Эрон президенти Маҳмуд Аҳмадийнажот ўз мамлакатининг ядровий энергияга эга бўлишга ҳаққи борлиги ва Ғарб Эроннинг бу ҳуқуқини охир-оқибат тан олишини яна бир бор такрорлади.

Навруз байрами муносабати билан телевидениеда қилган чиқишида Эрон раҳбари: “Улар азиз Эрон халқига зиён-заҳмат етказа олмаслигини тушунади. Улар шовқин-сурон кўтариб, бизни чекинишга мажбур этиб, инсоният тараққиётини ортга қайтаришга уринмоқда. Бироқ улар бундай қила олмайди, бунинг учун қудрати ҳам йўқлиги ҳаммага маълум”, - деди.
БМТ Хавфсизлик кенгаши уранни бойитиш дастурини тўхтатишдан бош тортгани учун Эронга қарши санкциялар жорий қилиш ҳақидаги резолюция лойиҳасини муҳокама қилиши кутилмоқда.