Путин ҳарбий хизматчилари сонини 170 минг кишига оширмоқчи
Россия президенти Владимир Путин Россия қуролли кучларидаги ҳарбий хизматчиларнинг максимал сонини 170 минг кишига ошириш тўғрисидаги фармонни имзолаган.
Бу ҳақда Россия Мудофаа вазирлиги хабар берди.
Ҳужжатга кўра, эндиликда қуролли кучларнинг мунтазам сони 1 миллион 320 минг нафар ҳарбий хизматчи этиб белгиланди.
“Қуролли кучлар сонининг оширилиши махсус ҳарбий операция ва НАТОнинг давомли кенгайиши ортидан кучайган таҳдидлар билан боғлиқ”, — деди Россия мудофаа вазирлиги банотида.
Вазирлик, шунингдек, ҳарбий хизматчилар сонининг кўпайиши контракт бўйича ходимларни жалб қилиш билан боғлиқлигини, ҳарбийлар муддатли ҳарбий хизматни сезиларли даражада ошириш ёки сафарбарликнинг янги тўлқинини ўтказишни режалаштирмаганлигини айтмоқда.
Россиянинг собиқ президенти, ҳозирда Россия Хавфсизлик кенгаши раиси ўринбосари Дмитрий Медведев жума куни 2023 йилнинг 1 январидан 1 декабрига қадар Россия армиясига шартнома бўйича 452 мингдан ортиқ киши жалб қилинганини айтди.
Айни пайтда Россияда ҳарбий ёшдаги эркакларни кўчада, метрода, савдо марказларида ушлаб, куч билан сафарбарликка жалб қилинаётгани ҳақида хабарлар олинмоқда.
Октябр ойидан бери Россия бўйлаб Россия паспортини олган меҳнат муҳожирларига қарши рейдлар ўтказилмоқда.
Улардан баъзилари ёрдам сўраб ҳуқуқ ҳимоячиларига мурожаат қилишган, лекин бу чақирув устидан судга шикоятлар натижа бермаган. Рейдлар сони мисли кўрилмаган даражада кўп экани, уруш бошланганидан бери Россияда бунақа кўламда ҳарбий чақирув бўйича кузатилмаганини айтишмоқда ҳуқуқ фаоллари.
Козондаги суд Алсу Курмашевага нисбатан қамоққа олиш муддатини икки ойга узайтирди
Россия суди россиялик америкалик журналист Алсу Курмашевага нисбатан қамоққа олиш муддатини икки ойга узайтирди.
У “хорижий агент” сифатида рўйхатдан ўтмаганликда айбланмоқда.
Қозон суди Курмашевани ҳибсда сақлаш муддатини 5 февралгача узайтирди.
Курмашева АҚШ Конгресси томонидан молиялаштириладиган ва Россия томонидан чет эл агенти деб эълон қилинган Озод Европа/Озодлик Радиосининг Прагадаги журналисти.
"Ўртача оғирликдаги жиноятда айбланаётган шахсни ҳибсда ушлаб туриш мумкин эмас. Бу ҳолатда, биз суд эҳтиёт чорасини танлашда нохолислик қилмоқда, деб ҳисоблаймиз. Чунки бу зўравонликсиз жиноятдир. Ҳеч бўлмаганда, Олий суднинг позициясига кўра, бундай жиноятда айбланаётганлар ҳибсда сақланмаслиги керак", дейди Курмашеванинг адвокати Рим Сабиров.
АҚШ ва Россия паспортига эга Курмашева 20 май куни оилавий сабаб фавқулодда Россияга кирган.
У 2 июн куни қайтиш рейсини кутаётган вақтда ҳибсга олинган ва паспортлари мусодара қилинган эди.
Курмашева 2022 йил бошида Украина можароси бошланганидан бери ҳибсга олинган иккинчи америкалик журналистдир.
Март ойида The Wall Street Journal мухбири Эван Гершкович жосусликда айбланиб ҳибсга олинган эди. АҚШ президенти Жо Байден, Гершкович ва газета унинг жосус эканлигини инкор этган.
Ғарб давлатлари саҳналаридан ҳайдалган Гергиев "Большой театр"га раҳбар бўлди
Россиянинг Украинага урушни қўллаб-қувватлагани учун Ғарб давлатларида концертлари бекор қилинган россиялик дирижёр Валерий Гергиев Москванинг Большой театри директори этиб тайинланди.
Бу тайинлаш 70 ёшли Гергиевга Россиянинг иккита нуфузли опера ва балет театрини бошқариш ҳуқуқини беради, чунки у 1996 йилдан бери Санкт-Петербургдаги Мариинский театрига ҳам раҳбарлик қилиб келади.
Ўнлаб йиллар давомида жаҳоннинг энг йирик классик саҳналарида чиқиш қилган Гергиев 2022 йилнинг февралида уруш бошланганидан кейин Ғарбда исталмаган шахсга айланди. Уни концертлари бекор қилинди, Мюнхен филармонияси оркестрининг бош дирижёрлигидан ҳам бўшатилди.
Гергиев Большой театрга 10 йил раҳбарлик қилган Владимир Урин ўрнини эгаллади.
Ҳукумат эълонида айтилишича, Урин ўз лавозимидан озод этилишини сўраган, бироқ у ҳеч қандай сабаб кўрсатмаган.
Урин 2022 йил февралида ҳарбий амалиётларни тўхтатиш, Украинадан қўшинларни олиб чиқиш ва музокараларни тўхтатишга чақирувчи очиқ хатни имзолаган 17 та таниқли маданият арбобларидан бири эди.
Украина Мудофаа вазири: Россия босқинига қарши кураш режа бўйича кетмоқда
Украина Мудофаа вазири Рустем Умеров Россия босқинига қарши кураши режа бўйича кетаётганини айтиб, Украина яхши тайёрланган рус армияси устидан тезда ғалаба қозонишини кутиш соддалик, деган танқидларга жавоб қайтарди.
«Бизга ҳужум қилишгани, русларнинг уларга жавоб қайтара олмаслигимизни ўйлашгани аслида лақмалик. Муаммо шундаки, биз режа бўйича ҳаракат қиляпмиз. Фақат уларни ўлдириш орқали, чекинишга мажбур қиламиз, чунки улар бизнинг ҳудудимизда», дейди Украина мудофаа вазири Рустем Умеров.
Умеров мамлакати глобал уруш олиб бораётганини ва Россиянинг Киев курашни давом эттирмайди деб ўйлаши лақмалик бўлишини айтди.
АПга берган интервьюсида Умеров Украинани ҳимоя қилишни «Худо берган ҳуқуқ» деб атади.
Миллати қрим татар бўлган Умеровнинг мудофаа вазири лавозимга тайинланиши коррупция билан боғлиқ можаролар ортидан содир бўлди. Мудофаа вазирлигининг бир неча амалдорлари ишдан бўшатилди.
Украина президенти Владимир Зеленский собиқ тадбиркор Рустам Умеровни қурол етказиб бериш ва хусусий сектордаги тажрибаси учун танлаганини билдирган.