрида учта дон омбори вайрон бўлганини айтди.
Муҳим транспорт маркази бўлган Рени порти Дунай дарёси орқали НАТО ва Европа Иттифоқи аъзоси Руминияга ўтади.
Зеленский ЕИ давлатларини танқид қилди
Президент Владимир Зеленский душанба кунги кечки кундалик чиқишида Украина учун об-ҳаводек зарур ғалла масаласига бўлган айрим Европа давлатлари муносабатларини танқид қилди.
"Мен ҳукумат вакиллари ва халқаро вакилларимиз билан Украина қишлоқ хўжалиги маҳсулотларини Европа давлатлари ҳудуди орқали экспорт қилиш бўйича кенг қамровли йиғилиш ўтказдим. 15 сентябрда Европа комиссияси билан асосий келишув мавжуд. Бу бизнинг донимиз экспортига қўйилган чекловларнинг охирги муддати. Европа томони вақтинчалик чекловлар амал қилиш тугайдиган ушбу санага оид ўз мажбуриятларини бажаришига ишонамиз. Ушбу чекловларнинг ҳар қандай узайтирилиши мутлақо қабул қилиниши мумкин эмас ва у Европамиз руҳига мос келмайди”, деди Украина раҳбари.
Зеленский Европа Иттифоқининг бешта давлати Украинанинг ғалла импортига қўйган тақиқ муддатини узайтирмасликка чақирди.
Май ойида ЕИ Болгария, Венгрия, Полша, Руминия ва Словакияга Украина буғдойи, маккажўхори, кунгабоқар уруғларини ички сотишни тақиқлаш, шу билан бирга бошқа мамлакатларга экспорт қилиш учун бундай товарларни транзит қилиш имконини берганди.
Марказий Европанинг бешта давлати Европа Иттифоқининг тақиқи ҳеч бўлмаганда йил охиригача узайтирилишини талаб қилиб келади.
Тақиқ муддати 15 сентябрда тугайди.
Уруш зонасида дрон ҳужуми оқибатида яна бир журналист яраланди
Агентлик маълумотларига кўра, AFP видеомухбири Дилан Коллинз Бахмут ҳудудидаги Украина артиллерия позициясида репортажни суратга олиш чоғида “кўплаб шрапнел жароҳатларини олган”. Франс Пресс маълумотича, журналист энг яқин касалхонага эвакуация қилинган, у ҳушида ва ҳаётига ҳеч нарса таҳдид солаётгани йўқ.
"Биз ушбу ҳодисанинг тўлиқ ҳолатларини ўрганмоқдамиз. Бизнинг қалбан Дилан ва унинг оиласи билан," деди Кристин Буҳагиар, AFPнинг Европа директори.
35 ёшли Коллинз АҚШ фуқароси; у доимий равишда Ливанда ишлайди, лекин Украинага хизмат сафари билан келган эди.