Самарқанддаги “Боқий шаҳар” мажмуасида турк давлатлари раҳбарларига концерт намойиш этилди
Самарқандга йиғилган туркий давлатлар етакчилари 10 ноябрь оқшомида “Буюк ипак йўли” халқаро туризм марказидаги “Боқий шаҳар” мажмуасига ташриф буюришган.
Президент матбуот хизмати маълумотига кўра, у ерда меҳмон президентлар шарафига мезбон Ш. Мирзиёев номидан қабул маросими ўтказилган.
Меҳмонларга туркий миллатларнинг қадим маданияти, умумий анъана ва қадриятларини ўзида мужассам этган концерт дастури намойиш этилган.
Озодбек Назарбеков: "Украина ҳақидаги фикримни уйда айтаман"
Туркий давлатлар ташкилоти муштарак тил, тарих ва маданият асосида бирлашганини эълон қилган.
Саммитни ёритиш учун Самарқандга сафар қилган Озодлик мухбири Барно Анвар у ерда ҳозир бўлган Ўзбекистон Республикаси Маданият вазири Озодбек Назарбековни суҳбатга тортди.
Самарқандда Мирзиёев билан Эрдўғон учрашуви бўлиб ўтди
Ўзбекистон президенти Шавкат Мирзиёев 10 ноябрь куни Туркий давлатлар ташкилоти саммитида иштирок этиш учун Самарқандга келган Туркия президенти Ражаб Тоййиб Эрдўғон билан учрашди.
Самарқанддаги учрашувда, президент матбуот хизмати маълумотига кўра, Мирзиёев билан Эрдўғон “Яқин ва ўрта муддатли истиқболда иқтисодий ва инвестициявий шерикликда қайси янги лойиҳалар амалга оширилади? Саноат кооперацияси дастурларини тезлаштириш учун қандай чоралар кўрилиши керак? Ўзаро маҳсулот етказиб бериш ортиши учун қандай қилиб самарали транспорт-логистика тизимини таъминлаш мумкин?” каби масалаларни муҳокама қилишган.
ТДТ саммити доирасидаги асосий тадбирлар эртага, яъни 11 ноябрь куни бўлиб ўтиши режаланган.
Туркия президенти учоғи Самарқанд аэропортига қўнди
Туркия президенти Ражаб Тоййиб Эрдўғон Туркий давлатлар ташкилоти саммитида иштирок этиш учун Самарқанд шаҳрига етиб келди.
Ўзбекистонга йўл олишдан аввал Анқарада ўтказилган матбуот анжуманида Эрдўғон: “ Туркий давлатлар ташкилотининг Самарқанд саммитида муҳим қарорлар қабул қилишдан ташқари ташкилотимизнинг келажаги ва мавжуд ҳамкорлигимизни чуқурлаштириш масалаларини муҳокама қиламиз”, деган эди.
Туркия президенти Ўзбекистонга бу гал ҳам рафиқаси Эмина Эрдўғон билан келган.