Сурхандарё вилоятидаги Узундара қалъаси эллин даври нумизматик топилмалари сони бўйича дунёдаги биринчи ўринни эгаллаши мумкин. Бу ҳақда шанба куни Термиз давлат университетида ўтган археологик анжуманда маълум қилинди.
Мазкур анжуман грек-бақтрия замонига мансуб Узундара қалъасида олиб борилган археологик ишларнинг тўртинчи босқичи якунлангани муносабати билан ўтказилди. Археологик қазилмалар Россия академиги Эдвард Ртвеладзе раҳбарлигидаги рус-ўзбек қўшма экспедицияси томонидан олиб борилган.
Хабарда айтилишича, Узундарада топилган тангалар коллекцияси мана шу соҳага ихтисослашган Британия музейида ҳам мавжуд эмас.
Кумуш тангалар Антиох 1 даврига, яъни эрамиздан олдинги 295 – 280 - 265 йилларга тегишли бўлиб, Александр Македонский ҳукумронлиги даврида ишлаб чиқарилган. Бундан ташқари грек-бақтрия ҳукумдорлари Евкратий, Деметрий ва Евтидем II даврида ишлаб чиқарилган ўнлаб тангалар ҳам топилган.