АҚШ Суриянинг Хон –Шайхун шаҳрига қилинган кимёвий ҳужумга ҳарбий куч билан жавоб қайтариш масаласини ўрганмоқда. Бу ҳақда Reuters агентлигига 6 апрель куни номи сир тутилаётган расмий манба маълум қилди.
Суриянинг Идлиб вилоятидаги Хон-Шайхун шаҳрига кимёвий ҳужум президент Башар Ассадга содиқ кучлар томонидан уюштирилганига ишонилиши айтилмоқда.
Мазкур ҳужумда 86 одам, жумладан, аёллар ва болалар ҳалок бўлган.
Президент Трамп бу воқеани “инсоният учун шармандалик”, деб атаган эди. АҚШ маъмурияти ҳужум “Сурия ҳукумати томонидан уюштирилганига шубҳа йўқ эканини” айтиб, Россияни Башар Ассадга босим кўрсатишга чақирган.
Бунга жавобан Россия президенти матбуот котиби Дмитрий Песков 6 апрель куни мана буларни айтди:
-Албатта, бу ўта ёвуз жиноят бўлди. Бироқ , бизнинг фикримизча, воқеага ойдинлик киритмай туриб кимнидир айблаш нотўғри бўлар эди,- деди Песков.