Линклар

Шошилинч хабар
16 октябр 2018, Тошкент вақти: 19:34

Ишчилар пахтада, имом, отинойи ва дастурхончилар терим отрядлари тузмоқда


Озодлик архивидан.

Бухоро ва Қашқадарëдаги завод-фабрикалар, аҳолига хизмат кўрсатувчи корхона, ташкилот ва муассасалар ишчилари 17 сентябрдан бошлаб пахта теримига чиқарилди.

Фарғона водийсидаги имомлар ва дастурхончилар эса, аҳолини пахтага олиб келишга сафарбар қилинди.

Бухоролик ишчиларнинг Озодлика айтишича¸ улардан “ўз ихтиëрим билан пахтага чиқдим”, деган тилхат ëздириб олинган.

Ўзини “Пахта-2018” республика штаби масъули", деб таништирган мулозимнинг айтишича¸ 11 сентябрь куни Ўзбекистон Бош вазири Абдулла Арипов ўтказган селектор йиғилишида ўқитувчи ва шифокорлардан ташқари барча ишчи-ҳизматчиларни пахтага сафарбар қилиш буюрилган.

- Бу борада селектор якунларига оид 05-01-296 рақамли баëннома бор. Бу баëнномада ишчиларнинг оммавий равишда пахтага юборилиши кўрсатилган, деди мулозим.

Озодликка маълум бўлишича¸ Ўзбекистонинг барча вилоят ҳокимликларида “Пахта-2018” йиғим-терим мавсумига ходимларни жалб қилиш тўғрисида фармойишлар қабул қилинган.

Озодликда Сурхондарë хокимининг “терим отрядлари тузиш” ҳақидаги Ф-244 фармойиши ва бу фармойиш асосида Сурхондарë электр тармоқлари идорасига юборилган кўрсатма нусхаси мавжуд.

Бу кўрсатмага кўра¸ электр тармоқлари идорасининг “шаҳар ва туман бўлимлари ва хизматгоҳларида ишлайдиган ходимларининг пахта-йиғим теримига жалб қилиниши” таъминланиши керак.

Кўрсатмада пахтага чиққан ходимларнинг терим нормасини бажариши устидан доимий назорат ўрнатилиши ҳам таъкидланади.

Озодлик суҳбатлашган “Бухородонмаҳсулотлари” ширкатида ишлайдиган тегирмончига кўра¸ айни ташкилот ишчилари ëппасига пахтага чиқарилган.

- "Пахтага ўз ихтиëрим билан чиқдим", деб тилхат ëздириб олишди¸ деган суҳбатдош айни тилхат нусхасини Озодликка тақдим қилди.

Озодликка маълум бўлишича¸ Қўқон ëғ-мой комбинати ишчиларининг ярмиси 7 сентябрь куни бир ой муддатга Жиззах вилоятига пахтага юборилган. Айни завод ишчисига кўра¸ ишчиларнинг қолган ярми 7 октябрдан бошлаб бир ойга Жиззахга пахта теришга боради.

Данғара туманидаги Озодлик мобил мухбирига кўра¸ айни туман сув хўжалик идораси ва банк хизматчилари ҳам мажбуран пахтага юборилган.

Муллалар терим отрядлари ташкил қилмоқда

Андижон вилоят, Шаҳрихон шаҳридаги мобил мухбиримизга кўра¸ маҳаллий имомлар¸ отинойи ва дастурхончиларга терим отрядлари тузиш буюрилган:

- Имомлар маҳалла ҳудудидаги эркаклар¸ олдин қора рўйхатда бўлганларни йиғиб терим отрядлари тузиб беришди. Отинойи ва дастурхончилар эса маҳалла хотин-қизларидан иборат терим отряди тузишди.

Унга кўра¸ маҳаллалардаги кам таъминланган оилалар пахтага чиқишга мажбурланмоқда:

- Акс холда уларга бериладиган ëрдам пули кесиб ташланиши ҳақида тахдид қилинди.

Маҳаллий матбуот бу йилги пахта теримига 2 миллиондан ортиқ теримчи жалб қилиниши ва шу мақсадда мамлакат бўйича жами 26 мингдан ортиқ "кўнгилли отряд" ташкил этилишини билдирди. Бу "кўнгилли" отрядларнинг кимлардан ташкил топиши ҳақида ҳозирча расмий хабар берилмади.

Сизнинг фикрингиз

Шарҳларни кўрсатинг

XS
SM
MD
LG