Россия МСКси мухолифатчи номзодни президент сайловларига қўймади
Россия Марказий сайлов комиссияси ржевлик журналист Екатерина Дунцованинг президентликка номзодини қўйиш учун имзо тўплашига рухсат бермади. Унинг ҳужжатларида гўё юздан ортиқ хатолик аниқлангани айтилди.
Комиссия аъзолари ташаббус гуруҳини рўйхатга олишни рад этиш учун бир овоздан овоз берди.
"Екатерина Сергеевна, сиз ёш аёлсиз, ҳамма нарса олдинда. Ҳар қандай минусни плюсга айлантириш мумкин, ҳар қандай салбий тажриба ҳам тажрибадир", - деди МСК раиси Элла Памфилова.
Россияда президентлик сайловлари март ойининг ўрталарига белгиланган.
Ўз-ўзини кўрсатиш учун номзод мамлакатнинг камида 40 та ҳудудидан сайловчиларнинг камида 300 минг имзосини тўплаши ва Россия Марказий сайлов комиссиясига тақдим этиши керак.
Ўтган ой 40 ёшли Дунцова берган интервюсида Украинадаги можарога чек қўйиш ва сиёсий маҳбуслар, жумладан, Алексей Навалнийни озод қилишга чақирган эди. Россия мухолифатининг кўплаб вакиллари Дунцовнинг рўйхатга олинишини қўллаб-қувватладилар.
Олдинроқ Россиянинг амалдаги президенти 71 ёшли Владимир Путин, ЛДПР партиясидан 55 ёшли Леонид Слуцкий, Россия Федерацияси Коммунистик партиясидан 75 ёшли Давлат Думаси депутати Николай Харитонов ва Донецкдаги россияпараст айирмачиларнинг ҳарбий раҳбари, тергов изоляторида сақланаётган Игор Стрелков сайловларда иштирок этишини маълум қилган эди.
Навальнийнинг қаердалиги 17 кундан бери номаълум
Ўтган йил ўрталаридан бери қамоқда сақланаётган Путиннинг ашаддий танқидчиси Алексей Навалний 17 кундан бери қаерда эканлиги номаълум.
Россиялик мухолифатчининг матбуот котиби Кира Ярмишнинг айтишича, Навалний Владимир вилоятидаги колониядан номаълум жойга олиб кетилган, унинг жамоаси йўқолганлиги ҳақида қўшимча маълумот сўраб Россиянинг 200 га яқин тергов ҳибсхонасига сўров юборган, лекин уни топа олмади:
"Адвокатлар уни охирги марта 6 декабрда кўришган. Ўшандан бери биз унинг қаердалигини билмаймиз. Ҳозир эса унга нима бўлаётганини билмаймиз. Биз уни бир колониядан бошқасига кўчиришмоқда, деб ўйлаймиз. Лекин бизда бу борада ҳеч қандай расмий ҳужжат йўқ”.
Шу йилнинг август ойида Навальний биринчи иш бўйича берилган 11,5 йилга қўшимча равишда 19 йиллик қамоқ жазосига ҳукм қилинганди. Унинг ғойиб бўлиши президентлик сайловлари кампанияси бошланишига тўғри келди, унда Владимир Путин жума куни яна олти йиллик муддатга сайланишини тасдиқлади.
Вазиятга Кремлдан ҳеч қандай изоҳ берилмади.
47 ёшли Навалний Россия мухолифатидаги энг таниқли шахс ҳисобланади. У бир неча йиллар давомида Путин ва ҳукмрон элитани “фирибгарлар ва ўғрилар” тўдаси деб атаган, Ютубда миллионлаб марта кўрилган видеоларда улар қилмишлари ҳақида лавҳалар ҳозирлаган.
У Сибирда заҳарли восита билан ўлдиришга уринишдан кейин Германияда даволанган, лекин 2021 йилда Германиядан Россияга ўз ихтиёри билан қайтиб келганида, ҳибсга олинган.
Киевда яна бир совет ёдгорлиги демонтаж қилинди
Киевдаги Мариинский боғида “1918 йил январ қуролли қўзғолони” иштирокчиларига ўрнатилган ёдгорлик демонтаж қилинди, деб хабар бермоқда Киев шаҳар давлат маъмурияти матбуот хизмати.
Чехия ватанига қайтишни хоҳловчи украиналик қочқинларга молиявий ёрдам беради
Чехия ҳукумати Россиянинг тўлақонли босқини бошланганидан сўнг ўз юртидан қочиб келган, аммо эндиликда ватанларига қайтиш истагида бўлган Украина фуқароларига молиявий ёрдам кўрсатади. Мамлакат президенти Пётр Павел тегишли қонунга имзо чекди.
Ҳукумат тўлов миқдорини белгилаганича йўқ, лекин шуниси аниқки, ушбу тўловни олиш ҳуқуқидан фақат бир марта фойдаланиш мумкин бўлади. Ёрдам пули олган украиналиклар кейинчалик Чехияга қайтишларига рухсат этилади, аммо бунинг учун тўловнинг ярмини қайтаришлари керак бўлади.
Қонун асосламасида уруш яқин орада якунланиши эҳтимоли пастлиги сабабли украиналик қочқинларни ҳимоя қилиш дастури 2025 йил 31 мартга қадар узайтирилиши қайд этилган.
Халқаро миграция ташкилоти (IOM) сўровига кўра, Чехияда бўлиб турган украиналик қочқинларнинг 10 фоизи тез орада ватанига қайтишни режаламоқда, 66 фоизи эса қачондир қайтишга умид қилади. Айни чоғда 75 фоиз қочқин Чехиядан бошқа мамлакатга кўчиб ўтиш нияти йўқлигини билдирган.