Эрон Оммавий Ахборот Воситалари хабар беришича, Эрон ва АҚШ ўртасида Ҳормуз бўғозини очиш бўйича келишувга эришилмаган. Бу ҳақда Эрон Миллий хавфсизлик олий кенгаши котиби ўринбосари Али Бағорий маълум қилди.
Бағорийнинг айтишича, Эрон ва Уммон ҳозирда ушбу стратегик сув йўли орқали кема ҳаракатини тартибга солувчи янги механизм устида музокара олиб бормоқда. Шу билан бирга, Эрон ва АҚШ ўртасида билвосита алоқалар давом этмоқда.
У, шунингдек, Эроннинг бойитилган уран захиралари “мавжуд музокаралар кун тартибига кирмаганини” таъкидлади.
Эрон Ислом Инқилоби Қўриқчилари Корпуси денгиз кучлари маълум қилишича, сўнгги 24 соат ичида улар рухсати билан 23 та кема Ҳормуз бўғозидан ўтган.
АҚШ президенти Дональд Трамп вазирлар маҳкамаси йиғинида Эрон келишувга эришишни жуда истаётганини, аммо АҚШ ҳозирча келишувдан қониқмаганини билдирди.
- Содир бўладиган нарсалардан бири Ҳормуз бўғози дарҳол очилади. Дарҳол. Лекин у мукаммал бўлиши керак. Мен бундай ишни арзимас келишув учун қилмайман. Бўғоз ҳамма учун очиқ бўлиши керак. Бу халқаро сув. Уни ҳеч ким назорат қилмайди. Биз уни кузатиб борамиз, лекин ҳеч ким назорат қилмайди. Бу музокараларимизнинг бир қисми. Улар назорат қилишни истайди. Лекин ҳеч ким назорат қилмайди — бу халқаро сув. Уммон ҳам бошқалар каби ўзини тутади, акс ҳолда биз уларни йўқ қилишга мажбур бўламиз. Улар буни тушунади. Ҳаммаси жойида бўлади, деди Доналд Трамп.
Инқилоб корпуси ахборот манбаи Sepah News маълум қилишича, нефть танкерлари, контейнер кемалари ва бошқа тижорат кемалари корпус кучлари ҳамкорлиги ва ҳимояси остида бўғоздан ўтган.
Шу куни АҚШ Марказий қўмондонлиги Ҳормуз бўғози блокадаси бошлан 13 апрелдан бери 109 та тижорат кемаси йўналтирилганини билдирди.