Rossiyada 19-noyabr kuni boshlanadigan “O‘zbekiston madaniyati kunlari” tadbiri oldidan ikki davlat o‘zaro orden almashdi.
Rossiya prezidenti Vladimir Putin 18-noyabr kuni O‘zbekiston xalq artistlari Farrux Zokirov va Sevara Nazarxonni “o‘zbek va rus madaniyatini yaqinlashtirish hamda boyitishga qo‘shgan hissasi uchun” “Do‘stlik” ordeni bilan mukofotladi.
O‘zbekiston prezidenti Shavkat Mirziyoyev ham rossiyalik ikki san’atkorni mukofotlashga qaror qilgan.
Prezident matbuot xizmati yoyinlagan farmonga muvofiq, Sergey Bezrukov (RF xalq artisti, Moskva drama teatri badiiy rahbari, teatr va kino aktyori) hamda Andris Liyepa (RF xalq artisti, balet artisti, rejissyor) “yorqin va betakror iste’dodi, xususan, kino va teatr yo‘nalishidagi sermahsul ijodiy faoliyati bilan madaniyat va san’at sohalarida hamkorlikni kengaytirish, ma’naviy qadriyatlarni asrab-avaylash va boyitishga qo‘shayotgan munosib hissasi uchun” O‘zbekiston Respublikasining “Do‘stlik” ordeniga munosib ko‘rilgan.
Bugun Moskvadagi Kreml davlat saroyida “O‘zbekiston madaniyati kunlari” doirasida o‘zbek san’ati ustalari ishtirokida konsert dasturi namoyish etiladi.