18 йилдан буён Қўшма Штатларда яшаб ижод қилаётган 33 яшар пианиночи Лола Астанова Тошкент шаҳрида туғилиб ўсган. Нафақат ижрочилик маҳорати, балки ўзига хос кийиниш услуби, жозибали ташқи кўриниши билан мунаққидлар орасида "дунёнинг жозибадор пианиночиси" деган номни қозонган Лола Озодлик саволларига жавоб берди.
Озодлик: Америкага қандай бориб қолгансиз?
- Мен Америкага илк бор болалигимда гастролга келганман. Тамара Попович студияси билан биргаликда келганмиз. Ўша пайтдаги тассуротларимни сўз билан таърифлаш қийин. Бу худди шоудек эди. Чунки бу каби нарсаларни олдин кўрмагандим. Тунги Нью Йорк, оппоқ лимузинлар, осмонўпар бинолар, рекламалар, сайлгоҳни эслайман, бу шу қадар гўзал эдики! Кейин 2000 йил бошида келганман. Бу ерга мусиқа ва санъат билан шуғулланиш, карьера яратиш мақсадида келганман.
Озодлик: Америкада карьерангизни бошлаш қийин бўлмадими?
- Албатта қийин бўлган. Кўпчиликда Америкада ҳамма нарса зўр ва гўзал, келсанг бўлди, ҳамма нарса биллур идишларда олдингизга тортилади деган иллюзия бўлади. Аслида, бундай эмас. Албатта, доим қийинчиликлар бўлган. Ҳаммасини нолдан бошлашга тўғри келди. Бу ерга келганингда ҳеч кимни танимайсан, жамиятни билмайсан. Бирорта ҳам танишингиз, ёрдам қўлини чўзадиганлар йўқ. Шунинг учун бу даврдан синмасдан ўтиш мушкул ишдир. Кўчилик бу даврдан ўта олмайди. Қайтиб кетиш, қийинчиликларга қарши курашмасдан таслим бўлиш ҳолатлари учраб туради. Курашни давом эттириб, енгилмасангиз ишингиз юришиб кетади. Бир нарсани айтишим мумкинки, бошқа жамиятларда бўлгани каби, Америкада ҳам ўзига яраша муаммолар бор, бироқ ҳаммаси ўзингизга боғлиқ. Қаердан келгансиз, кўринишингиз қандай, инглизча талаффузингиз қандай, ҳисоб рақамингизда қанча пулингиз бор – буларнинг бирортаси аҳамиятга эга эмас. Ҳаммаси ўзингизга, мақсадларингизга эришиш учун қандай курашаётганингизга боғлиқ.
Озодлик: Қандай қилиб мусиқа оламида ўз ўрнингизни топдингиз?
- Санъат оламида ҳамма субъектив бўлади. Бу борада ҳамманинг ўз фикри бўлади. Мусиқа бу менинг қизиқишим, болалигимдан шуғулланиб келаяпман, мусиқага умримнинг қанча йилини бағишладим. Мен ҳар доим қилаётган меҳнатларим натижасини кўрганман. Бирор иш билан шуғуллансангиз, бу айнан мен қилишим керак бўлган иш деб билсангиз ва натижаларга эришсангиз, демак сиз шу нарса учун яралгансиз. Болалигимдан қизиқишларимга устозларим катта эътибор беришган. Улғайгач, карьера пиллапояларидан юриб, ўз мухлисларимни топдим, мухлисларим эса, мени топишди. Мусиқанинг ўзи мени танлаган.
Озодлик: Ўзбекистон билан боғлиқ хотираларингиз билан ўртоқлашсангиз.
- Ўзбекистонда анчадан бери яшамайман. Тўғри, у ерда қариндошларим бор. Лекин Ўзбекистон билан яқин алоқада эмасман. Балки, бу вақти келиб ўзгарар. Яқинда Инстаграм ва бошқа ижтимоий тармоқлар орқали ўзбекистонликлар ҳам ёзишни бошлади. Булар – оддий одамлар, мухлислар, мусиқа шинавандалари, мен ўқиган Успенский мактабининг собиқ ўқитувчилари. Баъзида улар жуда илиқ фикрлар билан мактуб йўллашади.
Озодлик: Ўзбекистон билан нимага яқин алоқада эмассиз? Бирор муаммо борми?
- Ҳали имкониятларим йўқ пайти, паспортим муддатини узайтиришим лозим бўлди. Мен Ўзбекистон консуллигига бордим. Уларга неча бор телефон қилдим, ёздим, бироқ бирор натижа бўлмади. Шундан бери паспортим йўқ, унинг муддатини узайтиришмади. Мен қандайдир бюрократик тўсиқлар бўлганди, деб ўйлайман. Чунки мен барча ҳужжатларни топширганман ва мендан талаб қилинган ҳамма нарсани бажарганман. Лекин негадир паспорт ололмадим.
Озодлик: Улар сизга нима учун паспортингизни янгилаб беришмагани сабабини айтишдими?
- Йўқ, улар буни изоҳлашмади. Мен бир неча бор ҳаракат қилдим. Биринчидан, телефон қилиб, тушиш жуда қийин. Ҳеч ким телефон гўшагини кўтармаган. Кейин мен саволларимга ҳар кимдан ҳар-хил жавоб олганман.
Озодлик: Президент Мирзиёев Америкада бўлган пайти ўзбекистонликлар билан учрашиб, уларни ватанга қайтишга чақирди. Агар сизга ҳам шундай таклиф билан чиқишса, Ўзбекистонга қайтармидингиз?
- Ўзбекистонда, Тошкентда туғилганман, шунинг учун бу жой мен учун доим муҳим бўлиб қолади. Лекин ҳозир менинг ҳаётим, профессионал фаолиятим Америкада ўтаяпти. Мен бу ерда анча йилдан бери яшайман. Ўзбекистонга концерт бериш учун ёки саёҳат учун боришим мумкин.
Озодлик: Сизни дунёда жозибали ва сексуал пианиночи сифатида танишади. Сиз бу каби таърифдан таажжубланмайсизми?
- Баъзи одамларнинг бундай деб ўйлаши мени хушнуд этади. Лекин, умуман олганда, менинг ўйлашимча, классик мусиқа бундай сифатлар билан таърифланмайди. Чунки, кўпчилик фикрига кўра, классик мусиқа жудаям зерикарли ҳамда оқ ва қора ранглардан иборат. Шу нуқтаи назардан олганда, мени жозибадор, дейишларига бир мақтов сифатида қарайман. Мен доим кўнгилдан, ҳис қилиб ижро этаман. Мен концертга келган одамларга менинг ижром қизиқ бўлишини истайман. Чунки, одамлар бу концертга кириш учун катта пул тўлашади. Шунинг учун ижрони ҳам аудио, ҳам кўриниш жиҳатдан бойитиш керак деб ўйлайман. Чунки, биз 2018 йилда яшаяпмиз. Ҳамма нарса ўзгариши мумкин. Мусиқа ҳам бундан 100 йил олдин қандай бўлса шундай бўлиши шарт эмас. Бу имконсиз. Буни ҳеч ким эшитмайди, томоша қилмайди. Томошабин кетиб қолиши мумкин. Шунинг учун ёш авлод, менинг тенгдошларим классик мусиқани қизиқарлироқ қилиб беришга ҳаракат қилаётганини фақат олқишлаш керак.
