Украина президенти Владимир Зеленский АҚШ президенти Дональд Трамп ва Конгресс аъзоларига мактуб жўнатди. Зеленский мактубда Украинанинг ҳаво мудофаасига ёрдамни кучайтиришни сўраганини айтди.
У ўзининг кечки видео мурожаатида дунё эътибори бошқа можароларга, жумладан Эрондаги урушга қаратилаётганини таъкидлаб, Европадаги уруш ҳали ҳам “жуда қонли” эканини ва уни тўхтатиш зарурлигини билдирди.
- Бошқа бир давлат раҳбари АҚШ президенти ва Конгрессига бир вақтнинг ўзида мактуб юбориши жуда кам учрайди. Аммо ҳозирги вазият тез ва самарали ҳаракат қилишни талаб қилади. Америка Украина овозини эшитиши муҳим. Биз тушунамизки, ҳозир дунё эътибори Эрондаги урушга қаратилаяпти. Лекин Европадаги бу уруш ҳам тўхтатилиши керак — бу жуда қонли уруш бўлиб, кенг кўламли босқичда бешинчи йилни бошдан кечирмоқда, деди Украина президенти.
Бу баёнот Трамп ва АҚШ қонун чиқарувчиларига юборилган мактубдан кейин айтилди.
Унда Украина ҳаво мудофааси имкониятлари, айниқса, Россиянинг баллистик ракеталарини ушлаб қолишда қўлланиладиган АҚШда ишлаб чиқарилган “Patriot” тизимлари етишмаётгани таъкидланган.
Мактубга кўра, Украина бундай ҳужумларга қарши курашда “деярли фақат” Patriot тизимларига таянади, аммо мавжуд таъминот механизмлари таҳдид миқёсига мос келаётгани йўқ.
Украина ҳаво кучлари маълумотига кўра, Россия якшанба куни амалга оширган сўнгги йирик ҳужумда 30 та баллистик ракета қўллаган, улардан фақат 11 таси уриб туширилган.