Россия Мудофаа вазири рус ҳарбийлари сонини 1,5 миллион одамга етказишини маълум қилди
Россия Мудофаа вазири Сергей Шойгу 19 декабр куни президент Владимир Путин ва юқори даражадаги мудофаа амалдорлари иштирокидаги йиғилишда Россия ўзи “махсус амалиёт” деб атаб келаётган уруш ҳаракатлари бошланганидан бери танк ишлаб чиқаришни 5,6, дронларни - қарийб 17, артиллерия снарядлари сонини 17,5, зирҳли техникани 3,5 баробарга оширганини айтди.
“Армия ва флотни кадрлар билан таъминлаш бўйича барча режалар тўлиқ бажарилди, уларнинг сони 1 миллион 150 минг нафар ҳарбий хизматчиларга етказилди. Иккита қўшма қуролли армия ва аралаш авиация корпуси тузилди ва кадрлар билан таъминланди. . . 1 декабрдан бошлаб биз 1 миллион 320 минг кишилик кучларни тўплаш тўғрисидаги фармонни амалга оширишга киришдик. Финляндия ва Швециянинг НАТОга кираётгани муносабати билан биз Ленинград ва Москва ҳарбий округларини тузмоқдамиз. Ташқи таҳдидларга мутаносиб равишда, Қуролли Кучлар ҳажми кейинчалик 1,5 миллион ҳарбий хизматчига етказилади”, деди Сергей Шойгу.
У, шунингдек, Россия Украинадаги 2000 километрлик фронт чизиғи бўйлаб 7 минг квадрат километр миналанган майдонларни ўрнатганини қўшимча қилди. Вазирнинг сўзларига кўра, жорий йилда армияга 490 мингга яқин кўнгилли ва шартнома бўйича аскар жалб этилган.
Ўша йиғилишдаёқ сўзга чиққан президент Путин, Россия мудофаа саноати Украинадаги можарога Ғарбга қараганда тезроқ жавоб бера олганини иддао қилди.
Путин янги муддат президентликка ҳужжат топширди
Ҳаага халқаро трибунали қидирувида қолаётган Россия президенти Владимир Путин душанба куни Россия Марказий сайлов комиссиясига ҳужжатларни тақдим этиб, 2024 йилги президентлик сайловларида ўз номзодини расман рўйхатга олиш йўлида яна бир қадам ташлади.
Шанба куни Путин тарафдорлари уни 2024 йилги президентлик сайловларида мустақил номзод сифатида кўрсатди.
Путин номзодини илгари сурган гуруҳга ҳукмрон “Ягона Россия” партиясининг юқори мартабали амалдорлари, таниқли россиялик актёр ва қўшиқчилар, спортчилар ва бошқа жамоат арбоблари киритилган.
Путин ҳужжатларни топширгандан сўнг махсус гуруҳга қўллаб-қувватлаш учун имзо тўплашни бошлашга рухсат берилади. Сайловда рўйхатдан ўтиш учун мустақил номзодлар 40 ва ундан ортиқ ҳудуддан камида 300 минг имзо тўплаши керак.
Путин йиллар давомида турли тактикаларни қўллади. 2018 йилда у мустақил номзод сифатида қатнашган ва у учун минтақаларда овоз йиғилган. 2012 йилда у Кремлнинг “Ягона Россия” партиясидан номзод сифатида иштирок этган, шунинг учун имзо тўплаш шарт эмас эди.
Шу ой бошида Россияда қонунчилар 2024 йилги президентлик сайловини 17 мартга белгилаб, Путинни бешинчи президентлик муддатига бир қадам яқинлаштирди.
У ўтказган конституциявий ислоҳотларга кўра, Путин келаси йили амалдаги ваколат муддати тугаганидан кейин яна икки олти йиллик муддатга сайланиш ҳуқуқига эга бўлиб, ҳокимиятни 2036 йилгача сақлаб қолиши мумкин.
Унинг 24 йиллик ҳокимиятида Россиянинг сиёсий тизими устидан ўрнатган қаттиқ назорати март ойида бўлажак сайловда яна ғолиб чиқишида шубҳа қолдиргани йўқ. Унга овоз беришда эътироз билдириши мумкин бўлган таниқли танқидчилар қамоқда ёки хорижда яшайди ва аксарият мустақил оммавий ахборот воситалари тақиқланган.
Украина янги типдаги арзон дронларни ишлаб чиқаради
Украинада “Кобра” типидаги ҳужумчи учувчисиз учоқларни серияли ишлаб чиқариш йўлга қўйилди. У шахедга ўхшайди, аммо нархи атиги 2 минг доллар. Тахминан 15 кг портловчи моддаларни 300 км дан ортиқ масофага олиб юра олади. Тезлиги - 150 км/соат. Дрон маршрут ва мақсадни мустақил белгилаб, автоном ишлай олади.
Муҳандислар уч соат ичида бундай дрон ясашлари мумкин. Дрон учун электроника, двигател ва парраклар Украинанинг ўзида яратилган.
Киев шаҳри Россиянинг учувчисиз учоқлари оммавий ҳужумига учради
Шаҳар мери Виталий Кличконинг айтишича, дрон шаҳар маркази жанубидаги Соломенский туманидаги турар-жой биносига қулаган ва ёнғин келиб чиққан.
Кличко, шунингдек, Днепр дарёсининг шарқий қирғоғидаги Дарницкий туманидаги хусусий уйга учувчисиз учоқ ёрдамида зарба берилгани, бир киши жароҳатлангани ҳақида хабар берди.
Киев ҳарбий маъмурияти раҳбари Сергей Попконинг маълум қилишича, уриб туширилган дрон парчалари шаҳар марказининг жанубидаги учинчи туман – Голосеевский туманидаги турар-жой биносига келиб тушган.