2023 йилнинг биринчи ярмида Россияга 2022 йилнинг январ-июнига нисбатан 50 мингга кам меҳнат муҳожири келган
Росстат маълумотлари асосида Гайдар институти томонидан ўтказилган тадқиқотнатижаларида шундай дейилади.
Расман қайдга турган Хорижлик ишчилар оқими 15 фоизга қисқариб, 282 минг кишини ташкил этди. Шу билан бирга, деярли барча МДҲ давлатлари ватандошларининг Россияга келишлари камайган. Фақат Тожикистондан келганлар сони 4 минг кишига кўпайди.
Шу билан бирга, ўз ватанига қайтган россияликлар сони камайди.
Россия иқтисодиёти хорижий ишчи кучига муҳтож, деди Владимир Путин 2023 йилги Шарқий иқтисодий форумда. 2030 йилга бориб Россия Федерациясига қўшимча 2,3 миллион киши керак бўлади, дея тахмин қилмоқда Иқтисодий ривожланиш вазири Максим Решетников.
Мутахассисларнинг таъкидлашича, бунга сабаб санкциялар туфайли рублнинг асосий жаҳон валюталарига нисбатан қадрсизланиши, бу ҳам хорижлик ишчиларнинг ватанга юборилган пул ўтказмаларини конвертация қилишда реал даромадларининг қисқаришига олиб келди. Шунингдек, Россия ҳудудига дронлар ҳужуми, иқтисодий-сиёсий изоляция ва аҳоли орасида мигрантофобиянинг авж олиши ҳам бунга сабаб қилиб кўрсатилмоқда.
Аввалроқ Россиядаги ўзбек диаспораси вакиллари ўртасида ўтказилган ва қарийб 23 минг киши иштирок этган сўров натижаларига кўра, ўзбек муҳожирларнинг ярми доллар курси ошиши сабабли Россияни тарк этиш ҳақида ўйлаётганини билдирган.
Илон Маск Украина парламентидан жавоб олди
Илон Маск яна қовун тушурди.
“ 5 дақиқа ўтган бўлса-да, сен эса ҳали бир миллиард ҳам ёрдам сўрамаганингдаги аҳволинг”, — дея ўз твитида Зеленскийнинг мана бу масхараомуз суратини жойлаштирди Маск.
Ўша куниёқ Илон Маск Украина Олий Радасидан муносиб жавоб олди:
“ 5 дақиқа давомида Россия пропагандасини тарқатмаганингдаги аҳволинг”.
Рада Ахборот хизмати Тwиттер’да миллиардерга худди шу мемни юборди.
Кейинроқ твит ўчириб ташланган бўлсада, унинг Зеленский ҳақидаги твити тармоқни жунбушга келтирди ва кейинчалик унинг ўзи масхара объектига айланди.
Украина Президент девони раҳбари маслаҳатчиси Михаил Подоляк Маскнинг твитига бундай жавоб қайтарди:
“Бугунги кунда Украинага оид ҳар қандай сукунат ёки киноя оммавий зўравонлик ва қирғинни оқлайдиган Россия ташвиқотининг бевосита рағбатидир. Афсуски, урушдан минглаб километр узоқликда бўлган ҳатто таниқли шахслар ҳам ҳар куни ўқ узиш ва ота-онасини йўқотаётган болаларнинг ҳайқириқлари нима эканлигини англашга қодир эмас.”
Чеченистон раҳбари Рамзан Қодиров тўнғич қизи Айшатга Чеченистон халқ артисти унвонини берди
Бу ҳақда у ўзининг телеграм-каналида маълум қилди.
Бир кун аввал Қодиров республика ҳукумати раиси Муслим Хучиевнинг Айшат Қодировани ижтимоий блок бўйича Бош вазир ўринбосари этиб тайинлаш ҳақидаги таклифини қўллаб-қувватлашини маълум қилганди. Бундай ҳолда, агар отасига бирор нарса бўлса, у республикани бошқариши мумкин.
Рамзаннинг 14 фарзандларидан тўнғичи бўлган Айшат Қодирова 2021 йил октябр ойида Чеченистон маданият вазири этиб тайинланган эди - ўшанда у 22 ёшда эди. Бунгача у бир йил Маданият вазирининг биринчи ўринбосари лавозимида ишлаган. АҚШ, Европа Иттифоқи ва Япония Айшатга қарши санкциялар киритган.
Айшат Қодирова аввалроқ “Фирдавс” модалар уйи раҳбари сифатида ҳам танилган. Ушбу бренд коллекцияларининг тақдимотлари Париж, Дубай ва Москвада бўлиб ўтди.
Қодировнинг бошқа фарзандлари ва унинг яқин ва узоқ қариндошлари ҳам Чеченистонда раҳбарлик лавозимларида ишлайди. Мисол учун, унинг қизи Хадижат Грозний мериясининг мактабгача таълим бўлими бошлиғи бўлиб ишлайди, унинг турмуш ўртоғи Адам Алханов эса Чеченистон бош вазири ўринбосари лавозимида ишлайди. Яна бир қизи 20 ёшли Хутмат Қодирова жорий йилнинг март ойида республика соғлиқни сақлаш соҳасига куратор лавозимига тайинланган эди. Чеченистон раҳбарининг 18 ёшли ўғли Ахмат Қодиров Россия болалар ва ёшлар ҳаракатининг Чеченистон бўлими раҳбари. Рамзаннинг онаси Аймани “Ахмат Қодиров” номидаги жамоат фонди президенти ва “Лайнер-1” компанияси асосчиси.
Қодировлар оиласига тегишли яна бир хабар…
Инстаграм Рамзан Қодировнинг ўғли Адамнинг саҳифасини блоклади. Эслатиб ўтамиз, аввалроқ у Қуръонни ёқишда айбланган россиялик Никита Журавелни ҳибсхонада калтаклаган эди.
Зеленский фронт яқинидаги вазиятни ўрганди
Украина президенти Владимир Зеленский шарқий фронтга ташриф буюриб, қўмондонлар билан жанг майдонидаги вазиятни муҳокама қилди. Зеленский ўзининг тунги видеомурожаатида Харков яқинига боргани ҳамда Украинанинг қуруқликдаги кучлари қўмондони Александр Сирскийнинг ҳудудий мудофаа ва Бахмут яқинидаги ҳужум ҳаракатлари ҳақидаги ҳисоботини қабул қилиб олганини айтди.
Президент Харковда қишга тайёргарликнинг боришини ҳам муҳокама қилган. Келаётган қишда Россиянинг Украина энергетика инфратузилмасига зарбалари кучайиши кутилмоқда.
Киев қарши ҳужум бошлаганидан бери секин илгарилаётгани айтилади. Зеленский ҳарбий стратегия иш бермаётгани ҳақидаги танқидларни рад этди.
Президент матбуот хизмати тарқатган кадрларда Зеленский ўрмондаги яширин жойларда “Леопард 2” танки ва Швецияда ишлаб чиқарилган “CВ90” жанговар машинасини кўздан кечираётгани акс этган.