Чоршанба куни халқаро ҳамжамият бундан 31 йил олдин юз берган Чернобиль атом электростанциясидаги авариядан ҳалок бўлганларни хотирлади.
1986 йилнинг 26 апрелида юз берган фожеда ўнлаб одамлар ҳалок бўлган эди. Мутахасислар Чернобиль аварияси атом энергетикаси тарихидаги энг йирик ҳалокат бўлганини таъкидлаб келадилар.
26 апрель куни Украина президенти Петро Порошенко ва Беларусь президенти Александр Лукашенка Чернобиль атом электро станцияси биноси олдидаги хотира девори пойига гул қўйишди.
- Бизнинг биродар беларусь ҳалқига бу фожеа қаттиқ зарба бўлди.Бу фожеа биз- қўшни бўлган украинлар кўз ўнгида юз берди. Ядровий авария оқибатлари украинлар ва белоруслар зиммасига тушган оғир юк бўлди, - деди Порошенко.
Чернобиль атом электр станциясидаги авария оқибатида ҳавога 50 миллион кьюрига яқин радиоактив материаллар тарқалган. Бу эса Хиросимага ташланган атом бомбасидаги нурланишдан 400 баробарга кўпдир. 7 миллион одам яшайдиган 155 минг квадрат километр ҳудуд ядровий нурланиш остида қолган.