Туркия президенти Ражаб Тоййиб Эрдўғон 21 июлдан бошлаб мамлакатда уч ойлик фавқулодда ҳолат тартиби жорий қилди. Ҳукумат ва миллий хавфсизлик кенгаши аъзолари билан учрашувда бу қарорни эълон қилган Эрдўғон¸ унинг 16 июлга ўтар кечаси амалга оширилган давлат тўнтариши уриниши муносабати билан олинганини билдирди.
Фавқулодда ҳолат тартиби президентнинг мамлакат парламентини четлаб ўтиб¸ янги қонунлар қабул қилишига имкон беради. Мухолифат ва ҳуқуқ фаоллари¸ фавқулодда ҳолатнинг мамлакатда муваффақиятсиз тугаган тўнтариш тарафдорларини оммавий репрессия қилишга олиб келишидан чўчимоқда.
Эрдўғон қарорига муносабат билдирган Германия Ташқи ишлар вазири¸ Туркия раҳбаридан фавқулодда ҳолатни имкон қадар тез бекор қилиш ва мамлакатда қонун устиворлигини кафолатлашга чақирди.
16 июль тунги воқеаларидан бери Туркияда камида 6 минг одам ҳибсга олинди¸ улар орасида мамлакатдаги 360 ҳарбий генералдан юздан ошиғи бор. Эрдўғон ҳукумати ҳозирга қадар 60 мингга яқин полициячи¸ ҳакам ва давлат хизматчисини ëппасига ишдан бўшатди.
Айни пайтда¸ мактаб ва олий ўқув юртларида бу тўнтаришга хайрхоҳликда гумонланаëтганларни оммавий тарзда ишдан бўшатиш жараëни бормоқда. Туркия университетларидаги 1500 декан ишдан бўшатилди¸ хусусий мактабларнинг 20 мингдан ошиқ ўқитувчиси лицензияси бекор қилинди.
Эрдўғон АҚШда яшовчи исломий олим Фатҳуллоҳ Гуленни давлат тўнтариши ортида турган асосий шахс деб айбламоқда.