Серпуховода ўлдирилган 5 яшар Ҳувайдонинг отаси Абдусалом Саидов қизининг қотили сифатида гумон қилинаётган шахс устидан бўладиган судда иштирок этиш мақсадида 21 август куни Москвага учиб кетди.
Жўнаб кетишдан аввал Абдусалом Саидов Ҳувайдонинг қабрини зиёрат қилди.
«Бугун Қурбон ҳайити байрами муносабати билан қизимнинг қабри устида дуо қилдим. Москвага кетаяпман, мен Ҳувайдонинг қотили устидан бўладиган судда иштирок этаман. Қотил қилмишига яраша жазо олишига ўзимни ишонтираяпман. Мен Россия қонунларига ишонаман. Адвокатлар билан биргаликда ярамас учун умрбод қамоқ жазоси берилишига эришамиз», деди Саидов Радио Озоди (“Озодлик” радиосининг тожик хизмати) билан суҳбатда.
Беш ёшли Ҳувайдо Тиллозода маҳаллий аҳоли вакили томонидан 22 июль куни кечқурун номуси булғанганидан сўнг ўлдирилган эди. Унинг спорт сумкасига солинган жасади 23 июль куни эрталаб Москва вилоятининг Серпухово шаҳридаги темирйўл станцияси яқинидан топилди.
Жиноятни содир этишда гумон қилиниб 28 ёшли маҳалий аҳоли вакили Александр Семин ҳибсга олинди. Ҳувайдонинг отаси Абдусалом Саидов аввал бошданоқ қизининг ўғирланишида айнан Семин гумон қилинганлигини айтди.
«Қўшнилар унинг кўча эшигини бузиб кирмоқчи эди, бироқ участка нозири бунга рухсат бермади. Агар биз унга қулоқ солмаганимизда эди, балки Ҳувайдонинг ҳаётини сақлаб қолган бўлармидик?! Бу вақтда қотил калитни йўқотиб қўйганини баҳона қилиб қочиб кетишга улгурди. Кейинроқ, рус миллатига мансуб дўстларимдан бири Семинни спорт сумкаси билан кўргани ҳақида хабардор қилди. У ўрмон томон кетган эди. Эрта тонгда у ердан Ҳувайдонинг жасадини топдик», дейди Абдусалом Саидов.
Кейинроқ Семиннинг хонадонидан қизалоқнинг оёқ кийимининг излари ва бармоқ излари топилди. Серпухов шаҳар судиуни икки ой муддатга ҳибсга олиш борасида қарор қабул қилди.
Тожикистон ташқи ишлар вазирлиги Ҳувайдо Тиллазоданинг шафқатсизларча ўлдирилиши муносабати билан 24 июль куни Россия ТИВга нота топширган. Вазирлик Россияни "болага нисбатан содир этилган ваҳшийларча жиноятни батафсил тергов қилишга” чақирди ва “ғайриинсоний ҳаракатни содир этган жиноятчига кескин жазо кўрилишини” талаб қилган эди.
