7 декабрь куни Эрон Shell ширкати билан мамлакатдаги уч нефть ва газ конида қазиб чиқариш ишларини йўлга қўйишга келишди. Бу келишувга АҚШнинг бўлажак президенти Дональд Трамп Эрон билан бизнес ҳамкорлик қилишга йўл очиб берган келишувни бекор қилиш ҳақидаги ваъдаси ҳалал бера олмади.
Англия ва Нидерландия ширкати бўлмиш Shell Эрон ядровий дастури бўйича келишув имзоланганидан бери мамлакатга қайтган энг йирик халқаро нефть ширкатидир. Аввалроқ Франциянинг Total ширкати Теҳрон билан газ қазиб олиш бўйича 4,8 миллиард доллар қийматга эга шартнома имзолаган эди.
Shell билан эришилган келишув ширкатга Эрон жануби-ғарбида жойлашган Азадеган ва Ядаверан конларини ҳамда Форс кўрфазида бир газ конини баҳолаш имконини беради.
Бу икки кон сўнгги 20 йил ичида Эронда топилган энг йирик конлардир. Эрон Азадеган кони мамлакатдаги энг йирик нефть конига айланиши мумкин, деб ҳисоблайди.
Shell кескин рақобатга дуч келиши мумкин. Хитойнинг Sinopec нефть ширкати Ядаравон конида аллақачон қазиш ишларини бошлаб юборган. Total эса Азадеган конида қазиш ишларини бошлаш ниятида эканлигинини изҳор қилган.
Агар Трамп ўз ваъдасидан чиқиб, Теҳрон билан эришилган келишувни ўзгартирса ёки ундан воз кечса, Shell ва Total каби нефть ширкатлари зарар кўриши мумкин.