O‘zbekistonning Isroildagi elchixonasi “mamlakatning shimoliy hududlarida murakkab vaziyat vujudga kelayotgani”ni e’tiborga olib vatandoshlarga murojaat bilan chiqdi.
Diplomatik vakolatxona Isroildagi O‘zbekiston fuqarolariga shaxsiy xavfsizlik choralarini ko‘rish, zaruriyatsiz ko‘chaga chiqmaslik, ko‘ngilochar muassasalarga bormaslik va raketa otishmalari paytida boshpanalarni tark etmaslikni tavsiya etgan.
“Isroil hukumati va O‘zbekiston elchixonasi rasmiy xabarlarini kuzatib boring. Isroil frontorti qo‘mondonligidan bildirishnomalar va ogohlantirishlar (Home Front Command) mobil ilovasi yoki veb-sayti havolasini telefoningizga o‘rnating”, deyiladi rasmiy bildirgida.
Qayd etilishicha, konsullik bo‘limi bilan 03-672-2466, 03-672-2371, 03-758-5075, 03-758-5076 raqamlari orqali, shoshilinch vaziyatlarda esa +972 54 485 1397 raqami orqali bog‘lanish mumkin.
Eslatib o‘tamiz, so‘nggi kunlarda Isroil–Livan chegarasida vaziyat o‘ta keskinlashdi.
Joriy hafta boshida Isroil Livan janubidagi “Hizbulloh” radikal guruhi obyektlariga qarata keng ko‘lamli zarbalar bera boshlaganini ma’lum qildi. “Hizbulloh” harakati bunga javoban Isroil tomon raketalar uchirgan.