«Озод Европа/Озодлик” радиостанцияси президенти Жефф Гедмин Қирғизистон ҳукумати назоратидаги Миллий телеканал дастурларидан “Озодлик” радиоси қирғиз хизмати (“Азаттик” ) телекўрсатувлари олиб ташлангани хусусида хавотир билдирди.
Қирғизистон Миллий телеканали “Озодлик”нинг қирғиз хизмати теледастурларини 8 октябрда тўхтатиб қўйди.
Телеканал раҳбарияти бу ҳаракатини “Озодлик” радиоси эфир вақти учун қарздор бўлиб қолгани билан изоҳлаган эди.
Бироқ “Озодлик”нинг Миллий телеканалдан қарз бўлмагани аниқланди. 9 ҳафтадан бери Миллий телеканал “Азаттик” радиоси дастурларини эфирга бермай келаётир. Қирғиз ҳукумати вакиллари бу муаммони ҳал қилиш учун учрашувдан бош тортиб келмоқдалар”, - дейилади президент Гедмин баëнотида.
Қирғизистон Миллий телеканали раҳбари Мелис Эшимканов эса Ройтер ахборот агентлигига берган суҳбатида “Азаттик” дастурларининг берилмай қўйилишига ўзаро мажбуриятларнинг бажарилмаётгани масаласи сабаб бўлганини айтди.
«Озод Европа/Озодлик” радиоси президенти Жефф Гедмин матбуот учун берган билдирувида, жумладан, “сўнгги воқеалар Қирғизистонда қисқа муддатли плюрализм тажрибаси адоғига етиб бораётганидан даракми?”, деган ташвишли савол ҳам қўйилган.
Ўзаро келишувга кўра¸ Қирғизистон Миллий телеканалида ҳар ҳафта "Азаттик" радиосининг "Ўнғайсиз саволлар" ҳамда "Азаттик+" ёшлар дастури бериб борилар эди.