Россия президенти Владимир Путин ҳамда Туркия президенти Ражаб Тоййиб Эрдўғон Москва ва Анақара ўртасидаги алоқалар яхшиланганини айтиб, Суриядаги можарони тугатиш учун ҳамкорлик қилишга келишиб олишганини билдиришди.
Икки етакчи 10 март куни Москвада учрашиб, Сурия ва Ироқдаги можароларни, иқтисод ва энергетика соҳаларида ҳамкорлик ҳамда терроризмга қарши кураш масалаларини муҳокама қилди.
“Биз дунёдаги энг долзарб бўҳронларни, биринчи навбатда, Суриядаги бўҳронларни ҳал қилиш устида фаол ишлаяпамиз, - деди Путин, - Мамнуният билан айтмоқчиманки, ҳеч ким буни кутмаган эди, лекин ҳарбий мулозимлар, разведка хизматлари даражасида жуда ишончли, самарали мулоыот олиб боряпмиз”.
Эрдўғоннинг Москвага ташрифи Анқара ва Москва ўртасидаги алоқаларни яхшилашга уриниш ўлароқ баҳоланмоқда. Кейинги йилларда Туркиянинг Ғарб мамлакатлари билан алоқаси таранглашган. Бундан ташқари, Туркиянинг НАТОдаги ҳамкорлари ва Европа Иттифоқи билан алоқалари ҳам ёмонлашган.
Эрдўғон Берлинни Туркия вазирларининг бир неча олмон шаҳрида йиғин ўтказиш режасини бекор қилгани учун Германияни “фашистларга” хос сиёсат олиб боришда айблагани учун олмон расмийлари томонидан кескин танқид қилинди.
Йиғинлардан мақсад Европадаги турк сайловчиларини Эрдўғон ваколатларини оширувчи референдумни қўллашга чорлаш эди. Ғарб мамлакатлари мазкур референдум президентга ҳаддан ташқари кўп ваколат беришини айтиб, танқид қилиб келадилар.
Туркия ва Россия ўртасидаги алоқалар ҳам кейинги икки йил ичида кўп ўзгарди.
Туркия ва Россия Сурия урушида қарама-қарши тарафларни қўллайди. 2015 йилнинг ноябрида Туркия ҳарбий учоқлари Россия бомбардимончи учоғини отиб туширганидан кейин, икки давлат алоқалари кескин совиб кетди.
Бу ҳодисадан бир неча ҳафта ўтиб, Россия Сурия президенти Башар Асаднинг рақибларига ҳаводан ҳужум қила бошлади.
“Ҳудудимиздаги хавфсизлик масалаларига келадиган бўлсак, Сурияда қон тўкилишини тўхтатиш учун ҳамкорликда чора кўриш керак, деб ишонаман”, деди Эрдўғон.
Россия ва Туркия Суриядаги жангларни тўхтатиш учун Қозоғистонда бўлиб ўтаётган музокараларга етакчилик қилмоқда.
9 март куни Россия Туркиядан айрим сабзавотларни импорт қилишга қўйилган чекловларни бекор қилди.
Учрашув давомида Эрдўғон Туркияда Оққуйи атом электростанциясини қуриш ҳамда “Турк оқими” газ қувурини ётқизиш бўйича ҳамкорлик аввалга ҳолатига қайтаётганини билдирди.
Рус ва турк матбуоти учрашув Туркияннинг Россиядан “С-400” ердан-ҳавога отиш тизимларини сотиб олиши ҳам муҳокама қилиниши мумкинлиги ҳақида хабар бериб келади.
