Ўзбекистонлик Шаҳзод Нурматов ва Собиржон Сафаролиев Амстердамда ўтаётган академик эшкак эшиш бўйича жаҳон чемпионатининг енгил вазнли эркаклар ўртасидаги жуфтлик дастурида ғолиб чиқиб, мамлакат тарихида катталар ўртасидаги жаҳон чемпионатининг илк олтин медалини қўлга киритди.
Ўзбекистон жуфтлиги 27 август куни 2000 метрлик финал масофасини 6 дақиқа 21,93 сонияда босиб ўтди. Улар Германия вакиллари Навин Шоҳ ва Максимилиан Рюлингдан 1,94 сония олдин маррага етиб келди. Америкалик Жейми Копус ва Шон Ричардсон учинчи ўринни эгаллади. Ўзбекистон жуфтлигининг ғалабаси ҳақида Eurovision Sport ҳам хабар бериб, финал пойгаси видеосини эълон қилди.
Бу натижа Ўзбекистон учун тарихий бўлса-да, мутлақо кутилмаган эмасди.
World Rowing чемпионат бошланишидан олдин Нурматов ва Сафаролиевни мусобақадаги энг тажрибали экипаж деб атаган. Улар 2024 йилги Париж Олимпиадасида бирга қатнашган ва жорий йил июнида Болгарияда ўтказилган Жаҳон кубогининг иккинчи босқичида ғолиб чиққан.
2025 йилги жаҳон чемпионатининг бирорта ҳам медаль соҳиби Амстердамдаги енгил вазнли эркаклар жуфтлик пойгасида қатнашмади. Амалдаги жаҳон чемпионлари — Хитой экипажи мусобақага келмади. Ўтган йили кумуш ва бронза медалларини олган Индонезия ва Германия экипажлари ҳам бу сафар қатнашмади.
Париж Олимпиадасида медаль олган экипажлар ҳам Амстердамда ушбу дастурда иштирок этмади. Икки карра Олимпиада чемпионлари — ирландиялик Финтан Маккарти ва Пол О’Донован жуфтлик пойгасига чиқмади. Парижда кумуш олган Италия ҳамда бронза олган Греция экипажлари ҳам қатнашмади.
Рақобатнинг пасайиши енгил вазнли академик эшкак эшишнинг 2024 - Париж Олимпиадасидан кейин Олимпиада дастуридан чиқарилиши ортидан юз берди. Лос-Анжелесдаги 2028 йилги Олимпиадада унинг ўрнини соҳилдаги эшкак эшиш спринти эгаллайди. Бу ўзгариш етакчи мамлакатларни спортчилари ва маблағларини Олимпиада дастурида қолган йўналишларга ўтказишга ундамоқда. Масалан, О’Донован Амстердамда жуфтлик эмас, енгил вазнли яккалик дастурида қатнашди.
Бир қатор кучли экипажлар йўқлигига қарамай, Нурматов ва Сафаролиев финалда ишончли ғалаба қозонди. Улар дастлабки 500 метрда рақибларидан қарийб икки сониялик устунликка эришиб, маррагача пешқадамликни сақлаб қолди.
Бу ғалаба ўзбек экипажининг сўнгги йиллардаги кескин ўсишини кўрсатади. Нурматов ва Сафаролиев 2022 йилги жаҳон чемпионатида 25-ўринни, Париж Олимпиадасида эса 15-ўринни эгаллаган эди. Амстердамдаги натижа расман жаҳон чемпионлиги ҳисобланади, бироқ у Олимпиада дастуридан чиқарилганидан кейин етакчи спортчилар иштироки камайиб бораётган йўналишда қўлга киритилди.
Форум