Исломий Давлат гаровга олган япониялик журанлист Кенжи Готога нисбат берилаётган аудио ёзув экстремист гуруҳи томонидан эълон қилинди. 29 январь куни YouTube порталида эълон қилинган аудио ёзувда, инглиз тилида мурожаат қилган япониялик асир, агар террорчиликда айбланиб, Иорданияда қўлга олинган ироқлик аёл бугун шомгача озод қилинмаса, Исломий Давлат гаровга олган иорданиялик учувчи қатл қилинишини айтади.
Япониялик асирга нисбат берилаётган овоз: “Агар Сожида ал-Ришавий Мосул вақти билан 29 январь, пайшанба куни менинг ҳаётим эвазига озод қилишга ҳозир қилинмаса, иорданиялик пилот Муас ал-Касаесбеҳ дарҳол қатл қилинади”, дейди.
Ал-Ришавий 2005 йилда Иордания пойтахти Амманда 60 кишининг ўлимига сабаб бўлган портлашга алоқадорликда айбланиб қўлга олиниб, ўлимга ҳукм этилган.
Аудио ёзувда Исломий Давлат ал-Ришавийнинг озод этилиши эвазига асирларнинг иккаласи озод қилинадими, ё биттасими аниқлаштирилмаган.