Мексика президенти Энрике Пенья Ньето 31 январь куни АҚШга қиладиган расмий сафарини бекор қилди.
Си Эн Эн телеканалининг пайшанба куни билдиришича, бунга президент Дональд Трампнинг Месика чегарасига девор қуриш тўғрисидаги баёноти сабаб бўлган.
Дональд Трамп пайшанба куни Мексика девор қурилишига пул тўлашдан бош тортса, Пенья Ньето Вапшингтон сафарини бекор қилиши керак, деб билдирган эди.
-Агар Мексика Қўшма Штатларнинг адолатли таклифига ҳурмат билан муносабатда бўлмаса, бундай учрашув натижасиз бўлади ва мен бошқача йўлдан бормоқчиман. Бизнинг бошқа танловимиз йўқ, - деди Дональд Трамп.
Оқ уй тарқатган маълумотга қараганда, Трамп Мексикадан импорт қилинаётган маҳсулотларга 20 фоизли қўшимча солиқ солишни ва мана шу солиқ эвазига чегарадаги деворни қуриб битказишни таклиф қилган.
Чоршанба куни Доналд Трамп мазкур деворни қуриш ишлари яқин фурсатда бошланишини эълон қилган эди. Трамп ABC News каналига берган суҳбатида девор қурилиши ҳаражатларини Мексика қоплашини айтган.
Мексика президенти Энрике Пенья Ньето халқига қарата қилган мурожаатида Трампнинг бу қарорини қоралади.