Украина прокуратураси 7 нафар украин ҳарбий асирининг отиб ўлдирилган бўлиши эҳтимолини ўрганмоқда
Украинанинг Донецк вилояти прокуратураси 7 нафар украин ҳарбий асири Россия ҳарбийлари томонидан отиб ўлдирилган бўлиши эҳтимоли бўйича текширув бошлади.
Асирлар қатли акс этгани айтилаётган видеоёзув 25 феврал куни турли телеграм-каналларда ёйинланган эди.
Текширув уруш қонунлари ва одатларининг бузилишига доир моддага кўра ўтказилмоқда, дея маълум қилди Украина бош прокурори офиси.
Дастлабки маълумотга кўра, асирлар Ивановское ҳамда Хромово қишлоқлари орасидаги украинлар позицияларини ишғол қилиш вақтида отиб ташланган.
Дрондан олинган тасвирларда бир гуруҳ аскар бир неча қадам масофадан бошқа бир гуруҳ ҳарбийга ўқ отган. Ўққа тутилганлар, – муҳтамалан украин ҳарбийлари – қуролсиз экани кўринади.
Украина Олий Радасининг инсон ҳуқуқлари бўйича вакили Дмитрий Лубинец қатл 24 феврал куни Бахмут туманида рўй берганини ва камида етти украин аскари ўлганини айтди.
Deep State лойиҳасига кўра, ўлганлар, катта эҳтимол билан 92-махсус штурм бригадаси жангчилари бўлган ва улар етти эмас, 9 нафар бўлганлар.
Бу – сўнгги ойдаги учинчи қатл ва энг кўп асирлар ҳалок бўлган воқеа дея қайд этилмоқда.
Айни пайтда Украинада Россия ҳарбийларининг муҳтамал ҳарбий жиноятлари, жумладан асирларнинг отиб ташланишига доир 50 мингдан зиёд жиноят иши тергов қилинмоқда.
Россия Мудофаа вазирлиги бу айбловларни ё инкор этади, ё изоҳсиз қолдиради.
Украин ҳарбийлари: "Ғалабага қозонгунча курашамиз!"
Украин ҳарбийлари ўқ-дори ва аскарлар етишмаслиги уларни ноқулай аҳволга солиб қўйгани, бироқ бу жангни давом эттиришга тўсқинлик қилмаслигини айтади.
Бахмут яқинида жанг қилаётган 43-бригада артиллерия бўлинмаси ҳарбий хизматчилари ўқ-дори захираси камайиб бораётганини билдирди.
Бўлинманинг асосий қуроли Панзергаубитса русумли ўзиюрар гаубицалар ҳамда 155 ммли ўрта масофага мўлжалланган артиллерия тизими.
Бўлинма командири 29 ёшли Рис исмли ҳарбийга кўра захиралар аввалгидан 20 фоизга камайиб улгурган.
Рис профессионал ҳарбийлардан бири, у босқин бошланганидан бери бўлинмани бошқариб келмоқда.
«Илгари омбор ўқ-дориларга тўла эди, юзлаб снарядлар бор эди. Ҳозир бизда тахминан захиранинг 20 фоизи қолган. Ҳарбий таъминот аввалгидан анча камайган», дейди бўлинма командири Рис.
Украина Мудофаа вазири Рустем Умеров ўтган ҳафта ўқ-дори тақчиллиги катта муаммо бўлаётганини айтган эди.
НАТО 23 февраль куни 155 миллиметрли артиллерия снарядлари сотиб олиш бўйича 1,1 миллиард евролик (1,2 миллиард доллар) шартнома имзолади. Снарядларнинг бир қисми Украинага етказиб берилиши маълум қилинган.
НАТО таъминот агентлиги (NSPA) бир нечта иттифоқчилар номидан келишувга эришган. Унга кўра, Украинага снарядларнинг бир қисми етказиб берилса, қолган қисми бўшаб қолган захирани тўлдиришга йўналтирилади.
Руслар "Абрамс" танкини йўқ қилганини айтмоқда
Россия Мудофаа вазирлиги ўз кучлари Украина кучларининг Авдеевка, Купянск ва Донецк каби турли йўналишларда кўплаб ҳужумларини қайтарганини маълум қилди.
Бундан ташқари, рус қўшинлари Авдеевка йўналишида АҚШ томонидан Украина армиясига тақдим этилган М1 Абрамс асосий жанговар танкини йўқ қилганини хабар қилмоқда.
Олдинроқ Украина ҳарбийлари АБрамс танкларининг Авдеевка йўналиши бўйича қарши ҳужумларда иштирок этаётгани видеосини тақдим этганди.
Украинлар Ласточкино қишлоғини тарк этганини тасдиқлади
Украина Қуролли кучлари Бош штаби Украина кучлари сўнгги 24 соат ичида Россиянинг бир қанча ҳужумларини қайтарганини маълум қилди. Украина Қуролли Кучлари Авдеевский йўналишидаги Ласточкино қишлоғини ташлаб чиққанини расман тасдиқлади:
"Бўлинмалар Орловка, Тоненкое, Бердичев аҳоли пунктлари чизиғи бўйлаб мудофаани ташкил қилиш ва душманнинг ғарбга қараб ҳаракатланишига йўл қўймаслик учун Ласточкино қишлоғидан чекинишди", деди "Таврия" оператив қўмондонлиги вакили Дмитрий Лиховий.
Айрим норасмий маълумотларга кўра, Россия Қуролли кучлари Донецк вилоятидаги Степное ва Северное шаҳарларини эгаллаб олган. Шунингдек, руслар Орловка, Бердичев ва Тоненькое қишлоқлари яқинида олдинга силжишган, деб айтилмоқда.
Украина ҳарбий-ҳаво кучлари ва ракета бўлинмалари ҳам Россия қўмондонлик пункти, дронларни ердан бошқариш пунктлари ва бошқа объектларга ҳужум қилди.
Озодлик урушаётган томонлар эълон қилаётган маълумотларни тезкор текшириш имкониятига эга эмас.