Ўзбекистон Бош прокуратураси Тошкентдаги янги қурилган уйлардан бирида 32 ёшли аёлнинг ўлими сабаблари ва ҳолатларини ўрганишга киришган.
Бу ҳақда маълум қилган БП матбуот котиби Ҳаёт Шамсутдинов ўрганиш натижаларига кўра қўшимча маълумот берилишини билдирган.
Аввалроқ ижтимоий тармоқларда пойтахтдаги янги қурилгани туфайли одам кам яшайдиган уйлардан бирида 24 июль куни электр узилгани ортидан лифтда қамалиб қолган почтачи аёл Л. О. вафот этгани ҳақида хабарлар тарқалган.
Ўзбекистонлик блогер Никита Макаренко ўз Телеграм-каналида воқеа тафсилотларини “Тошкентдаги электр ўчирилишининг биринчи қурбони” сарлавҳаси остида берган.
Унга кўра, Паркент кўчасида жойлашган 239-кўп қаватли уй электр таъминотидан узилган, натижада 32 ёшли почтачи аёл лифтда қамалиб қолган. Видеоқайдда унинг лифтга киргани акс этган. Лифт бинонинг сўнгги қаватида тўхтаб қолган.
“Янги қурилган уйга ҳали одамлар тўла кўчиб ўтган эмас ва афтидан, қўшнилар аёлнинг чақириқларини эшитишмаган”, деб ёзган Никита Макаренко ҳеч ким ёрдамга келмагани учун почтачи лифтнинг ичида вафот этганини қўшимча қилган.
Л. О. нинг жасади кеча тунда топилган. Почтачининг бир неча кундан бери бедарак кетгани ҳақида даставвал Телеграмдаги “UzAlert” қидирув отряди” канали хабар берган. Қидирув эълонига кўра, аёлнинг олти яшар қизчаси бўлган.
Ижтимоий тармоқларда “даҳшатли ҳодиса” деб таърифланаётган почтачи аёлнинг ўлими Тошкентда электр таъминотида сурункали узилишлар кузатилаётган бир пайтга тўғри келди.
Каримов давридан буён асосан вилоятларда кузатиб келинаётган, эндиликда пойтахтга ҳам кўчган электр таъминотидаги муаммолар авваллари кўпроқ куз-қиш мавсумида юзага чиқар эди. Бироқ бугунги кунга келиб чироқ ўчиши республиканинг қарийб барча ҳудудларида ёз мавсумида ҳам бўй кўрсата бошлади.
Расмийлар бу энергетик инқироз сабабларини баъзан табиий офатлар билан боғласалар, баъзан электр тармоқларида кучланиш ортиб кетгани ортидан юзага келган авариялар ва бошқа сабаблар билан изоҳламоқдалар.
Ўзини ислоҳотчи сифатида тақдим этиб келаётган президент Шавкат Мирзиёев тўла иқтидорга келган 2016 йилдан буён айниқса сайлов олдидан газ ва электр таъминотидаги муаммоларни бартараф қилиш ҳақида турли ваъдалар бериб келмоқда.
Аммо ўтган 6,5 йил ичида ўзбек сайловчисининг уйида чироқ узлуксиз ёнмаган. Аҳолининг газ ва электр муаммоси ҳал қилинмаган. Аксинча, пойтахтда ҳам чироқ ўчишлари одатий ҳолга айланган. Бунинг ортидан тармоқларда “Каримов даврида ҳеч қурса, Тошкентда свет ўчмасди” қабилида ёзғиришлар пайдо бўлган.
Электр таъминотидаги узилишлар шу пайтгача вилоятлар ва пойтахт аҳолиси учун кўплаб ноқулайликларни туғдириб келаётгани сир эмас. Бироқ, очиқ манбалар асосида хулоса чиқарилса, бу муаммо киши ўлимига олиб келган ҳолат илк бор кузатилмоқда.
