Қозоғистон расмийлари қочқин тадбиркор Мухтор Аблязов Францияда озодликка чиқарилганига қарамасдан у ва унинг шерикларини жавобгарликка тортиш учун курашишда давом этадилар.
Қозоғистон бош прокуратураси 15 декабрь куни эълон қилган билдирувда ёзилишича, Аблязовга пул ўзлаштириш, жиноий гуруҳ тузиш, бошқалар мулкини ноқонуний равишда қўлга киритиш, молиявий жиноятларга қўл уриш, пул ювиш ҳамда ваколатларини суиистеъмол қилиш айбловлари қўйилган.
Аблязов 9 декабрь куни Франция олий суди уни Россияга экстрадиция қилиш буйруғини бекор қилиши ортидан француз қамоқхонасидан чиқарилди. Суд тадбиркорга қўйилган айбловлар сиёсий мақсадларни кўзлашини таъкидлади.
Бир неча ой давомида қочқинликда юрган Аблязов 2013 йил Францияда қўлга олинган эди.
Франция ҳукумати 2015 йилнинг сентябрида уни Россияга экстрадиция қилишни маъқуллаган эди.
Қозоғистон Франция билан экстрадиция масаласида келишув имзоламаган, аммо Россия ва Украина билан имзолаган.
Қозоғистоннинг “БТА” банкининг собиқ директори бўлмиш Аблязовга Қозоғистон, Россия ва Украинада қидирув эълон қилинган. Тадбиркорга 5 миллиард долларни ўзлаштириб олиш айблови қўйилган.
Аблязовнинг ўзи эса унга қўйилган айбловлар заминида сиёсий сабаблар борлигини таъкидлаб келади.