Қирғизистон шимолида бир неча ўн кишининг ўлимига олиб келган авиаҳалокат сабабларини ўрганишга Халқаро авиация қўмитаси мутахассислари жалб этилади.
Бу ҳақда Қирғизистон бош вазирининг биринчи ўринбосариМухамметқалий Абулгазиев билдирди.
16 январь тонгида Қирғизистон пойтахтидаги “Манас” аэропорти яқинида Туркияга қарашли Боинг-747 юк ташувчи учоғи қулаб тушди.
Қирғизистон Фавқулодда вазиятлар вазирлиги вакиллари Боинг-747 учоғи об-ҳаво шароити ёмон бўлгани (қуюқ туман тушгани) туфайли ҳалокатга учраганини билдирганлар.
Мазкур учоқ 16 январь тонгида Гонконгдан учиб келгани, қўнаётган пайтда аэропорт яқинидаги Дача қишлоғига қулаб тушиб, ёниб кетгани айтилмоқда. Хабарларга кўра, учоқ Бишкекка ёқилғи қуйиш учун қўнмоқчи бўлган.
Қирғиз расмийлари маълумотларига кўра, авария чоғида учоқ қулаган қишлоқда 30 дан зиёд киши нобуд бўлган.