"Ўзбекистон темир йўллари" акциядорлик ширкати 2013 йилдан бери қурилаётган "Ангрен-Поп" электрлаштирилган темир йўли ўтадиган туннелни мураккаблиги бўйича дунёдаги 8-объект, деб эълон қилди.
Расмий сайтда берилган хабарга кўра, Қамчиқ довонидан ўтаётган янги темир йўлидаги туннель узунлиги 19 километрга тенг бўлади.
Ширкат бу туннель қурилишини тоғли ҳудуддаги қурилишлар орасида дунёда 8-ўрин, туннелдан ўтувчи темир йўлининг узунлиги бўйича эса 13-ўринга қўйди.
Ўзбекистон президентнинг 2013 йил, 18-июндаги қарори асосида қурилаётган "Ангрен-Поп" электрлаштирилган темир йўлининг қачон битиши аниқ айтилмаётир. Аммо, унинг тез орада фойдаланишга топширилиши ва Марказий Осиёни темир йўллар орқали Хитойга улаши кутилмоқда.
Расмий хабарда айтилишича, қурилишда 4 минг 250 мутахассис ишламоқда. Ҳозирга қадар 43 миллион куб метр ҳажмидаги қурилиш ишлари битказилган. Темир йўли бўйлаб, 13 та кўприк, 3 та йирик темир йўл вокзали ҳам қуриб битирилгани айтилди. Бундан ташқари, 19 километрлик туннелнинг икки тарафидан ётқизилган темир йўлининг Ангрен ва Попга туташган қисмини электрлаштириш ишлари ҳам якунлангани айтилди.