Британиялик поп қўшиқчи Жорж Майкл 53 ёшида Англияда вафот этди. Бу ҳақда қўшиқчининг матбуот котиби Синди Бергер билдирди.
Унинг айтишича, хонанда 25 декабрь куни ўз уйида вафот этган. Бергер Майклнинг касал бўлмаганини қўшимча қилган.
Майклнинг менежери Майкл Липпман қўшиқчи ўлимига юраги тўхтаб қолгани сабаб бўлганини билдирди. Полицияга кўра, қўшиқчининг ўлими шубҳали эмас.
Майкл дунё бўйлаб ўз қўшиқлари аудиоёзувларининг 100 миллиондан ортиқ нусхасини сотган. 2008 йилда Billboard журналининг “Барча замонларнинг энг яхши 100 артисти” рўйхатида Майкл 40 ўринга қўйилган эди.
Майкл 1981-86 йилларда Wham! гуруҳи аъзоси ўлароқ бир неча муваффақиятли қўшиқни, жумладан, таниқли Last Christmas ашуласини куйлаган.
Майкл яккахон қўшиқчи сифатида янада кўпроқ шуҳрат қозонган. Унинг илк яккахон албоми, Faith, 1987 йил чиқарилган ва “Йилнинг энг яхши альбоми” номинациясида “Грэмми” мукофоти билан тақдирланган. Альбом Billboard рўйхатида 12 ҳафта биринчи ўринда, 51 ҳафта энг яхши ўнликда турган.