Душанба куни Екатеринбургда суд бир неча видеоролиги, шу жумладан черковда “покемон тутиш” акс этган ролиги билан диндорлар туйғуларини ҳақорат қилганликда ҳамда экстремистликда айбланаётган видеоблогер Руслан Соколовский устидан очилган ишни кўришни бошлади.
Тергов вакиллари Соколовскийга нисбатан эълон қилинган айблов қатор экспертизаларга асослангани, уларда Соколовский эълон қилган видеотасмаларда нафрат уйғотиш ва жамиятга ҳурматсизлик аломатлари мавжудлиги аниқланганини айтмоқда.
Блогернинг адвокатлари фикрича, экспертиза қўпол қоидабузарлик билан ўтказилган, экспертизани ўтказган мутахассислар эса, тергов билан ҳамкорлик қилади.
Руслан Соколовскийга нисбатан уй қамоғи эҳтиёт чораси қўлланган. Олдинроқ эса, у Тергов изоляторида сақланган ва Русланнинг айтишича, ҳибсхонада унга босим ўтказилган.
Руслан Соколовский 2016 нинг сентябрида Екатеринбург шаҳридаги черковлардан бирида Pokemon Go ўйнаётгани видеотасвирини эълон қилганидан сўнг қўлга олинган.
Инсон ҳуқуқлари "Мемориал" маркази видеоблогерни сиёсий маҳбус сифатида тан олган.