Киев ва Одесса яна ракета ва дрон зарбалари остида
2 августга ўтар кечаси рус ҳарбийлари шаҳид дронлари билан яна Киев ва Одессага ҳужум қилди: шаҳарларда тунда портлашлар янгради.
Киев расмийларининг хабар беришича, пойтахтга учаётган барча камикадзе дронлари уриб туширилган, Киев аҳолиси орасида қурбонлар ва жароҳатланганлар йўқ.
"Дронлар гуруҳлари Киевга бир вақтнинг ўзида бир неча йўналишдан кириб келди. Бироқ ҳаво ҳужумидан мудофаа кучлари ва воситалари томонидан барча ҳаво нишонлари - 10 дан ортиқ учувчи аппаратлар тезкорлик билан аниқланиб, йўқ қилинди", дея хабар тарқатди Сергей Попко, Киев ҳарбий маъмурияти раҳбари.
Украинанинг Дунайбўйи ҳудудида ёнғинлар
Бугун тунда Россиянинг "Шаҳид" дронлари ҳужумидан сўнг Дунайдаги Украина портларида ёнғинлар бошланди, ғалла элеватори ишдан чиқарилди, кўплаб хўжалик бинолари вайрон қилинди, деб хабар бермоқда Одесса вилояти маъмурияти раҳбари Олег Кипер.
Қримда портлаш юз берди
Аннексия қилинган Севастопол "губернатори" Михаил Развожаев портлашга уриб туширилган дрон сабаб бўлганини даъво қилмоқда:
"Дастлабки маълумотларга кўра, Қора-Коба ҳудудида дрон уриб туширилган. У Ерга тушиб портлади, дарахтзор ва буталар ёниб кетди. Ўт ўчириш бригадалари аллақачон жойида, ёнғинни ўчиришга киришган”.
Маҳаллий жамоатчилик Балаклава ва Севастопол ташқарисида ҳам портлашлар содир бўлганини хабар қилди.
Ҳовлида бир йил сақланган танк
Дрон ва ракеталардан ташқари жанг майдонида ҳал қилувчи техник восита бу танклар экани шубҳасиз.
Суми вилоятида яшовчи бир шахс бир йилдан ортиқ вақт давомида Т-80УЕ-1 танкини яшириб келган экан.
У катта танкни ўзининг ҳовлисида сақлагани аниқланди. У русларнинг танкини Россия қўшинлари чекинганидан кейин топиб олган ва ҳовлисига ҳар эҳтимолга қарши олиб келиб қўйган.
Ҳозир танк эгаси мулкини Украина армиясига топширгани айтилмоқда.