Даромадни солиқдан яширганликда айбланаëтган аргентиналик футбол юлдузи Лионел Месси ва унинг отаси бугун Барселона маҳкамаси саволларига жавоб беришни бошлади.
Агар Месси ва унинг отасига қўйилаëтган айб судда ўз исботини топса¸ замонавий футбол қироли 2 йилгача озодликдан маҳрум қилиниши мумкин. Месси испан солиқ тизимларига 4¸5 миллион доллар тўламаганликда айбланмоқда. Айблов томони таъкидича¸ Месси оффшор ҳудудларда турли қобиқ ширкатлар тузиш орқали¸ рекламадан келган даромаддан тўланадиган солиқ миқдорини камайтиришга муваффақ бўлган.
Айни пайтда кузатувчилар¸ Мессининг катта миқдорда жарима тўлаш ва келажакда солиқ имтиëзларидан маҳрум бўлиш эвазига қамоққа чап беришини айтмоқдалар.
Forbes журналига кўра¸ кейинги ўн йил давомида дунëнинг энг қимматбаҳо спортчилари ўнлигида қолаëтган Барселона клуби ўйинчиси Мессининг бойлиги 350 миллион доллар атрофидадир.